¹ Ang usa nga nagkatag kanimo padulong na aron makig-batok kanimo. Bantayi ang mga pader sa siyudad, bantayi ang mga kadalanan, pangandam alang sa gyera, andama ang tanan mong kusog. ² Kay si Yahweh ang magpasig-uli sa pagkahalangdon ni Jacob, sama sa pagkahalangdon sa Israel, bisan pa ug giguba ug gilaglag sa mga kawatan ang mga sanga sa ilang kaparasan. ³ Pula ang mga taming sa iyang kusgan nga mga tawo, ug ang mga sundalo gibistihan ug dagtom nga pula; ang mga karwahe nanagpangidlap uban ang ilang puthaw sa adlaw nga sila giandam, ug ang cipris nga bangkaw ila nang gikaway kaway sa kahanginan. ⁴ Ang mga karwahe misutoy na sa mga kadalanan; nagdali-dali sila nga nagbalikbalik diha sa halapad nga kadalanan. Daw sama sila sa mga sulo, ug nanagan sila sama sa mga kilat. ⁵ Ang usa nga modugmok kanimo nagtawag sa iyang mga opisyal; nagkabangga-anay ang matag-usa diha sa ilang pagmartsa; nagdali-dali sila aron sulungon ang pader sa siyudad. Ang dagko nga taming naandam na aron sa pagpanalipod sa mga moataki. ⁶ Ang mga ganghaan sa mga sapa napugos sa pag-abli, ug ang palasyo nangaguba. ⁷ Si Huzzab gigisi ang iyang mga sanina ug gibihag; ang iyang mga sulugoon nga babaye nagdanguyngoy sama sa mga salampati, ug nagpamukpok sa ilang mga dughan. ⁸ Ang Ninibe mahisama sa nagtulo nga linaw sa tubig, uban ang iyang katawhan mikalagiw sama sa naga-agas nga tubig. Misinggit ang uban, "Hunong, hunong," apan walay usa nga milingi. ⁹ Panguha-a ang kinawat nga mga plata, panguha-a ang kinawat nga bulawan, kay walay kataposan niini, ngadto sa katahom sa tanang maayo nga mga butang sa Ninibe. ¹⁰ Ang Ninibe haw-ang ug naguba na. Natunaw ang kasingkasing sa matag-usa, nangurog ang ilang mga tuhod, ug ang kasubo anaa sa tanan; nangluspad ang ilang mga dagway. ¹¹ Asa naman ang langob sa mga liyon, ang dapit kung asa ginapakaon ang gagmay nga mga liyon, ang dapit diin nagalakaw-lakaw ang laki ug baye nga liyon, uban ang gagmay nga mga liyon, diin wala silay gikahadlokan? ¹² Ang liyon mowatas-watas sa iyang mga tinukob alang sa iyang gagmay nga mga liyon; siya moluok sa iyang mga tinukob alang sa mga bayeng liyon; ug pun-on niya sa iyang mga tinukob ang langob, ug mapuno ang iyang tagoanan sa giwatas-watas nga mga lawas. ¹³ "Tan-awa, makigbatok ako kanimo"—mao kini ang pagpahayag ni Yahweh sa panon. "Sunogon ko sa aso ang inyong mga karwahe, ug ang espada magalamoy sa imong batan-ong mga liyon. Pagaputlon ko ang imong tukbunon gikan sa imong yuta, ug dili na gayod madunggan ang mga tingog sa imong mga mensahero."