¹ Bo isiku lya sabata lyamala, u Maliya magadalena nu Maliya umama wa yakobe poka nu salome, bakawula amafuta nukubuka nagho ukuti baye bapakazye umubili wa Yesu. ² Pandabindabi nkhani mwisiku lya bwandilo mu sabata, bakabuka kwipumpha bo izuba lyafuma. ³ Bakanenezanianga, '' wewenu yo akuya pakutufumizya ibwe pa mulyango wipumpha.'' ⁴ Bobalinga kunthazi, bakagha ukuti ibwe bafumizyepo, pakuti ibwe likaba likulu hee. ⁵ Bakingila mwipumpha sona bakalinga umulumendo avwete imyenda imiswepu, ikalite kumbali iya ndyero po bakaswigha. ⁶ Akababuzya akati, mutakaswighe. Mukulonda u Yesu umu nazaleni yo bakamupamanthila. Azyukite! nayumo mumo. Linga pabuyo po bakamubika. ⁷ Loli buka, mubamanyisye abamanyili nu Petulosi, Inthi atanjilile kukwinu pakuya ku Galileya. Kula mukuya pakumulinga ngati mo akababuzizya. ⁸ Bakafuma panzi nukusamala ukufuma mwipumpha; bakatetemanga nukuswigha. Batakanena nachimo kubanthu chifukwa bakapasyanga nkhani. ⁹ Pandabindabi mwisiku lya bwandilo mwa sabata, bo azyuka akamubonekela tasi u Maliya magadalena, yuyo akamufumya imphepo imbibi seveni. ¹⁰ Akabuka nukubabuzya bo akaba nabo, bo bachili bakulila nukusyumula amasozi. ¹¹ Bakivwa ukuti azyukite sona amubonekile, loli batakasubalila. ¹² Bo vyabombwa ivi akabonekela sona umwakupambanapambana naku bamo babili bobakendanga ukwingila mu chikaya. ¹³ Bakabuka nukubabuzya abamanyili bobakasyala, loli batakabasubila. ¹⁴ Ukufuma apo u Yesu akababonekela ileveni bobikalite umwakuzyungulila itebulo, po akabasusya chifukwa cha kuleka ukwitikizya nukuwoma kwa myoyo yabo, chifukwa bakapotwa ukusubila bosi bobakamulinga bo azyuka ku bafwe. ¹⁵ Akanena nabo, '' Buka mu chisu chosi icha pansi, nukulumbilila amazyu kuvipeliwa vyonsi. ¹⁶ Yo akusubila nukoziwa azukupona, loli wensi yo atakusubila akwiza pakufundiwa. ¹⁷ Ivimanyisyo ivi vikuzukuba nababo bakusubila; Mwizina lyane bzukufumya imphepo inyali. Bazukunena ineno izipya. ¹⁸ Bakwiza ukukola injoka loli zitakuzukubaluma, nanthi bang'wa ivyakukoma batakwiza ukufwa, bazukubika inyobe pabalwale bazukupola. ¹⁹ Bo u Yesu anena nabo, akakwela kumwanya nukwikala kunyobe ya ndyero iya chala. ²⁰ Abamanyili bakabuka nukulumbilila paliponsi po u chala akabombanga nabo nukukwanilisya izyu mu viswigho vyo vikaba nabo.