¹ Aha ninda kezya kwenu, bayawe, Kali ninda kezya ke miambiro e mirotu kapa yo butali aha kandi kutaza eniti yi zikitwa kaza Nyambe. ² Kakuli kali kandi shaka o kuzyiva chimwi aha kandina mukati kenu mbwita Jesu Kiresite, mi ozyu naa kokoterwa. ³ Mi kandina nenwe muvufokoli, no muntiya nomu kututuma hawa. ⁴ Mi embuzi yangu ne nkutazo yangu kali kazili za mazywi a goresa o butali, muchivakachezo, kazina mu mitendo yo muzya niza manta. ⁵ O kutaye entumero yenu nayi reke o kuva mu manta a vantu, kono mu manta a Nyambe. ⁶ Hanu shetu amba o vutali kwava vazyi, kono kali mbutali bwelinu efasi nali bwa vavusi bayinu e nako, ava vahita. ⁷ Kunjeyezo, tuamba o butali bwa Nyambe mu niti yi zikitwa, o vutali vuzikitwa ovu naatanga o kutenda Nyambe enako nezi shini kuvako kevaka lye ntuvo yetu. ⁸ Kwaazya kuva vusi venako ava niva vushuwisisa, Kakuli nali niva vushuwisa kali nivana kokotera o Nfumu we Ntuvo. ⁹ Kono shina aha ku ñoretwa ye, kwaazya elinsho nilya vona, kwaazya o kutwi nikwa shuwa, kwaazya o mozyo o muntu niwa zi azyara, Nyambe ezi natendera ava vamushaka. ¹⁰ Kono Nyambe naatu vukwira ezi zintu ko Muzya. Kakuli o Muzya wu shakisisa zonshe ezintu, tara zintu za Nyambe zina ezi zungi. ¹¹ Kakuli ndini azyi ezi azyara zo muntu mbita o muzya wo muntu wina mwakwe? Mi kame mbo vulyaho, kwaazya ozyu azyi ezintu za Nyambe zi zunguhite mbwita o muzya wa Nyambe. ¹² Kono kali nitwa tambura o muzya we fasi kono Muzya ozyu azwa kwa Nyambe, o kutaye tuzyive ezintu ezi nitwa hewa vulyo kwa Nyambe. ¹³ Tu amba kezi zintu ka mazywi aa kali nitwa zyiyiswa ko vutali vo muntu kono ko muzya, owu wutoroka ezintu zo muzya ku vantu vo muzya. ¹⁴ O muntu a azya o muzya ka tambuli e zintu zo Muzya wa Nyambe, kakuli kwakwe nza vusiru. Kazi shuwisisi kakuli zi remuhiwa ko Muzya. ¹⁵ Ozyu ena o muzya a atura e zintu zonshe, kono eye a azya ku aturwa ku vamwinya. ¹⁶ "Kakuli ndini ozyu a awora oku zyiva echi a azyara Nyambe, o kutaye awore okumu raera?" Kono twina ezi azyara za Kiresite.