¹ Abafalisi na balembi bamo bobakafuma mu Yerusalemubakiza bamuzyungulila u Yesu. ² Bakalinga ukuti bamo mu bamanyili bache bakulya ichakulya ninyobe izyaviko, kwambula kusukusula. ³ ( Abafalisi naba yuda bonsi batangalya ichakulya bobatasukuswile mu nyobe, chifukiwa bakusunga imiteto ya basongo babo. ⁴ Pala abafalisi bafuma kubuyo bwa pa maliketi batakulya mpaka boghe tasi po bande pakukola ukatundu yo bapokela, ngati abakomeji bakusukusulila, utusontha utwa kopa nivinji pakulya. ⁵ Abafalisi nabasimbi bakamulalusya u Yesu, '' choni cho abamanyili bako batakwenda mu ndondomeko ya miteto ya basongo, loli bakulya ichakulya kwambula ukusukusula mu nyobe?'' ⁶ U Yesu akabamula akati, u Yesaya akachima ivyabamiansi. Ngati movikalembekela, abanthu bakuntchindika bwaka na mazyu loli imyoyo yabo yili kubutali nune. ⁷ Ukwiputa kwabo kukwane kwa bwaka, nivi manyisyo vyo bakumanyisya vya miteto ya banthu. ⁸ Mukuleka indaghilo zya chala , mukukakatila imiteto ya banthu. ⁹ Akanena sona kukwabo akati, '' mahala buli gho mukubombela pakukana pakukana indaghilo zya chala ukuti musungenge yo miteto yinu! ¹⁰ U Mozesi akati, ''' Uchindike ubaba wako nu mama wako,'' sona wensi yo akutuka ubaba wache nu mama wache naloli abaghile ukufwa. ¹¹ Pala umunthu anena kwa wise na kwa mama wache, chonsi cho chingabavwa mwenelile kukwane we kolobani'''' ( kokuti chakumupa uchala'), ¹² kokuti mutakwitikizya ukuti umwene abombe chimo kwa baba wache na kwa mama wache. ¹³ Mukupangisya amazyu gha chala ukuba ghambula amaka chifukwa cha miteto yinu yo muyifisite pasi. Sona nivinthu ivyinji ivyakolana vyo mukubomba. ¹⁴ Akitizya sona abanthu abinji nukunena kukwabo, '' munivwisye mwebosi, nukiuteghelezya. ¹⁵ Kutaliko nakamo kokufuma kunzi kwa munthu kokangamunanga nanthi kakwingila mumwache. Loli vyovifuma mumunthu vyavikumunanga umunthu.'' ¹⁶ pala u munthu ali namakutu aghakwivwa, leke ivwe. ¹⁷ Bo u Yesu aleka abanthu abinji nukwinjila mnyumba, abamanyili bache bakamulalusya nizya chili. ¹⁸ U Yesu akati, ''muchili bwaka mutakwivwisya? mutakulinga ukuti chochingila mumunthu ukufuma kunzi chikumunanga, ¹⁹ chifukwa chitakuya mumoyo wache, loli chikuya munthumbo nukufuma kuchimbuzi?'' Namazyu agha u Yesu akasaya ichakulya chonsi. ²⁰ Akanena, chochikufuma mumunthu chocho chikumunanga umunthu. ²¹ Pakuti mu moyo momo mukufuma inyinong'ono izibibi ngati ubwamalaya, ubwiba, ukukoma, ²² ubwamasomaso, ukunyenywa, ububibi, ubumyasi, ubupopo, ibina, iliso ilibibi, amadinkho, ukwikwezya nukupusa. ²³ Vyonsi ivi vikufuma mukasi, sona vyovyo vikumunanga umunthu. ²⁴ Akamako kula nukuya ku chikaya cha Tire, na ku sidoni. akingila munyumba sona atakalonda nayumo, ukuti amanye ko ali, loli atakaba wakuti angavwama. ²⁵ Mwalubilo umwanakazi yo akaba nu mwana umusungu yo akakoliwa nu muzimu uwubibi akivwa ivya Yesu, akiza nukuwa muvinama vyache. ²⁶ Umwanakazi yula akaba mu Giriki mwina sirofenike. Akamulenga u Yesu ukuti afumyemo umuzimu umubibi mu mwana wache. ²⁷ Akanena nawe, '' muleke abana balye tasi. Pakuti techakwenelela ukusenda ichakulya cha mwana nukuzitayira imbwa.'' ²⁸ Akamwamula nukunena kukwache, mwene , momumo nimbwa zyope zili nu mtende mutebulo, zikulya utubululisya twa bana. '' ²⁹ Akamubuzya umwanakazi ukuti, chifukwa cha vyo wanena, wemusatuke pakubuka. u muzumu uwubibi wafumamo mumusungu. ³⁰ Akanyokela ku nyumba kwache nukwagha awonite pachitala, imizimu imibibi yikafuma. ³¹ Pala akabuka sona kuchigaba cha Tire, akenda mu sidoni ukuya ku nyanja ya Galileya mupaka kuchigaba cha Dekapolisi. ³² Bakiza nayumo kukwache yo atakivwanga sona akatamiwanga pakunena, batakamupempha ukuti abike inyobe papache. ³³ Bakamusendela kumbali ukufuma mubwinji bwa banthu mubufisamu akabika utusalala mumakutu ghache, akaswila amati nukukola ululimi lwache. ³⁴ Pala akalingisya kumwanya akisya umoyo, '' Efafata,'' kokuti iwuka!'' ³⁵ Aponyene amakutu ghache ghakiwuka, ululimi lwache lukasatuka, sona akanda pakunena akiza. ³⁶ UYesu akabasuyizya ukuti batakabuzye umunthu nayumo. Akati ababuzya abene bakanda pakunena ponsi. ³⁷ Bakaswigha nkhani bakanena bakati, abomba ivinthu akiza. Bobatakwivwa bakwivwa sona bo batakulinga bakulinga, nabakunena bope bakunena.