¹ Hanu ndimi kumburusa, vakwangu, ke zywi elyo ninda amba kwenu, elyo nimwa tambura mi mpaho muzyimene. ² Mi muhazwa keli zywi ati mukwatilira ko kugora kwi zywi ninda mi kutaza mbita ati mbulyo kamu zumina. ³ Kakuli ninda mi retera ze ntazi zo vutokwa ezo ninda hewa neme: okutiye Kiresite na fwira e zibbi zetu okuya kezi ziñoretwa mu mañoro, ⁴ okutiye naa zikiwa, mi na vuswa mwizyuva lyovu tatu kokuya ka mañoro. ⁵ Kiresite na vonahara mwa Kefasi, mi hape nokuve kumi nivo vire; ⁶ mi aka livonahaza ku vakwakwe vahitilira e myanda yi hura he anja mwi nako yoke. O vungi bwavo vashihara, kono vamwinya niva liraliza. ⁷ Mi aka livonahaza kwa Jakovo, nokuva apositora vonshe. ⁸ kumanikiza, na livonahaza kwangu, shina ku mudana na zarwa he nako kaivotere. ⁹ Kakuli ndili muchenya kuva aposotora. Kandi votere oku kuwiwa omu apositora kauli ninda sehekisa e nkereke ya Nyambe. ¹⁰ Kono ke cishemo ca Nyambe ndili vulyahi ndina, mi e cishemo chakwe kwangu kali kacili cavulyo. Kono, ninda vereka chaha kuhita vonshe. Kavulyaho kali kayili me, kon nchishemi cha Nyambe eco cina kwangu. ¹¹ Kavulyaho ati ndime kapa mbavo, nitwa kutaza nimwa zumina. ¹² Hanu ati Kiresite na kutazwa vulyaho na vuswa ku vafu, mbuti bamwi kwenu aho mutiye kwaazya o kuvuka kwa vafu? ¹³ Kono haiva kwaazya o kuvuka kwa vafu, nanga Kiresite neye kali na vuswa. ¹⁴ Hape haiva Kiresite kali navuswa, oku kutaza kwetu nkwavulyo he, mi ne ntumero yenu njavulyo nezo. ¹⁵ Kame, tuwaniwa o kutaye tupaka o kayama kuamana ne Nyambe, kakuli nitwa amba kutiye Nyambe na vusa Kiresite ku vafu. Kono kali na muvusa, haiva keniti a vufu kava vuswa. ¹⁶ Cware haiva a vafu kava vuswa, nanga Kiresite kali na vuswa; ¹⁷ mi haiva Kiresite kali na vuswa, e ntumero yenu njavulyo mi mushina muzibbi zenu. ¹⁸ Mi avo niva fwira kwa Kiresite niva lifwira. ¹⁹ Nali movunu vuharo tusepa kwa Kiresite, kuvantu vonshe nali netu fwirwa enshe hawa. ²⁰ Kono hanu Kiresite na vuswa ku vafu ke siyango ze ntanzi yavo varere. ²¹ Shina o rufu aho nirwa kezya ko muntu, hape o kuvuka kwa vafu nikwa kezya ko muntu. ²² Shinaha kutiye ka Adama vonshe nivafwa, mi hape vena kwa Kiresite nivara tendwa kuhara. ²³ Kono neni neni komo ku votere: Kiresite echi yango che ntanzi, cware avo vawira kwa Kiresite nivara vuswa muku kezya kwakwe. ²⁴ Irava ma manikizo, aha Kiresite shaka nahe o muvuso kwa Nyambe Eshi. Aha mpaha shake na manise o kuvusa konshe ne mirawo na manta. ²⁵ Kavulyaho mbwa kare mbita shaka na vike ezira zakwe kwinshi ya matende akwe. ²⁶ Echira cha maninikizo kuku sinywa ndufu. ²⁷ Kakuli ''navika e zintu zonshe mwinshi ya matende akwe.'' Kono aha kutiye ''navika e zintu zonshe,'' kuchenete kutaye eyi kayi shangani nozyo avika e zintu zonshe mwinshi yakwe. ²⁸ Ati ezintu zonshe zi vikiwa mwinshi yakwe, aho mwana ye mwini narava entuto mwinshi yozyo avika e zintu zonshe mwi nkotera yakwe. Ezi nazira tendahara o kutaye Nyambe Shwetu nave monshe-monshe. ²⁹ Kapa he avo niva korobezwa ka vafu nzinji niva tende? Ati a vafu kali niva vuswa, nchinji aho va korovezwa kavo? ³⁰ Cware nchinji aho tushina mu vukavavu enako yonshe? ³¹ Ndifwa ezyuva ne zyuva! Eyi nje niti mbwee kuli tuta kwangu kwenu, oko ndikwesi kwa Kiresite Jesu o Nfumu wetu. ³² Nzinji ndiwana mo, komo a vonera o muntu, ati ninda rwa ne zipau kwa Efesusi, ati a vafu kava vuswa? ''Tulye no kunywa, kakuli zyona tufwa.'' ³³ Mwasha homiwa: ''O vushere o vubbi chishiya e mikwa e mirotu.'' ³⁴ Mutonde kwiwiru! Muhare ne muchenete! mwasha zwili havuso ne mutende e chibbi. Kakuli vamwi kwenu vaazya kuzyi Nyambe. Ndiambe zika maswavisa enu. ³⁵ Kono zyumwi nara taye, ''A vafumbuti va vuswa, mi muvili wo mufuta nji shaka niva kezye nowo?'' ³⁶ Ewe chihafu! Echo a byara kali nechi hare mbita hachisi fwa. ³⁷ Echo o kuna kali ngo muvili ne uve ko, kono ndutanga vulyo. I wora kuva o vurotu kapa chingi vulyo. ³⁸ Kono Nyambe nara chiva o muvili omo a shakira, hape rutanga no rutanga no muvili waro. ³⁹ Kali nji nyama yonshe yi swana. Kono, kwina e nyama yonke ya vantu, ne yimunya nyama ye zipau, yimwi nyama nje zizyuni, yimwi nje nswi. ⁴⁰ Kwina hape e mivili ye wiru ne mivili ya hanshi. Kono e tuvo lyo muvili we wiru mufuta wonke ne tuvo lya wa hanshi ngungi. ⁴¹ Kwina e tuvo lyonke lye zyuva, ne lyimwi tuvo lye ntungwezi. Kakuli o rutungwezi ronke ru chinchina kwa rumwi ru tungwezi mwi tuvo. ⁴² Cware mbulyaho noku kuvuka kwa vafu. Echochi chikunwa chifwa, hape echo chi vuswa ka chifwi. ⁴³ Chi kunwa mu kusha kutekwa; chi vuswa mwi tuvo chi kunwa mu vufokoli; chi vuswa mwi ngamu. ⁴⁴ Chi byalitwa o muvili vulyo; chi vuswa ko muvili wo ruho ro muvili. Ati kwina o muvili wa vulyo, kwina hape o muvili wo muzya wo muvili. ⁴⁵ Vulyaho ku ñoretwa hape, ''O muntu we ntanzi Adama nava o muzya uhara.'' Adama wa mamanikizo nava o ruho ruha o vuharo. ⁴⁶ Kono e chimoya kali nicha kezya sapili kono mu vuntu, mi nokuya mu chimoya. ⁴⁷ O muntu we ntanzi ngwa hanshi, na tendwa he dudusa. O muntu wo vuveli azwa kwiwiru. ⁴⁸ Shina vulyaho azwa he dudusa mbunti ena, mbulyaho navo niva tendwa he dudusa, mi no muntu wo kuwiru vuti a fwana, mbulyaho shina mbababo vazwa kuwiru. ⁴⁹ Shina vuti twina mu chivumbwa cho muntu we dudusa, turava vulyaho mu chivumbwa cho muntu we wiru. ⁵⁰ Hanu zinu ndiamba, vakwangu, ye enyama na maroha kali nezi hinde o muvuso wa Nyambe. Nanga zifwa kali nezive ezo kazimani. ⁵¹ Muvone! Ndimi sumwina eniti izikitwa: kali netu fwe twenshe, kono natura zorwa. ⁵² Netura zorwa mwinako enini, muku koha kwe linsho, mwi ntorombita yama manikizo. Kakuli e ntorombita yara lira mi a vafu vara vuswa ni vaazya kushinyehete, mi natura zorwa. ⁵³ Kakuli eyi mivili yi vora yi votere kuzwata eyo kayi voli mi eyi yifwa yi zwata eyo kayifwi. ⁵⁴ Kono owu muvili wu vora shaka newu zwate owo kawu shinyehi, hape o muvili wufwa shaka newu zwate o muvili ka wufwi, cware nekura kezya e ciyambo ciñotwa, ''O rufu ru miniwa muku komwa.'' ⁵⁵ ''Rufu, oku koma kwako kwi? Rufu, a mashumino ako ngaye?'' ⁵⁶ A mashumino o rufu nzibbi, mi e manta e cibbi murawo. ⁵⁷ Kono kuli tumera kwa Nyambe, ozyo atuha o kukoma ka Nfumwetu Jesu Kiresite! ⁵⁸ Kavulyaho, vakwangu, mugore mi mwasha shuniswa. Chikalira mulivike mu mutendo wo Nfumu, kakuli muzyi ye o mutendo wenu ku Nfumu kali ngwa vulyo.