¹ Herod shampahrang, böi a bit vëngah Judea ram Bethlehem kho ah Jesu a thang phöiah arlshii dannak lammah thümngal nampüng ka, Jerusalem kho ah vathou hëi-en, ² “Tuhrangah a thangpüng Jew shampahrang ka,hayo ahle a awm? A mawpnak lammah a ningnge arlshii haw kam hmü-en tawibawk pala kam valo” ti hëi-en am därt. ³ Khalang awl amyah len naka,Herod shampahrang ka,Jerusalem khohlang nam tommah am kulung a lüah lap len. ⁴ Khalen naka, khoshöi böinam ennak phung tuhcang püng saya namhaw khöu hëi-en “Khrih Böi ka, hayo ahle a thangpa?” tien a därt hëi. ⁵ Am mingmi nam nünah phë, “Prophet pakhat-e a rök naka, ⁶ ‘Ӧ Judea ram Bethlehem kho, Judea kho namme lakah nangka, khoyol mai nani-ün. A kawngka këiye ka hlang Isarael miphün a pöngpüng Böi ka, nangnge kawkah vapo pata’ tila a awlkam ah a awm. Khane dawkah Judea ram Bethlehem kho ah Khrih a thangpa” tila shampahrang haw am rökpë. ⁷ Khaphöi ah Herod shampahrang nünah arlshii dannak lammah thümngal nampüng haw a dümcala khöu hëi-en arlshii a mawpnak cük haw a cëkha la a därt hëi phöiah, ⁸ “Ci-u laka, a certla shehme haw va yäp-u ma. Nam hmü ahka, i va rökpë-u. Këiphë kava tawibawk van pata” tila ünhëi-en Bethlehem khola haw a tärlhëi. ⁹ Khanam ka shampahrangnge awl-ün nak haw ngaihëi en am cëlen. A mawpnak lamme am hmü arlshii ka am hmaiah cien shehme-e a awmnak hmünnak a düm. ¹⁰ Khalang arlshii haw am hmülen naka, ümmah yërl hëien, ¹¹ Im kawkla am el len naka, a nu Mari ennak a töngla shehme haw amhmü. Khukdörl hëi-en am tawibawk phӧiah a man äp-e utca namhaw hlam hëi-en shui, a hu awrlpüng Muran ennak rim-awrl haw am pë. ¹² Khaphöiah Herod shampahrang nge dën lammah am lat-ü ne khüila am müimang ah Pacim nünah awlthang yahsha hëi-en a köu lam ennak am tuiah khola am lat. Shehme Cahaw Egipt Ramla An Yawngpüi ¹³ Am mingmi am lat phöiah Joseph-e a mangah Pacim me vanhlang nünah, “Thou laka shehme ennak a nu haw khöu laka Egipt ramla yawngpüi roi ma.A hlarpbë kan khöu hlan hrillah khalang rammah na awmpa. A kawngka, Herod shampahrang nünah shehme haw ngawn pala pökta” tien a rökpë. ¹⁴ Khalen naka, Joseph nünah a yu ennak shehme haw mëngah Egipt khola cëpüi roi-en, ¹⁵ Herod shampahrang a shii hrillah khalang rammah an awm. Hëbangla a tangnak ka, ‘Egipt ram ennak ka cahaw ka khöu khönta’ tila Pacim nünah Prophet hrillen nak a rök awlphüng a küpnak pale haw a ni. Shehme Nam Am Ngawnnak ¹⁶ Hlangphrüi nam nünah Herod shampahrang böi am bëla nak haw a thümlen naka, a shinne sha-en hlangphrüi namhaw cëkha la a därt hëiye arlshii a mawpnak cük ennak pëngku-en Bethlehem kho ennak a kep khoca nammah awmpüng shehme kumnii-e a kal tawngpaca nambäm haw hlang tärlen a ngawnsha hëi. ¹⁷ Prophet Jeremiah-e a rökka, ¹⁸ “Ramah kho kawkah kiuah rungnak thang kaya ta.Rachel nünah a canam am awm-ü ne dawkah kiu-en a kulung damyap-ün” ti-e awl rök a küpnak a ni.