¹ Mao kini ang pulong ni Yahweh nga miabot kang Joel nga anak nga lalaki ni Petuel. ² Paminawa kini, kamong mga kadagkoan, ug paminaw, kamong tanan nga mga lumolupyo sa yuta. Nahitabo na ba kini sa inyong mga adlaw o sa mga adlaw sa inyong mga katigulangan ? ³ Sultihi ang inyong mga anak mahitungod niini, ug ipasulti sa inyong mga anak ngadto sa ilang mga anak, ug sa ilang mga anak sa sunod nga kaliwatan. ⁴ Ang nahibilin sa dulon, dagkong panon sa dulon ang mikaon; unsa ang salin sa dagkong dulon; ang apan mikaon; ug unsa ang nahibilin sa apan, Ang ulod mikaon. ⁵ Bangon, kamong mga palahubog, ug hilak! Danguyngoy, kamong tanan nga palainom ug bino, tungod kay ang tam-is nga bino giputol na gikan kanimo. ⁶ Kay mitungas nganhi sa akong yuta ang usa ka nasod, kusgan ug dili maihap. Ang iyang mga ngipon mao ang ngipon sa usa ka liyon, ug aduna siyay mga ngipon sa usa ka babayeng liyon. ⁷ Gihimo niyang awa-aw nga dapit ang akong ubasan ug gipanitan ang akong kahoy nga igera. Gipanitan ug gilabay niya kini; nangaputi ang mga sanga niini. ⁸ Pagbangotan sama sa usa ka ulay nga nagbisti ug sako tungod sa kamatayon sa iyang batan-ong bana. ⁹ Gikuha ang halad nga trigo ug ang halad nga ilimnon gikan sa balay ni Yahweh. Nagbangotan ang mga pari, nga mga sulugoon ni Yahweh. ¹⁰ Naguba ang kaumahan; nagbangotan ang yuta tungod kay nadaot ang trigo. Nahubas ang bag-o nga bino; wala nay lana. ¹¹ Kaulaw, kamong mga mag-uuma, ug pagdanguyngoy, kamong mga tig-atiman sa ubas, para sa trigo ug sebada. Kay nahanaw na ang ani sa kaumahan. ¹² Nangalaya ang mga ubas ug nangauga na ang mga kahoy nga igera, ang mga kahoy nga granada, ingon man ang mga kahoy nga palmera, ug ang mga kahoy nga mansanas—nalaya ang tanang kahoy sa kaumahan. Kay nawala na ang kalipay gikan sa mga kaliwat sa katawhan. ¹³ Pagsul-ob ug sako ug pagbangotan, kamong mga pari! Pagdanguyngoy, kamong mga alagad sa halaran. ngari, paghigda tibuok gabii nga nagsul-ob ug sako, kamong mga sulugoon sa akong Dios. Kay wala nay halad nga trigo ug halad nga ilimnon nga ihalad sa balay sa Dios. ¹⁴ Pagpatawag ug balaan nga pagpuasa, ug pagpatawag ug balaan nga panagtigom. Tigoma ang mga kadagkoan ug ang tanang mga lumolupyo sa yuta ngadto sa balay ni Yahweh nga inyong Dios, ug paghilak ngadto kang Yahweh. ¹⁵ Alaot ning adlawa! Kay ang adlaw ni Yahweh haduol na. Uban niini moabot ang kalaglagan gikan sa makagagahum. ¹⁶ Wala ba gikuha ang pagkaon sa atong atubangan, ang kalipay ug kasadya gikan sa balay sa atong Dios? ¹⁷ Nangalata ang mga binhi sa ilalom sa bantok nga yuta , gibiyaan ug nangaguba ang mga kamalig, tungod kay nangalaya na ang trigo. ¹⁸ Nag-agulo gayod ang mga mananap! Nag-antos ang panon sa mga baka tungod kay wala na silay sibsibanan. Nag-antos usab ang mga panon sa karnero. ¹⁹ Yahweh, nagtuaw ako diha kanimo. Kay gilamoy sa kalayo ang mga sibsibanan sa kamingawan, ug gisunog sa nagdilaab nga kalayo ang tanang mga kahoy sa kaumahan. ²⁰ Bisan ang mga mananap sa kaumahan nangandoy kanimo, kay namala ang tubig sa kasapaan, ug gilamoy sa kalayo ang mga sibsibanan sa kamingawan.