¹ Aha tuvikitwe a bantu a ntumero, turukuruhite kwa Nyambe wetu kezina lya Jesu Kiresite o Nfumu wetu. ² Bakenisa eye, neswe nitwa wana entumero, kushuminina ku chishemo echi shetu zyimene kwacho mi tuli rumba ne nsepo ye nkanya ya Nyambe. ³ Mi kali zezizo vulyo, kono tushi voterwa muma mashando etu. Tuzyi ye mashando a goresa kutendereye kuvuso netuke tuhare nenja. ⁴ Mi okugora kureta oku sepahara, mi oku sepahara kureta ensepo. ⁵ Mi ensepo kaireti a maswavi, kevaka lyokutiye erato lya Nyambe nilya tiliwa mu myozyo yetu ko Ruho ru Chenete, oro nitwa hewa. ⁶ Mwi nako eyi kali katwina maanta, Jesu Kiresite mpaho nafwira kevaka lya bantu a vavi. ⁷ Mbukavavu hawa kufwira o muntu ozyu arukite, tema zyumunya awora vulyo kugoresa mozyo o muntu mmurotu. ⁸ Kono Nyambe nareta erato lyakwe kwetu, kono tushi panga ezibbi, mi Kiresite nafwa kevaka lyetu. ⁹ Mi aha shetu vikitwe avafu varukite ka maroha akwe, twara hazwa kwakwe kuvukali bwa Nyambe. ¹⁰ Mi nanga netuli zira zakwe, nitwa kwatirwa kwa Nyambe hahena harufu rwa mwane mi tushi zwira havuso ku kumbira oku kwatirwa mbotu hazwe hawa kuvuharo bwakwe. ¹¹ Mi kali zezizo vulyo, tuli temba aha nitwa boozwa kwakwe Nyambe kevaka lya Jesu Kiresite o Nfumu wetu. ¹² Mi kelilyo evaka ezibi niza kavira mufasi kevaka lyo muntu yenke, mi efu nilya kwana ku vantu vonshe tenda ezibbi. ¹³ Akuli o murawo neu shini kuvako, echibbi kukachina nekare mufasi, mi haazya kuli tavilira kuchibbi ni kwaazya o murawo. ¹⁴ Aha kwina vulyaho efu nilya vusa kutangisa kwa Adama kutwara kwa Mushe, mi nikwavo kali niva tenda ezibbi kevaka lya Adama ozyu na shotoka o murawo, mi ndeye kali chisupo chozyu akezya. ¹⁵ Kono echihewa kachiswani nokuli hitira vulyo. Shina mafosisa kevaka lyo kutiye o vungi bwa vantu nivafwa, kuhura kwi ku chishemo cha Nyambe ne chihewa ke chishemo cho muntu yenke, Jesu Kiresite, ezo niza kezyera a vantu vangi! ¹⁶ Mi echihewa kachifwani shina cho muntu ozyu atenda ezibbi, akuli o murandu o muntu yenke niwa retera enkaturo yokuha vangi o murandu, kono echihewa ye chishemo niyazwa ku mafosisa mangi, mi niya manina kuku tuvika a vantu varukite. ¹⁷ Akuli aho murandu o muntu yenke, efu nilya vusa ko muntu yenke, chaha ava va tambura chishemo muvunene bwacho, ne chihewa choku vikiwa ava varukite vara vusa muvuharo ko muntu yenke Jesu Kiresite. ¹⁸ Mi Cware o murando o muntu yenke, shina aha niwa retera vantu vangi enkaturo eyi cha vantu vonshe murandu, mi hape aha kwina vulyaho oku ruka ko muntu yenke noko nikwa retera vantu vonshe kuruka okuha o vuharo. ¹⁹ Akuli o vungi bwa bantu aha vatewa ye mbatendi ve chibbi, kevaka lyokusha shuwa ko muntu yenke, mi nekwina vulyaho oku ruka ko muntu yenke, noko nikwa vika vantu vangi oku ruka ko muntu yenke. ²⁰ O murawo niwa reta kute o kufosa kuhingihe, mi echibbi kachili chingi nekare, mi nechishemo choku vako chaha mani kuhitilira. ²¹ Mi nikwa tendahara vulyena ye, shina echibbi chivusa murufu, kavulyaho echishemo chiwora kuvusa noku vika a vantu varukite, ke mpuso yo vuharo obo kavumani ka Jesu Kiresite o Nfumu wetu.