¹ Tafara ty nahateraha ndre Jesosy tao Betlehema ndre Jodia tamy ty andro ndre Heroda mpanjaka, le avy teo Jerosalema reo lehilahy manam-pahaiza bak' agne atignana nitsara tihoe: ² “Aia Reke zay teraky ho Mpanjaka ty Jiosy? Nahisaky ty vasiane bak' egne atignana zahay vaho avy soa hankalaza aze.”

³ Lafa naheno zane re Heroda mpanjaka, le nihorohoro reke, naho re Jerosalema iaby niarake tamine. ⁴ Nandesy ndre Horada niarake ty loha ty mpisoro iaby naho ty mpanoratsy lalàgna ty ndaty, vaho nagnontane aiereo reke tihoe: “Aia ro hahateraha ndre Kristy?” ⁵ Nitsara tamine iareo tihoe: “Ao Betlehema ndre Jodia, te zao ro voasoratsy ty mpitoke tihoe: ⁶ 'Te iriha, Betlehema, agne amy ty tane ty Joda, le tsy kele loatse amy reo mpitondra ndre Joda, te bak' aminao ro hiavia ty mpanapake zay hiamby ty ndatiko Israely.”

⁷ Vaho nikaike arere reo lehilahy manam-pahaiza re Heroda soa nagnontane aiereo mazava soa ty fotoa niboaha iaze vasia. ⁸ Nalefane tagne Betlehema iareo, manao tihoe: “Mandehana vaho fotoro soa ty amy iaze ty ajaja. Lafa hisanareo reke, le ampitalilio raho, soa ahazahoako mandeha agne avao kea le hankalaza aze.”

⁹ Tafara ty nahareza iareo ty mpanjaka, le nandeha tamy ty lalane iareo, vaho ty vasia ze hisa iareo tegne atignana ro nialoha aiereo mandra-pijanognane teo ambony ty toera nisy iaze ajaja. ¹⁰ Lafa nahisake ty vasia iareo, le niravo tamy ty hafaleam-bey. ¹¹ Nizilike tao amy iaze ajomba iareo vaho nahisake ty ajaja niarake tamy ndre Maria Renene. Niankohoke naho nankalaza aze iareo. Nanokatse ty fitoeram-panagnane iareo vaho nagnomey fagnomeza volamena, linten-kazo magnitse, vaho miora ho aze. ¹² Nampitandre aiereo tamy ty nofe Andragnahare soa tsy himpoly agne amy ndre Heroda, le lala hafa ro nandehana iareo namonje ty tanane iaby.

¹³ Lafa lasa iareo, le nisy anjely ty Tompo niseho tamy ndre Josefa tamy ty alala ty nofy vaho nitsara tihoe: “Miambina andeso ty ajaja naho ty renene, vaho milaisa agne Egypta. Mitoboha agne mandra-pitaliliako aminao, te re Heroda le mipay iaze ajaja soa hamonoa aze.” ¹⁴ Ty halik' igny Josefa le nifoha vaho nanday ty ajaja naho ty renene le nandeha agne Egypta. Nitoboke tagne reke mandra-pahavilasy ndre Heroda. ¹⁵ Zane le nagnatanterake ze nitalily ty tompo tamy ty alala ty mpitoky tihoe: “Nikinaiko hiala tagne Egypta ty anako.” ¹⁶ Bak' eo Heroda, lafa nahisake te voafitaky reo lehilahy manam-pahaiza, le nasiaky mafe. Nagnirake naho nampamono ty ajajalahy iaby roe tao magnambane ze tao Betlehema naho tao amy igny faritse iaby igny reke, arake ty fotoa ze nifotorane mazava tamy reo lehilahy manam-pahaiza. ¹⁷ Bak' eo le tanterake ty tsara ze nitalily tamy ty alala ndre Jeremia mpitoky tihoe: ¹⁹ Lafa vilasy re Heroda, ingo, nisy anjely ty Tompo niseho tamy ndre Josefa tagne Egypta tamy ty nofy vaho nitsara tihoe: ²⁰ “Mifohaza vaho andeso ty ajaja naho ty renine le mandehana agne amy ty tane ty Israely, te fa vilasy reo ze nisafiry ty fiay ty ajaja.” ²¹ Nifoha Josefa, nandesine ty ajaja naho ty renine, vaho nandeha tagne amy ty tane ty Israely.

²² Te lafa heno te re Arkelaosy ro nanjaka tagne Jodia nisolo ahy ndre Heroda babane, le natahotse ty ho agne reke. Tafara ty nampitandrema ty Andragnahare aze tamy ty nofy, le niala nandeha amy ty faritsy ndre Galilia reke ²³ le nandeha vaho nitoetse tao amy ty tanà kinaiky tihoe Nazareta. Zane le nahatanterake ze voatalily tamy ty alala reo mpitoky tihoe: “Nazareta ro hikaiha aze.”