¹ Muve aba va ndiyerekeza, shina eme aha ndiyerekeza Kiresite. ² Hanu ndimi temba kakuli mundi azyara muzintu zonshe. Ndimi temba kakuli mukwatise kokugora kwezi ninda mi sumwina bulyaho ninda zimita. ³ Hanu ndishaka ye mushuwisise ye Kiresite ngo mutwi wo mukwame no mukwame, ye o mukwame ngo mutwi o mukentu, ne Nyambe ye ngo mutwi wa Kiresite. ⁴ Hangani o mukwame ozyu a rapera kapa ozyo a porofita na vwikilire o mutwi wakwe a shwahura o mutwi wakwe. ⁵ Kono hangani o mukentu ozyu a raperanga kapa o kuporofita o mutwi wakwe nowu azya ku vwikilirwa a shwahura o mutwi wakwe. Kakuli cintu conke shina o mutwi wakwe niwa kururwa. ⁶ Kakuli ati o mukentu kana vwiki o mutwi wakwe, shabotere oku kurura enshuki zakwe zi fwihimpe. Ati kashwahu o mukentu o ku koshaura e nshuki zakwe, kapa oku kurura o mutwi wakwe, a vwike o mutwi wakwe. ⁷ Kakuli o mukwame ka botere oku bona o mutwi wa vwikilirwa, shina aha ali ciswaniso ne ntubo ya Nyambe. Kono o mukentu nji ntubo yo mukwame. ⁸ Kakuli o mukwame kali na tendiwa o kuzwa ha mukentu. Kunje yo bulyaho, o mukentu naa tendwa na zwa ha mukwame. ⁹ Kakuli o mukwame kali na bumbirwa o mukentu. Kunje yezo, mukentu na bumbirwa o mukwame. ¹⁰ Ndibaka elyo mukentu aha a botere okuba ne cisupo ca manta o ku mutwi wakwe, kebaka lya mangiroyi. ¹¹ Nanga kube bulyaho, ku nfumu, o mukentu a azya kurukuruhite okuzwa ku mukwame, kapa o mukwame kurukuruha o kuzwa ku mukentu. ¹² Kakuli shina o mukentu aha azwa ha mukwame, mbo bulyaho ku tendahara ye o mukwame a zalwa ku mukentu. Mi zonshe e zintu zizwa kwa Nyambe. ¹³ Muli ature mubeni. Ati kubotere ye o mukentu a rapere kwa Nyambe o mutwi wakwe no wa zya ku vwikitwa? ¹⁴ Tara cibumbwa-Nyambe eco cini ca azya ku mi shonga ya ati o mukwame a kwesi enshuki ende, kashwahu kwakwe? ¹⁵ Kanti e zibumbwabantu za Nyambe zaazya kumi shonga ye ati o mukentu ne na enshuki ende, nje ntubo yakwe? Kakuli na a hewa e nshuki ye zi mu vwike. ¹⁶ Kono ati kwina zyumwi a shaka oku kakana ke zi, katu shina cimwi eci shetu wora oku tenda, kapa a makereke a Nyambe. ¹⁷ Kono mu ntayero zi cilira, kandimi tembi. Kakuli kuti mushangana hantu honke, kali ke zirotu kono ke zibbi. ¹⁸ Kakuli mu cibaka ca matatikiro, ndi shuwa ya kuti mukezya kushangana mu nkereke, kwina o ku kauhana mukati kenu, mi hamwi ndizi zumina. ¹⁹ Kakuli kubotere nokuba nokusa shuwana mukati kenu, o kuta ye aba shibana zyibahali ba li bonahaze mukati kenu. ²⁰ Kakuli aha mushangana hantu honke, kali muraliro wo nfumu mu lya? ²¹ Ati mulya muntu no muntu a li lira e zilyo zakwe bamwi ni ba shini o kulya zabo. Zyumwi a fwite enjara, mi zyumwi na dakwa. ²² Kanti mwaazya a mazyuwo wo kulira no ku nywina mwawo? Kushwahura mushwahura e nkereke ya Nyambe no ku swabisa a ba baazya cimwi? Cinji kandi mite? Ani ndi mi tembe? Kali ndi mi tembe kezi! ²³ Kakuli eci ni nda tambura ku nfumu nceco shinda tambiki kwenu neme, ye onfumu Jesu, a masiku aa na betekiwa, na hinda e cinkwa. ²⁴ Aha shamana okuha o buitumero, a ku cicamaura no kuta ye, ''Owu ngo mubili wangu, owu u hewa kwenu. Mutende eci ye mwaku ndi azyara.'' ²⁵ Aha shekumana o muraliro, ko mukwa wu swanaa kuhinda e nkomoki, mi a kuta ye, ''Eyi nkomoki mbushere o buya mu maroha angu, mwaku tendanga bulyaho ke nako ne nako kuti munywina mo, ye mundi azyare.'' ²⁶ Kakuli e nako yonshe eyi mulya eci cinkwa no kunywa mweyi e nkomoki, mbu mwa ku amba o rufu ro nfumu mani na ka boore. ²⁸ Mi mpaho he, yenshe, ozyu shake a kulyanga e chinkwa kapa o kunywanga mu nkomoki yo Nfumu ko mukwa owu kawu votere narava no murandu wo muvili na maroha wo Nfumu. ²⁷ O muntu aki tatuve ye mwini tango keyo enjira shawora o kulya echinkwa noku nywa munkomoki. ²⁹ Kakuli ozyu alya noku nywa ati ka remuhi o muvili wo Nfumu aki lira noku kinywina enkaturo ye mwini. ³⁰ Kanti shira o vungi bwa vamwi va mukati kenu shiva fokora no kurwara, mi vamwi shivana kifwira. ³¹ Kono ati netu kitatuva tuveni, kali netu aturwa. ³² Kono ati netu aturwa ku Nfumu, tukalimerwa kwakwe, o kutaye netu reke okunyansiwa hantu honke ne fasi. ³³ Mpaho, vayawe, kuti shemu shangana hantu honke ye mulye, muki lindire. ³⁴ Ati zyumwi na fwite enjara, a kalye ku munzi, ye ati shemu shangana mwenshe ne kureke kuva kwe nkaturo. Mi kazimwi ezintu nimwa ñora, Nendira misumwina entendero shake nendi kezye.