¹ Patingoga ang trumpeta sa Zion, ug patingoga ang alarma diha sa akong balaang bukid! Tugoti nga mangurog sa kahadlok ang tanang lumolupyo sa yuta, kay hapit na ang adlaw ni Yahweh; sa pagkatinuod, haduol na. ² Mao kini ang adlaw sa kangitngit ug kadulom, usa ka adlaw sa mga panganod ug hilabihang kangitngit. Sama sa banagbanag nga mikaylap diha sa kabukiran, nagpadulong ang daghan ug kusgan nga kasundalohan. Wala pay kasundalohan nga sama niini, ug wala na gayoy sama pa niini, bisan sa daghan pang kaliwatan. ³ Giugdaw sa kalayo ang tanang butang nga anaa sa atubangan niini, ug usa ka nagdilaab nga kalayo ang anaa sa luyo niini. Sama sa tanaman sa Eden ang yuta nga anaa sa atubangan niini, apan adunay nagun-ob nga kamingawan sa luyo niini. Sa pagkatinuod, walay makaikyas gikan niini. ⁴ Sama sa mga kabayo ang panagway sa kasundalohan, ug midagan sila sama sa mga tigkabayo. ⁵ Sila nanglukso sama sa kasaba sa mga karwahe diha sa ibabaw sa kabukiran, sama kasaba sa nagdilaab nga kalayo nga milamoy sa uhot , sama sa kusgang kasundalohan nga andam na alang sa gubat. ⁶ Sa ilang atubangan ang mga tawo anaa sa kasakit ug nangluspad ang ilang mga panagway. ⁷ Nanagan sila sama sa kusgan nga mga manggugubat; gisaka nila ang mga paril sama sa mga sundalo; nagmartsa sila, ang matag usa diha sa ilang gilakwan, ug walay mitipas sa ilang mga linya. ⁸ Ang usa dili usab magpadaplin sa usag usa; nagmartsa sila, ang matag usa diha sa iyang agianan; giguba nila ang mga depensa ug wala mobulag sa linya. ⁹ Nagdali sila ngadto sa siyudad, nanagan sila padulong sa paril, nanaka sila sa kabalayan, ug nanglusot sila sa mga bintana sama sa mga kawatan. ¹⁰ Nauyog ang kalibotan sa ilang atubangan, nangurog ang kalangitan, mingitngit ang adlaw ug ang bulan, ug wala na misidlak ang mga bituon. ¹¹ Gipatugbaw ni Yahweh ang iyang tingog atubangan sa iyang kasundalohan, kay hilabihan kadaghan ang iyang mga manggugubat; kusgan sila, nga nagtuman sa iyang mga sugo. Kay ang adlaw ni Yahweh dako ug hilabihan ka makalilisang Kinsa man ang mabuhi niini? ¹² "Apan bisan karon," miingon si Yahweh, "Balik kanako uban sa tibuok ninyong kasingkasing. Pagpuasa, paghilak, ug pagbangotan." ¹³ Gisia ang inyong mga kasingkasing dili lamang ang inyong mga bisti, ug balik kang Yahweh nga inyong Dios. Kay siya matinabangon ug maluloy-on , dili daling masuko ug puno sa matinud-anong gugma, ug buot niya motalikod gikan sa pagpahamtang ug silot. ¹⁴ Kinsa ang nasayod? Tingali ug mobalik siya ug magbaton ug kaluoy, ug magbilin ug panalangin kaniya, usa ka halad nga trigo ug usa ka halad nga ilimnon alang kang Yahweh nga inyong Dios? ¹⁵ Patingoga ang trumpeta sa Zion, pagtawag ug balaang puasa, ug pagpatawag alang sa balaang panagtigom. ¹⁶ Tigoma ang katawhan, pagtawag ug balaang panagtigom. Tigoma ang mga kadagkoan, tigoma ang kabataan ug ang masuso nga mga bata. Tugoti ang pamanhonon nga mogawas sa ilang mga lawak, ug ang mga pangasaw-onon gikan sa ilang mga lawak. ¹⁷ Tugoti ang mga pari , ang mga sulugoon ni Yahweh, manghilak taliwala sa mga balkon ug sa halaran. Tugoti sila nga moingon, "Ipalingkawas ang imong katawhan, Yahweh, ug ayaw tugoti nga ang imong panulondon mahimong talamayon , nga ang mga nasod magbiay-biay kanila. Nganong moingon sila ngadto sa ubang mga nasod, 'Asa man ang ilang Dios?'" ¹⁸ Unya si Yahweh mabination sa iyang yuta ug naluoy sa iyang katawhan. ¹⁹ Mitubag si Yahweh sa iyang katawhan, "Tan-awa, padad-an ko kamo ug trigo, bag-ong bino, ug lana. Matagbaw kamo niini, ug dili ko na gayod tugotan nga maulawan kamo taliwala sa kanasoran. ²⁰ Papahawaon ko ang mga amihanan nga nag-ataki palayo kaninyo , ug abogon sila ngadto sa uga ug biniyaang yuta. Ang nag-una sa ilang kasundalohan moadto sa dagat nga anaa sa sidlakang bahin, ug ang naulahi moadto sa dagat nga anaa sa kasadpan. Moalisngaw ang baho niini." Sa pagkatinuod, nagbuhat siya ug dagkong mga butang. ²¹ Ayaw kahadlok, yuta, pagsadya ug paglipay, kay si Yahweh magbuhat ug dagkong mga butang. ²² Ayaw kahadlok, ihalas nga mananap sa kaumahan, kay motubo ang mga sibsibanan diha sa kamingawan, mamunga ang mga kahoy, ug maghatag ug abot niini ang mga kahoy nga igera ug mga paras. ²³ Pagsadya, katawhan sa Zion, ug paglipay diha kang Yahweh ang inyong Dios. Kay hatagan niya kamo ug ulan sa tinglagas sa tukmang panahon ug magdala ug ulan alang kaninyo, ang ulan sa tinglagas ug ang ulan sa tingpamulak sama kaniadto. ²⁴ Mapuno ug trigo ang mga giokanan, ug ang mga banga mag-awas ang bag-ong bino ug lana . ²⁵ "Ibalik ko kaninyo ang katuigan nga daghan ug abot diin gikaon sa panon sa mga dulon—ang labihan kadaghang dulon, ang manunukob nga dulon, ang manguguba nga dulon— ang akong kusgan nga kasundalohan akong ipadala kaninyo. ²⁶ Mokaon kamo ug daghan ug mangabusog, ug modayeg sa ngalan ni Yahweh nga inyong Dios, nga nagbuhat ug kahibulongan diha kaninyo, ug dili ko na gayod pakaulawan ang akong katawhan. ²⁷ Mahibaloan ninyo nga anaa ako sa Israel, ug ako si Yahweh nga inyong Dios, ug wala nay lain pa, ug dili ko na gayod pakaulawan ang akong katawhan. ²⁸ Ug mahitabo unya nga ibubo ko ang akong Espiritu sa tanang katawhan, ug ang inyong mga anak nga lalaki ug babaye managna . Ang inyong hamtong nga kalalakihan magdamho ug mga damgo, ug makakita ug mga panan-awon ang inyong batan-ong kalalakihan. ²⁹ Sa mga sulugoon ug mga babaye solugoon , niadtong mga adlawa ibubo ko ang akong Espiritu. ³⁰ Ipakita ko ang mga katingalahang butang diha sa kalangitan ug sa kalibotan, dugo, kalayo, ug mga haligi nga aso. ³¹ Mongitngit ang adlaw ug daw mahimong dugo ang bulan, sa dili pa moabot ang dako ug makalilisang nga adlaw ni Yahweh. ³² Ug mahitabo nga ang tanan nga motawag sa ngalan ni Yahweh maluwas. Kay anaa didto sa Bukid sa Zion ug sa Jerusalem kadtong nakaikyas, sumala sa gisulti ni Yahweh, ug uban sa mga naluwas, kadtong gitawag ni Yahweh.