¹ Exe Yesu lo oxo enɛ lɛ tɛtɛ o godo ɔ, e lɔ na e ahwanvu lɛ fan: ² "Mi ny fan tintɔn wenya e oxwe lɔ kpo azan otɔn, keŋu e mɔ jo nyɔ Gbɛtɔ vi lɔ do na gbɛtɔ lɛ, nɛ e mɔ ka-un do akluzu ji." ³ Gan enɛ mɛ ɔ, vɔsanu-xwlemawutɔ ga lɛ gɔ tomɛxo lɛ kple do vɔsanu-xwlemawutɔ ga gbo Kayifu xwɛ, ⁴ mɔ ɖe gbeta tɛn, kɛn e la bay ɖo ma tɛn kpego mɔ wli Yesu, mɔ hu-i, gbɛ mɛti go na mɔ kunnu jɛ ego. ⁵ E mɔ nɔ lɔ ɖe eɖe lɛ mɛ fan: "Mi o kpego a wli ɖe oxwe lɔ e ganmɛ e, ma nɛɔ, togun lɔ la fɔn gu." ⁶ Yesu mɔ we ɖe Betani, ɖo Sinmɔ exe mɔ jɛ gudu kpɔn e xwe. ⁷ Nyɔsi nɛhwlɛn gogowi, mɔ hɛn celu xɔ xwa do go lokpo mɛ; go enɛɔ, ekpɛn oxo e ylɔ fan alubatlu ɔ eyi ekɔ lo bay. E kɔn celu ɔ do takun na Yesu gan exe mɛ e nɔ ɖunuɔ. ⁸ Exe ahwanvu yesu etɔn lɛ mɔ etɔnɛ ɔ, e vɛ ɖe ego tete, e mɔ jɛ lilɔ ji fan: "inu hɛn gu loun kɔ owa enɛ? ⁹ E la mɔ sa celu ɔ lo sa ixwa susu, mɔ ma na wamamɔnɔ lɛ." ¹⁰ Exe Yesu nyɔ onu exe ahwanvu lɛ nɔ lɔ ɔ, e lɔ nɛ fan: A mu e tagba mi nɔ do na nyɔsi exe lɔ? Nu mɛmɛyi eyi e bay na. ¹¹ Miye lɛ gɔ wamamɔnɔ lɛ ɖe kpɔɛ tɛgbɛ, keŋu mi hɛn ɔ, mi la wa ɖagbe nɛ gan tɛtɛ mɛ. Vɔ, nyɔ go ɖe gɔ mi tɛgbɛ e. ¹² Celu enɛ exe e kɔn do ungo ɔ, xun agbaza e nɔ jlaɖo ɖ'awan na gan exe mɛ e la ɖi-u. ¹³ Na lɔ xonugbo na mi: Xi lele kpokpwe exe e la jla ɛwɛn ɖagbe exe zɔn tɛtɛ ɔ, e la nɔ lɔ inu exe nyɔsi exe wa ɔ e xo, mɔ lo nɔ flin na. ¹⁴ Enɛ godo ɔ, emɛ exe nyi Juda isikalyɔti ɖe ahwanvu Yesu etɔn owi-owe lɔ lɛ mɛ ɔ, la mɔ vɔsanu-xwlemawutɔga lɛ, ¹⁵ mɔ lɔ nɛ fan: "Amu mi la naun, nɛ a jo Yesu na mi?" Keun e mɔ sui kpatagan xwa ogban (30). ¹⁶ Bɛ ɖe gan enɛ mɛ ɔ, Judasi jɛ ganmɛ exe la jɔhun ni, e mɔ jo Yesu nɛ ɔ din ji. ¹⁷ Gan exe mɛ e ɖu kpɔnnɔ xuxu exe mɛ e go do lofin fɔn nu ɔ e xwezan tantɛ atɛn ɔ wa ɔ, ahwanvu Yesu etɔn lɛ gogo wi, mɔ kɛnse fan: " Xɛ o nɔ din fan a mi lɛ ɖa tintɔn we nya lɔ e oxwe e nuɖuɖu ɖe nɛ?" ¹⁸ Yesu mɔ yi gbe nɛ fan nɛ sɔn toxo ɔ mɛ, ɖe emɛ etɔn xwɛ, mɔ lɔ ni fan: " cica fan: Un gan mɔ na xo; i osinmɛ eyi nyɔ gɔ un ahwanvu lɛ la ɖu tintɔnwenya e xwe lɔ ɖe." ¹⁹ Ahwaanvu ɔ lɛ mɔ lɛ bay onu exe Yesu lɔ nɛ ɔ, mɔ ɖa tintɔnwenya exwe enuɖuɖu ɔ ɖe xinnɛ. ²⁰ Exe hwedo waɔ, Yesu gɔ e ahwanvu owi-owe lɛ sin-nɔ awan, mɔ jɛ nuu ji. ²¹ Gan exe mɛ e nɔ du nu ɔ, e fan: « Na lɔ na mi ɖe xonugbo mɛ ɔ, ɛmɛ lokpo ɖe mi mɛ, mɔ na ze un na.» ²² Exe e ahwanvu lɛ se ixo enɛ ɔ, wu kui tete, emɛ lokpo-lokpo mɔ kɛnse fan: «Nyɔnɛ Aklunɔ?» ²³ E mɔ yi gbe fan: « Emɛ exe nɔ ɖu nu gɔ do ɖe gannu ɖokpo mɛ ɔ, eyi nɛ. ²⁴ Gbɛtɔviɔ la sɔn jihwle ɖi kɛn e wlan dego ɖo ɔ. Vɔ, takun nyinyla na emɛ xe la sɛ ɔ! E nyɔ na emɛ enɛ fan e ma jɔ e.» ²⁵ Juda exe nɔ din a sɛ ɔ, fan: « Aklunɔ, nyɔ nɛ?» E mɔ yi gbe ni fan: « E yɔ tete e lɔ etɔnɛ.» ²⁶ Exe e nyi fan e nɔ ɖu nu nɛ ɔ, Yesu yi kpɔnnɔ, mɔ do acɛ e ji, mɔ kɛn. e mɔ na e ahwanvu lɛ: « Mi yi mɔ ɖu. Un agbaza we.» ²⁷ E ze kɔfu lokpo keun vɛn mɔ ɖe emɛ e mɔ ze nɛ fan: « Mi yi mɔ nu ɖe miɖe lɛ mɛ; ²⁸ ɖo un hun nɛ, ihunexe Mawu lo yi okɔjijɛ e ofɔ dote ɔ nɛ. E yi e kɔn do awan ɖe gbɛtɔ susu e takun, na ehwɛ i kɛ emɛ. ²⁹ Na lɔ xonugbo na mi: Bɛ ɖe egbe ɔ, go na gɔ nu vɛn exe ti gbɔɔn lɔ jɛ gan exe mɛ nyɔ gɔ mi a gɔ we nu yɔyɔ ɖe xɔluɖuto Untɔ etɔn mɛ. ³⁰ Enɛ ɔ e godo ɔ, ye ji ixwe lɔ e han lɛ, mɔ sɔn olivu e so ji. ³¹ Enɛ ɔ, Yesu lɔ na e ahwanvu lɛ fan: Mi mɛ tɛtɛ e la si mɔ jo un do ɖe ozan exe mɛ. Ɖo e mɔ wlan do Mawuxo wema mɛ fan: La hu lɛngbɔnyitɔ lɔ, keun lɛngbɔ lɛ tɛtɛ mɔ gbado. ³² Vɔ gan exe mɛ Mawu la fɔn un ɖe ku e godo ɔ, la jɛ unkɔn na mi lo sɔn Galile. ³³ Piyɛ mɔ xo mɔ lɔ na Yesu fan: " Nɛ ɛmɛ ɖe lɛ tɛtɛ tan lɛ mɔ jo e do ɔ, nyɔ go na jo e do gble. " ³⁴ Yesu mɔ lɔ ni fan: Na lɔ xonugbo nɛ, ɖe ozan exe mɛ tɛn ɔ, feto koklo la kɔ akɔ ɔ, o la mɔ gbɛɔ otɔn fan eyɛ go nyɔ un e." ³⁵ Piyɛ mɔ gɔ yi oxo fan: E byɔ fan na sɔn oku gɔɖe ɔ, go na gbɛ gble fan go nyɔ-ɛ le." Ke un ahwanvu ɖe tɔ lɛ fe mɔ lɔ ixo ɖokpo ɔ. ³⁶ Enɛ godo ɔ, Yesu ɔ e ahwanvu lɛ we sɔn tɛxo exe e yɔ fan Jɛsitemani ɔ, ke un e mɔ lɔ na e ahwanvu lɛ fan: Mi sin-nɔ xie, nɛ a sɔn xinɛ hlan mɔ la xoɖe mɔ wa." ³⁷ E mɔ kplan Piyɛ zebede e vikpɛ owe lɛ, ke un wu mɔ jɛ kukui ji, ke un ado mɔ jɛ huhui ji. ³⁸ E mɔ lɔ nɛ fan: "Alwɛ exe dɔn emɛ lɔ sɔn ku ɔ, emɛ i ɖe; Mi nɔ xiye, mɔ xo ɛɖɛ gɔdo do un." ³⁹ Exe Yesu lɔ etɔnɛ nɛ ɔ, e sɛ lo sɔn ŋukɔn vi le, mɔ cɔn okun-do, mɔ jɛ eɖɛ xo ji fan: " Untɔ, nɛ onu la tɛn kpego mɔ nyi etɔnɛ ɔ, bay na a gɔn vivɛ sise e kɔfo exe nu gbɛn. Vɔ, ni ma nyi un jlo e, vɔ ni nyi i jlo." ⁴⁰ Enɛ godo ɔ, Yesu lɛkɔ lo wa e ahwanvu lɛ kɛ, mɔ mɔ-ɛ ɖe owlɔn mɛ, mɔ lɔ na Piyɛ fan: "Mi o kpego la nɔ ŋukle gɔdo na ganxixo lokpo vɔvɔ? ⁴¹ Mi nɔ unkle mɔ xo eɖɛ, mɔ we jɛ tintɛnkpɔn mɛ e; ɖo gbɛtɔ ɖo ejlo mɛmɛyi, vɔ e agbaza o ɖo ogbɔ lele e." ⁴² Yesu mɔ gɔ jo e do jɔ owegɔ, mɔ la xoɖe fan: "Untɔ, nɛ vivɛ kɔfo exe o kpego zɔn un go, ke un i mɔ gbɛ nunu e jɛn-nɛ e le ɔ, i jlo ni nyi wiwa." ⁴³ Enɛ godo ɔ, Yesu gɔ lɛkɔ lo wa, e ahwanvu lɛ kɛ, mɔ gɔ mɔ-ɛ ɖe owlɔn mɛ, ɖo e okun tɛtɛ bi kpɛn. ⁴⁴ Yesu mɔ jo e do mɔ sɛ lo sɔn zɔga mɔ lɛ xo eɖɛ jɔ otɔngɔ, mɔ gɔ vɔ inu lokpo ɔ lɔ. ⁴⁵ Enɛ ɔ godo ɔ, e gɔ lɛkɔ lo wa e ahwanvu lɛ kɛ, mɔ lɔ nɛ fan: " Mi kpo nɔ dɔ owlɔn, mɔ nɔ gbɔjwɛ? Gan exe mɛ e la lɛ jo nyɔ Gbɛtɔviɔ do ehwɛhutɔ lɛ e olɔ mɛ ɔ, we mɔ xo we. ⁴⁶ Mi mɔ cite a mi lɛ. Mi kpɔn: Emɛ exe nɔ kɔ un na ɔ we mɔ gogo we." ⁴⁷ Etɔnɛ Yesu nɔ lɔ kɛɖɛ kle un emɛ exe nyi JUdasi ɖe e ahwanvu owi-owe lɛ mɛ we tɔn; emɛ susu nɛhwlɛn lɛ jɛ egun, mɔ hɛn eji gɔ ekpo, vɔsanu-xwlemawutɔga lɛ gɔ tomɛxolɛ e yi e ɖɔo lo hlan. ⁴⁸ Judasi exe nɔ sɛ ɖu ɔ, mɔ na kpɔwɛ exe wu-i fan: " Emɛ exe la kisi na ɔ nɛ, mi wli." ⁴⁹ Exe e lo wa ɔ, Judasi sɛ lo wa Yesu kɛ trolo, fan: " I do gbe nɛ cica!" Mɔ kisi ni. ⁵⁰ Yesu mɔ lɔ ni fan: " Hwannyi wa inu exe gbe owa ɔ. Keun mɛ lɛ mɔ zɔn Yesu ji, mɔ wli. ⁵¹ Emɛ exe ɖekpɔ ɛ gɔ Yesu lɛ lokpo mɔ ɖe olɔ, mɔ sun eji, mɔ xu vɔsanu-xwlemawutɔ igbo ɔ, e mɛsɛntɔ mɔ kpa oto ni. ⁵² Yesu mɔ yi gbe ni fan: " Ko i ji do e tɛnxwe. Ɖo emɛ exe kɔ iji lɔ fun ahwan ɔ, iji e ku eyi eku. ⁵³ Hun, o ɖi fan i hɛn ɔ, la lɔ na Untɔ, keun e mɔ ɖo wɛnzangun e ahwan ha tobu-tobu donu owi-owe jɛ eji lo hlan trolo tɛn? ⁵⁴ Nɛ i bay etɔnɛ ɔ, amu kɛn ixo exe e mɔ lɔ, mɔ wlan do Mawuxo e wema mɛ ɖ'awan ɔ la jɔ ɖo? ⁵⁵ Enɛ godo ɔ, Yesu lɔ na ahwan lɔ fan: " Ajotɔ axansu xo eyi e wa un, keun mi mɔ hɛn iji gɔ kpo, mɔ na we wle un? Okunkɛngbe-okunkɛngbe eyi i nɔ mi cɛncɛn, mɔ nɔ inu kplɔn emɛtɔn ɖe sinsɛnxo mɛ, co mi go wli un e. ⁵⁶ Vɔ, inu enɛ lɛ tɛtɛ jɔ, nɛ ixo exe Mawu mɔ lɔ zɔn gbeyilɔ etɔn lɛ ji, keun e mɔ wlan do Mawuxo e wema mɛ ɔ la lo jɔ." Ahwanvu Yesu etɔn tɛtɛ mɔ jo e do mɔ si. ⁵⁷ Emɛ exe wli Yesu lɛ kplɛn lo sɔn vɔsanu-xwlemawutɔga gbo Kayifu xwɛ, ɖe xie esɛnkplan-emɛtɔlɛ gɔ tomɛxo lɛ kpli ɖe ɔ. ⁵⁸ Piyɛ mɔ jɛ Yesu gun, vɔ e go lɔn mɔ gogo wi e; e nɔ zɔga ni gbɔɔn lo sɔn vɔsanu-xwlemawutɔ gbo lɔ xwɛ, mɔ la sin nɔ ɛmɛsɛtɔ lɛ kɛ, mɔ tɛn kpego lɔ mɔ kɛn inu lɛ la jɔ ɖo ɔ. ⁵⁹ Vɔsanu-xwlemawutɔ lɛ gɔ ye mɛ exe mɔ ɖe toxo ha mɛ lɛ tɛtɛ mɔ ɖe emɛ exe la kunnu ogɔ na Yesu ɔ, keun e mɔ tɛn kpego lo do ku hwɛ ni ɔ din tɔn. ⁶⁰ Emɛ susu mɔ ɖe kunnu ogɔ ni; vɔ ixo exe elɔ kpe, keun e mɔ do ikuhwɛ ni-i. Zɔn godo tɛtɛ ɔ, emɛ owe nɛhwlɛn lɛ we tɔn, ⁶¹ mɔ lɔ fan: " Dahwe exe fan: I hɛn ɔ, la gba sinsɛnxo Mawu etɔn lɔ, mɔ yi azan otɔn ɖo te mɔ vɔ i bu tun." ⁶² Vɔsanu-xwlemawutɔgbo ɔ mɔ cite, mɔ kɛn se fan: " Inu exe kunnuɖetɔ enɛ lɛ lɔ do i go ɔ we nɛ, o ɖo ixo lele d'ego?" ⁶³ Yesu mɔ bɔnu d'emɛ ni-i, vɔsanu-xwlemawutɔgbo ɔ mɔ lɔ ni-i fan: " Ɖe Mawu gbɛgbɛ lɔ e ikɔ mɛ ɔ, nɛ oyɔ e wa Klisu, Mawu e vi xonugbo ɔ, lɔ na mi." ⁶⁴ Yesu mɔ yi gbe ni-i fan: " Oyɔ e lɔ etɔnɛ, vɔ, gɔ nɔ lɔ na mi fan: Bɛ ɖe tɛn ɔ, mi la mɔ nyɔ Gbɛtɔvi lɔ ɖe awansinnɔ ɖe Mawu nutɛtɛgokpetɔ e dusilɔ ji; mi la gɔ mɔ un, mɔ lɛ ɖe jihwe mɔ zwan ɖe akpɔkpɔ ji." ⁶⁵ Exe vɔsanu-xwlemawutɔgbo ɔ se ixo enɛ ɔ, e vun awo do kɔ na eɖe, mɔ lɔ fan: " E nyla nugbɛn do Mawu go! Kunnuɖetɔ lounkɔ mi mi gɔ nɔ din? Miyɛ telɛ mɔ se kɛn e nyla nugbɛn do Mawu ɖo ɔ. ⁶⁶ Amu mi bu d'ego? E mɔ yi gbe ni-i fan: "Inu eyi e wa gbɔ e mɔ ɖo la hu-i! ⁶⁷ Exe e lɔ etɔnɛ ɔ, e jɛ atan tun do okunmɛ ni-i ji, mɔ jɛ inu viɛ ji. Mɛnɛhwlɛn lɛ xo tomɛ ni-i, ⁶⁸ mɔ lɔ ni-i fan: Klisu mɔ lɔ emɛ exe xo e tɛn ɔ na mi a mi kpɔn." ⁶⁹ Gan enɛ mɛ ɔ, Piyɛ ɖe awan sinnɔ ɖe geji ɖe esin lɔ mɛ. Vɔsanu-xwlemawtɔgbo ɔ e nyɔsi lokpo gogo wi, mɔ lɔ ni-i fan: " Oyɔ fe mɔɔ wa ahwanvu Yesu Galilenu etɔn kpɔn." ⁷⁰ Vɔ, Piyɛ gbɛ ɖe emɛ exe ɖe xinnɛ lɛ tɛtɛ e kunmɛ, mɔ lɔ fan: " I go mɔ okunnu jɛ ixo exe o nɔ lɔ go e." ⁷¹ Exe Piyɛ yan kpɔn hɔntogbo ɔ e ŋukɔn ɔ, emɛsɛntɔ nyɔsi bu mɔ ɛ mɔ lɔ na emɛ exe ɖe xinnɛ lɛ fan: " Emɛ exe mɔ nyi ahwanvu Yesu Nazalɛtinu ɔ etɔn kpɔn." ⁷² Piyɛ mɔ gbɛ gbɔɔn, mɔ tanu d'eji, fan: " Go nyɔ dahwe enɛ e." ⁷³ E la nɔ zan ɔ, emɛ exe ɖe xinnɛ lɛ gogo Piyɛ mɔ lɔ ni-i fan: "Oyɔ fe ɖe emɛ jan nɛ, ɖo ogbe exe mɔ ɖe i kɔ nu gbɛn ɔ, mɔ ɖe xlɛ." ⁷⁴ Piyɛ mɔ jɛ nugbɛn do eɖe ji fan: " Go nyɔ dahwe enɛ e." Trolo ɔ koklo kɔ okɔ. ⁷⁵ Keun Piye mɔ flin ixo exe Yesu lɔ ni-i san ɔ, eyɔ e nyi fan: " Feto koklo la lo kɔ okɔ ɔ, o la mɔ gbɛ jɔ otɔn fan eyɛ go nyɔ e." Exe Piyɛ lo tɔn ɔ, e vi avi, gɔdo vivɛ.