¹ Ang pagpahayag mahitungod sa Ninibe. Ang Libro sa Panan-awon ni Nahum, ang Elkoshite. ² Si Yahweh ang abugho-an nga Dios ug nagapanimalos; si Yahweh nagapanimalos ug puno sa kapungot; si Yahweh nanimalos sa iyang mga kaaway, ug nagapadayon ang iyang kasuko sa iyang mga kaaway. ³ Si Yahweh dugay masuko ug gamhanan siya kaayo; dili niya tugutan nga dili silotan ang mga dautan. Buhaton ni Yahweh nga iyang agianan ang alimpulos ug ang bagyo, ug ang mga panganod mao ang abog sa iyang mga tiil. ⁴ Gibadlong niya ang dagat ug gipa-uga kini; gipauga niya tanang mga sapa. Huyang si Bashan, ug si Carmel usab; ug ang mga bulak sa Lebanon huyang. ⁵ Nauyog ang kabukiran sa iyang presensiya, ug ang kabungtoran natunaw; ang yuta nahugno sa iyang presensiya, lakip ang kalibotan ug ang tanan nga mga tawo nga namuyo niini. ⁶ Kinsa man ang makabarog sa iyang kapungot? Kinsa man ang makasukol sa kabangis sa iyang kasuko? Ang iyang kapungot gibubo sama sa kalayo, ug ang mga bato nadugmok pinaagi kaniya. ⁷ Maayo si Yahweh, dalangpanan sa adlaw sa kasamok; ug matinud-anon siya niadtong nagdangop kaniya. ⁸ Apan laglagon niya sa hingpit ang iyang mga kaaway pinaagi sa makusog nga lunop; ug gukdon niya sila sa kangitngit. ⁹ Unsa man ang inyong gilaraw mga tawo batok kang Yahweh? Pagatapuson gayod niya kini; ang kasamok dili na makabarog sa ikaduha nga higayon. ¹⁰ Sama sa mga tunok nga nagkupot ug sama sa ilimnon sa mga palahubog, sila pagaut-uton sama sa uga nga dagami. ¹¹ Adunay usa nga mibarog taliwa kaninyo, Ninibe, nga naglaraw ug daotan batok kang Yahweh, ang usa nga nagpasiugda sa pagkadaotan. ¹² Mao kini ang gisulti ni Yahweh: "Bisan pa ug kusgan sila ug daghan, bisan pa niana pagaputlan gihapon sila; ang ilang mga katawhan mawala. Apan ikaw, Judah: Bisan tuod gisakit ko ikaw, dili ko na ikaw sakiton. ¹³ Karon ako nang putlon kanang yugo sa mga tawo gikan kanimo; ako nang putlon ang imong mga kadina." ¹⁴ Ug naghatag si Yahweh ug mando mahitungod kanimo, Ninibe: "Wala nay kaliwat nga modala sa imong ngalan. Putlon ko ang kinulit nga mga hulagway ug ang mga hulagway nga hinimo sa puthaw gikan sa mga balay sa inyong dios-dios. Ako magakalot sa imong mga lubnganan, kay ikaw salamayon." ¹⁵ Tan-awa, sa kabukiran adunay tiil sa usa ka tawo nga magdala sa maayong balita, nga magpahibalo sa kalinaw! Sauloga ang imong pista, Judah, ug ampingi ang imong panaad, kay ang daotan dili na makasulong kanimo; hingpit na ang iyang pagkaputol.