¹ Niboake ty tempoly Jesosy vaho lasa nandeha, namonje Aze reo mpianane soa hatoro Aze ty rafitsy ty tempole. ² Feie namale Re vaho nitsara tamy iareo tihoe: “Tsy hisanareo vao reo raraha iaby reo? Talilieko aminareo, tsy vato ho tavela amy ty raeke hafa ze tsy haravà

³ Laha nitoboke teo ambone vohits'Oliva Reke, le namonje Aze mangingike reo mpianane vaho nitsara tihoe: “Talilo anay, ombia reo raraha iaby reo ro hiseho? Ino ro famantara ty fiavianao naho ty fara-andro?”

⁴ Namale Jesosy vaho nitsara aiereo tihoe: “Mitao soa tsy hisy hamitake anareo.” ⁵ Te ho lahiale ty ho avy amy ty agnarako. Vaho hitsara iareo tihoe: 'Raho ro Kristy,' vaho lahiale ro ho voafitake. ⁶ Hahare aly naho talily aly nareo. mitao soa tsy hitebiteby nareo, te tsy maintse hiseho zay raraha iaby zay; nefa tsy mboe avy ty farane. ⁷ Te hisy firenena hitsanga hanohitse firenena vaho fanjaka hanohitse fanjaka. Hisy kere naho horohoron-tane amy ty toera samihafa. ⁸ Nefa zay raraha iaby zay le fiandoha ty fanaintay ty fiteraha avao.

⁹ Le hamea iareo ho amy ty fahoria nareo vaho ho vonoane. Ho heje ty firenena iaby nareo noho ty agnarako. ¹⁰ Vaho maro ty ho lavo, vaho hifamalike naho hifankahala ty tsikiraikiraeke. ¹¹ Mpitoke sandoke lahiale ro hitsanga le hamitake ndaty maro. ¹² Satria ty faharatea le hitombo, vaho hihanitsy ty fitiava ty maro. ¹³ Te iaze raeke ze miharitse hatramy ty farane le ho voavonje. ¹⁴ Toy filantsara ty fanjaka toy le ho hatalily feno zao tontolo zao ho vavolombelo amy ty firenena iaby. Bak'eo le ho avy ty farane.

¹⁵ Noho zay, laha mahisake ty fahavetaveta ty fandrava nareo zenitalily ndre Daniela mpitoke, le hitsanga eo amy ty toera Masy nareo" (lonike ty mpamaky hahatakatse), ¹⁶ “Lonike reo ze agne Jodia hilay ho agny ambone vohitse, ¹⁷ lonike ze ambony ty tragno tsy hizotso hangalake raraha bak'ao an-tragnone, ¹⁸ vaho lonike ze agne am-baibo tsy himpoly hangalake ty lambane. ¹⁹ Te loza ho ahy reo bevohoka naho mampinono amy zay andro zay! ²⁰ Mivavaha a soa tsy ho amy ty ririny na amy ty Sabata ho hiseho ty filaisanreo. ²¹ Te hsy fahoria bey, ze tsy mboe nisy manahake zay nanomboke am-piandoha zao tontolo zao zisik'amy henanezao, aha, vaho tsy hisy sasa. ²² Laha tsy amborimbory reo andro reo, le tsy hisy nofo ho vonje. Te noho ty ndaty voa file, le hafohesy reo andro reo.

²³ Te laha misy ndaty mitsara anareo tihoe: 'Ingo, toy iaze Kristy' na, indroy iaze Kristy' le ko mino zay. ²⁴ Te ty kristy sandoke naho ty mpitoke sandoke le ho ave vaho hampieseho fahamatara bey naho raraha-mahavere, soa hamitake, laha azo atao, eke te na reo ndaty voafile kea. ²⁵ Indro, fa nitalilieko anareo mialoha ty fotoa. ²⁶ Noho zay, laha mitsara anareo iareo tihoe: 'Ingo, agne amy ty tane tsy misy raraha re,' le ko mandeha agne amy ty tane tsy raraha. na tihoe 'Ingo agne ampo efitragno re' le ko mino zay. ²⁷ Te manahake ty hotroke ze mitselatse bak'agne antignana le mazava hatragne andrefa, le manahake zay ty fihavia ty Anagn'Ondaty. ²⁸ Na ia na ia misy biby mate, le agne ro hiangona ty voltora.

²⁹ Vaho laha vao afake ty fahoria amy reo andro reo le ho maike ty masoandro, tsy hagnome ty hazavane ty vola, hipoke bak'agne an-dagnitse ty vasia, vaho hihozohozo ty here ty lagnitse. ³⁰ Bak'eo hiboake egny amy ty lagnitse ty famantara ty Anagn'Ondaty, vaho ty foko iaby ambone ty tane hisao. Hahisake ty Anagn'Ondaty avy amy ty hiboky ty lagnitse miarake amy ty here naho hasy bey Iareo. ³¹ Handefa reo anjeline Reke miarake amy ty feo trompetra mafe, vaho hamory ty olom-boafiline bak'agne amy vazan-tane efatse iareo, manomboke amy ty fory ty lagnitse le hatragne amy ty hafa.

³² Mianara ty leso bak'amy ty aviave. Laha vantane vao matoe ty ratsane vaho mamoake ty ravine, le hainareo te mariny ty fahavaratsse. ³³ Manahake zay avao ke, laha mahisake zay raraha iaby zay nareo, le tokone ho hainareo te famarine Re, eo amy reo vavahade vatane. ³⁴ Talilieko marene aminareo, te tsy ho lane toy taranake toy mandra-pisehoa zay iaby zay. ³⁵ Tsy hisy sase ty lagnitse naho ty tane, te ty tsarako le tsy ho rava zisikam-parane.

³⁶ Kanefa ty mikasike zay andro naho lera zay le tsy misy mahalala, na ty Anjele ty lagnitse kea, na ty Anandahy, te ty Baba avao. ³⁷ Manahake ty andro ndre Noa, le manahake zay avao kea ty fihavia ty Anagn'Ondaty. ³⁸ Te manahake tamy reo andro mialoha ty safo-drano le nihina naho nino iareo, nanambaly naho nala vale mandra-piavia iaze andro niziliha ndre Noa tao ampo iaze sambo fiara, ³⁹ vaho tsy nahay na ino na ino iareo mandra-piavaia ty safon-dranole nandrava aze iaby- le manahake zay ty fihavia ty Anagn'Ondaty. ⁴⁰ Bak'eo hisy lehilahy roe egne am-baibo ty raike ho rambese, vaho ty raeke hapoke. ⁴¹ Ampela roe ro handisa vare- ty raike ho rambesa, vaho ty raeke hapoke. ⁴² Noho zay le miambena, te tsy hainareo ze andro hiavia ty Tomponareo. ⁴³ Te fantaro zao, laha hay ty tompon-tragno tihoe amy firy halike ro hiavia ty mpangalatse, le ho niamby re vaho tsy nagnenga ty tragnone ho vake. ⁴⁴ Noho zay le tsy maintse mivonogne avao kea nareo, te ho avy ty Anagn'Ondaty amy ty lera tsy ambinareo.

⁴⁵ Kea ia moa iaze mpiasa azo antoke naho hendre ze nitendre ty tompone hanapake ty hasaveregnane soa hagnomeza aiero ty mahatajake iareo amy ty fotoa mete? ⁴⁶ Vototse zay mpiasa zay ze hisa ty Tompone te manao zay lafa avy reke. ⁴⁷ Taliliko marene aminareo te ty tompone ro hanapake aze ho ambone ty raraha iaby ze agnane. ⁴⁸ Te laha misy mpiasa rate mitsara ao agn'arofone tihoe: 'Ela fiave ty tompoko', ⁴⁹ le manomboke mamono reo manompo namane, naho mitava vaho misotro miarake amy reo mpimamo; ⁵⁰ le ho avy ty tompo iaze mpiasa amy ty lera ze tsy haine. ⁵¹ Le ho tapatapahy ty tompone re vaho hataone manahake ty ahy reo mpihatsaravelatsy ty najarane, ze hisy ty fitomagnia naho ty fangotoha-nife.