¹ Yesu aburhiragwa Ebetlehemu omu lya yuda, omu mango g'omwami Herodi, abanyabwenge kurhenga ebushoshokero bw'izûba bahika e Yerusalemu, ² Banaciderha erhi: ngahi aburhirwe omwami wa abayahudi, bulya rhabwine entondé ebushoshokero bw'izûba, nirhu rhuyishire mpu rhucikumbe ye.

³ Mwami Herodi, anayunva ecocinwa; alugurha, n'abomu Yerusalemu boshi naye. ⁴ Anacishobooza abakulu b'abagula goshi na gandi b'olubaga, n'okubadosa ngahi Kristu akaba aburhirwe. ⁵ Banacimubwira: mpu Ebetelehemu omu lya yuda; bulya kwo byali biyandike n'omulebi: ⁶ nawe, Betelehemu, cihugo ca yuda, orhali munyi omu barhumwa ba yuda ciru n'ehitya, bulya emwawe yo yarhenga omurhambuzi walanga abantu bani, Israéli.

⁷ Ntyo Herodi anacihamagala balya banyabwenge okw'ihwe abalonza kwo bwinjabwinja emyanzi y'okurhenga amango entondé ebonekine. ⁸ Anabarhum'ébetelehemu, aderha: mugende, munayunvirhinz'emyanzi bw'inja yoy'omwana murho; nani mwanayimanya, nyishi cikûmba ye.

⁹ Erhi baba banayunvirhiza mwami, bagenda. Banabona, erya ntondé babonaga obushoshokero bw'izûba erimbere zabo kuhika yalinda ehika enyanya yaha omwana murho âli; yayimanga. ¹⁰ Nabo erhi babona eyo entondé, baba n'obushagaluke bunene. ¹¹ Baja omunyumpa babon'omwana wa kabonjo na Maria, nnina bafukama bacikumba ye; na kandi bayigula emihako yabo, bamurherekèra honaho enoro, enshange n' amavurha. ¹² Cazinda, Nnamahanga abayishira omu bilorho okubarhacishubir'emwa Herodi, bagerera yindiyindi njira bashubira emwabo.

¹³ Erhi baba bamagenda, malaika wa Nyakasane ayishira yozefu omu bilorho, amubwira, erhi yimuka, orhole omwana bona nnina, oyakire e Misri, onabère yo kuhika nkubwire; bulya Herodi alonz'omwana mpu amuhezé. ¹⁴ Yozefu anazuka, budufu arhol'omwana na nnina, anayakire e Misri. ¹⁵ Abera yo kuhika Herodi afa, lyo akanwa Nyamuzinda amanyisagya kugerer'omulebi kahika: kurheng'e Misri nahamagire omwana wani.

¹⁶ Lero Herodi, abona oku balya banya-bwenge bamurhebire, aja mw'omutula munene, ancirhuma mpu baniguze ngasi mwanarhabana okola agwerhe miak'ibirhi na kuj'idako bomu Betelehemu n'omunciga zoshi kurhenga amango gonanene ashambalaga bene balya banyabwenge b'ihanga. ¹⁷ Lero kalya kanwa omulebi Yeremia, abw'iragwa kahikirira: ¹⁸ Izu lyanyunvikana erama, endulu n'écihogero cinji: Laheri alakir'orhubonjo, arhayemeraga alembulwe bulya barhacihali.

¹⁹ Erhi Herodi aba amafa, sinza, oku malaika wa Nyakasane ayishiraga Yozefu omu bilorho, ²⁰ Anaderha, rhola omwana na nnina, onagende oshubire omucihugo c'Israéli, bulya abalishire obuzine bw'omwana bafîre. ²¹ Yozefu azuka, arhol'omwana na nnina, ashubir'omucihugo c'Israéli.

²² Cikwone, erhi ayunva oku Arkelao y'e kol'orhambwire elya Yudea ahali h'ishe Herodi, ayoboha oku ciyija; naye erhi aba amahanulwa omu bilorho, aja e Galilaya, ²³ Agenda ajibera e Nanzareti, lyo akanwa kaderhagwa n'omulebi kahika: ahamagalwa Mnazareti.