¹ Tamy zay andro zay le nandeha nitalily tagne agn'efitsy ndre Jodia re jaona mpanao Batisa manao tihoe: ² “Mibebaha, te fa marine ty fanjaka ty lagnitse.” ³ Te reke ro iaze nitalily ndre Isaia mpitoky, manao tihoe: “Misy feo raike mikaike mafe agne agn'efitse tihoe: 'Amboaro ty lala ty Tompo, ahitio ty lalane.'”

⁴ vaho jaona nisiky volon-drameva naho nanao fehikibo holitse tamy ty valahane. Valala naho tantele remby ro nataone fihina. ⁵ vaho Jerosalema, Jodia iaby, naho ty faritse iaby magnodide le vavarano ndre Jordana le namonje aze. ⁶ Nanoene batisa tegne amy ty vavarano ndre Jordana iareo, lafa nagnina ty haratiane.

⁷ Te lafa nahisake reo Fariseo naho Sadiseo lahialy namonje aze soa ho atao batisa re, le nanao tihoe re tamy iareo: “Ry foko menara feno poizy, ia ro nampitao anareo hilay ty heloke zay ho avy? ⁸ Mamoaza voa mitove ty fibebahaa. ⁹ Vaho ka misafiry ty hitalily ty hikilily agnarofo tihie: 'Mana ahy ndre Abrahama ho babanay zahay.' Te talilliko aminareo te Andragnahare le mahavita mananga anake ho ahy ndre Abrahama na le bak' amy reto vato reto kea. ¹⁰ Vaho fa napoky eo am-pototsy ty hetae ty famake. Le reo hetae iaby ze tsy mamoa voa soa le ho tapahy vaho atprake agne ampo ty afo.

¹¹ Manao batisa anareo amy ty rano hoamy ty fibebaha raho. Te mahere noho iraho reke ze avy afarako, vaho iraho le tsy maeva na ty handay ty kapane kea. Hanao Batisa anareo amy ty fagnahy masy naho ty afo Reke. ¹² Fa egny an-tagnane ty fikororohane soa hagnadiova ty famotiane vaho hamory ty varine agne antanem-bare. te reke le hagnoro reo lilam-bary amy ty ze tsy mete mate.”

¹³ bak'eo Jesosy baka agne Galilia le avy teo amy ty vavarano ndre Jordana soa ho atao ndre Jaona batisa. ¹⁴ Feie re Jaona le niezake nanaka aze, manao tihoe: “Raho ro mipay ataonao batisa, nefa riha koa va ro mamonje ahike?” ¹⁵ Jesosy namaly vaho nitsara tamine tihoe: “Inao avao amy henanizao, te zao ro mete amintika hahatanterake ty fahamarigna iaby. Bak'eo Jaona nagnina aze.

¹⁶ Lafa vita batisa Reke, le nipoake ty rano Jesosy, vaho ingo, nisokatse tamine ty lagnitse. Hisane ty Fagnahy ty Andragnahare nizotso manahake ty voromahilala vaho nandeha eo ambonine. ¹⁷ Vaho ingo, nisy bak'agne an-dagnitse nanao tihoe: “Toy ro anako malalako. Zay teko loatse.”