¹ Paho shendi azyara ke baka lyangu ye kandi shi botere o kezya kwenu ke zintu zi kubaza. ² Ninda mi kubaza, ndini a wora o kundi temba mbita eye ozyu ninda remeka. ³ Ninda ñora bulyaho ninda tenda ye shake nendi kezye kwenu nendi reke oku remekwa kwaba ba botere oku ndiha mboterwa. Ndina ensepo kwenu mwenshe ye emboterwa yangu nje mboterwa yenu mwenshe. ⁴ Kakuli kandi mi ñorera nendizwa mu nkalirwa e nene, no kukubaza kumozyo, ni ke zinsozi e zingi. Kali kandi shaka o kumi shuwisa o kukubaza. Kunje yezo, ndi shake ye muzyibe o buzungi bwe rato eli ndina nelyo kwenu. ⁵ Ati zyumwi naareta o kukubaza, kali naka kureta kwangu bulyo, kono koku likanisa-kali ko kumirezeza-kwenu mwenshe. ⁶ Eyi e nkoto yozyu o muntu izwa ku cinalyanga i lingene. ⁷ Kabulyaho kunje ye nkoto, mumu kwatire nokumu shengashenga. Mutende bulyaho okuta ye asha remenwa ke nshoni e nene. ⁸ Paho ndimi goresa ye musunde e rato lyenu kwakwe. ⁹ Eli nde baka ninda mi ñorera, o kuta ye ndimi yereke no kuzyiba ye mu sepahara muzintu zonshe. ¹⁰ Ati nemu kwatira zyumwi, Neme mbondi kwatire ozyo muntu. Echi nda kwatili - Ati shinda kwatili echintu cha kwatirwa kevaka lyenu havuso bwa Kiresite. ¹¹ O kutaye Satani nareke okutu lyanganisa. Kakuli katu ruvite e mirero yakwe. ¹² O Nfumu nandi arwira echizyi aha ninda kezya ku mureneñi wa Turoasi kuku kutaza ko ezywi lya Kiresite. ¹³ Kakuli kali ninda wanako muyenzangu Tite. Mpaho shendi reka noku boora kwa Masedonia. ¹⁴ Kono buitumero vuve kwa Nyambe, ozyu atu hitire enako yonshe ka Kiresite. Ozyu a sunda o mununko o murotu woku muzyiva kwinokwi ketu. ¹⁵ Kakuli tuli mununko o murotu wa Kiresite kwa Nyambe, mukati kava niva hazwa no mukati kava vafwa vonshe. ¹⁶ Kubantu aba bafwa, mununko wuzwa kurufu kuya kurufu. Kwaba ba shi hazwa, mununko wuzwa ku buharo kuya ku buharo. Mi ndini ozyu a botere ezi zintu? ¹⁷ Kakuli katu fwani na bamwi a bangi aba ba wulisa e zywi lya Nyambe ke nkambikilwa. Kabulyaho, ko kucena kwa maikuto, tu amba ka kiresite shina aha nitwa tumiwa ne tuzwa kwa Nyambe, habuso bwa Nyambe.