¹ Khalang cük vëngah tuidurp pëpüng John va dangku-en, “Vankho pöngnak yöi lenta. ² Khane dawkah yutku-u ma” tila Judea ram khohrong lakah awl a rök. ³ Prophet Isaiah-e phungawl a röknak dawkah, “Khohrong lakah ärlla hrampüng nge a awl thangka, Pacim me a cënak pa lamhaw bi-u laka, lam namhaw düngsha-u” tien a rök naka John haw a ni. ⁴ John ka, kala-uk mül lennak amta-e shuiah bëihaw büngah na-en, a cënghen nak shavün ennak a körpku. Cak-ram ennak khohrong lak-e khawitui haw a oh a cah a ni. ⁵ Khalen naka, Jerusalem kho ennak tünnen Judea ram kho tüküp ennak Jordan tuikëng nge a awm nampüng bäm John ne dënla amcë. ⁶ Am mingmi nünah am thawlnak namhaw thälku hëi-en John nünah Jordan tui ah tuidurp nak a pëhëi. ⁷ Khati nenphë Pharisee nam ennak Sadducee nam tuidurp ku-e khüila am valo haw John nünah a hmühëi ahka, “Hrurl shehru nam,nam hmai ah vatiku papüng Pacim me shinne nak haw yawngshen pala, ha-u nünah le nangmi namhaw raringnak i pëhëi ?. ⁸ Khane dawkah nam yutku nak haw nam awm-ii thëi hrillen nak dangku sha-u ma. ⁹ Abraham ka, ‘Im papüi nita’ tila nam kulung kawkah pökku bel-u ma. Këi ka rökka, Pacim nünah hëlang lungnam ennak Abraham me a ca a nau namla prungah yasha yapta tihaw ka rök. ¹⁰ Hrëi haw shingdung nge a pra kepah tah khön a nine dawkah a thëithën a thëi-ü nampüng a dung nambäm haw vunghou-e mëi kawkah phupnak kham hëi pata. ¹¹ Këi ka, nam yutku ne khüila nangmi namhaw tui durpnak kan pёhëi. Khati nenphë këi ka hnuk ah valo papüng nünah ka, cim müihla mëi-aal ennak tuidurp i pëhëi pa. A ningka, këiye thah ah len ngaita, këika a khokhawp tawmpë papüng paila ka kawi-ün. ¹² A kut dawkah ra tawmmen a tiltë canghaw a yarp phöiah a takpüng canghaw khai kawkah khämvëi a hi namhaw ka, a shiyap-ü püng mëi ennak hlurt hou pata” tila John nünah a rök.