¹ Yesu bo trɔ do olo bu naye bio: ² « Jinukunsin gaɖu xwe leɖi ogaɖeye ke jla ɔlɔ wiwle we oxwe ɖuɖu na oviye tɔn nɔ. ³ Oga sɔ dansɔvi itɔn ye dodan bio ye mɔn ve yɔ ɛmɛ kpikpe ɔlɔ wiwlé tɔn ye do va, vɔ ɛmɛ kpi-kpeye ɔn jlo bio hiye a mɔn va. ⁴ Oga mɔn sɔ odansɔvi buye dodan bo lɔ bio: "Mi lɔ na ɛmɛ kpi-kpe ye bio « Mi kpɔn ko ɖa onu ɖuɖu ko hu onyiye kpo ogbɔ-osu ke dami ye, onu ɖuɖu-ɔ bo sɔ ogbe. Mi va ɔlɔ wiwlé we oxwe ɖuɖu we tinxo. »" ⁵ Vɔ ɛmɛ ke ye kpe na ɔlɔ wiwlé-nɔ ye-ɔn ɔn kan do oxo ye tɔn ji nɔ-ɛmɛ ke ye kpé nɔ ye-ɔ, ɖe cité e sɔn yi oglé yi tɔn gbe, mɛ bu nɔ sin odan yi tɔn ye gbe. ⁶ Ɛmɛ kpikpe gbo-kpoe ye, ye nɔ xle oga we ɛmɛ didɔn ye a bo hu ye. ⁷ Aɖi xlé oga, e sɔ ahwan kɔn itɔn dodan ɛmɛ hu tɔ ye, ye mɔn hu ye, mɔn do ozo toxo ye tɔn ye. ⁸ Sɔ yi eji oga lɔ na hi we odansɔvi ye bio: "Ɔlɔ wiwlé-ɔ sɔgbe, vɔ ɛmɛ kpikpe ye ɔn jɛ, ɔn we. ⁹ Siɛ-ɔ mi yi omɔn klan nu ye a bo kpe ɛmɛ ɖekpo-kpoé ke mi gbɛ kpɔn ke sɔgbe na nɔ ɔlɔ wiwle we tinxo do va." ¹⁰ Odansɔvi yi omɔn ye bi ji, bo bɔ ɛmɛ ke ye gbɛ kpɔn ye bi, ɛmɛ ke nyɔn hui kpo ke ɔn nyɔn hui ye kpo. Ɛ mɔn ha ɔlɔ wiwle-ɔ we oxɔ mɛ gɔ bi kpo ɛmɛ kpi kpe ye kpo. ¹¹ Vɔ ke oga ɖiɛ oxɔ-mɛ a do kpɔn ɛmɛ kpikpé ye, kpɔn bio ɛmɛ ɖe mɔn le oxɔ mɛ ke ɔn do oxwé-ɔ we ahu. ¹² Oga bo kinsé-nɔ bio: "Hadowé tɛye onu ni lɛ jɔ na odo ɖiɛ bwɛ o ko do oxwe-ɔ we ahu?" Ɛmɛ-ɔn ɔn kpe ɖo ewu. ¹³ Oga bo lɔ na odansɔvi ye bio: "Mi bla ɔlɔ kpo ɔfɔ ye na ɛmɛ ke a bo dé dodan gaji le vuvlu mɛ, ofi ke na oɖu kun ɖu kpo avivivi ye na le. ¹⁴ Ɖo ɛmɛ susu wɛ ye yɔ, ovi tué ɖé wɛ can. » ¹⁵ Falizi tɔye bo vé bla ogbé ado trɛ omɔn na yesu sɔ gbɔn oxo hi tété tɔn mɛ-nɔ. ¹⁶ Falizi tɔye we onukplanvi kpo elodi tɔ ye we onu kplanvi vé lɔ na yesu bio « Onukplan ɛmɛ tɔ, mi nyɔn bio o nɔ lɔ oxo jɔ oxo, a bo mɔn kplan omɔn Mawu tɔn, lé oxo jɔ oxo mɛ. O ko nɔ sɔ ɖiɖowu mɛɖé tɔn do wa odan, oko mɔn nɔ kpɔn ɛmɛ we hunmɛ a do wa onu. ¹⁷ Lɔ na mi, ɖée e nyɔn bio, ye na tu takwɛ kpo oho gan keji ye ta séza do wɛ? » ¹⁸ Vɔ yesu kpɔn dɔmɛ nyi nylan ye tɔn bo lɔ bio: « Ɛhɛmɛnuwatɔye! Onu ni lɛ jɔ mi odo kpɔn? ¹⁹ Mi sɔ takwɛ we oho gan ɖo kpo va na. » Ye bo sɔ oho gan ɖokpo ni. ²⁰ Yesu bo lɔ na ye bio: « Onu téta ke le oho gan keji-ɔ mɛ tɔn lɛ? » ²¹ Ye bo lɔ ni bio: « Séza. » Yesu bo ɖo ewu na ye bio: « Onu ke nyi séza ton, mi sɔ na séza, a bo mɔn sɔ Mawu tɔn na Mawu. » ²² Ke ye sé ɖewu yesu tɔn, e kpaca ye mɛ bi, ye bo lɛ yesu kɔn bo sɔn. ²³ Le azan hin ji, sadusenyɛ tɔ ɖeye ke nɔ lɔ nɔ bio fɔn sɔn oku ti mɔn mɔn le-ɔ. Va ye yesu kɔn bo kinsé bio: ²⁴ « Oknukplan ɛmɛtɔ, Moyizi lɔ bio: "Na yusuglo ɖe ku e ko ji ovi-ɔ, nɔnvi-ɔ ɖo na sɔ osi-ɔ a bo sɔ ɖe a do ji ovi nü." ²⁵ Nɔnvinɔ acɔwe ɖe lé, ɛmɛ tantin ɖe nyɔnnu eko ji ovi ti, bo ku, e bo jo osi-ɔ do na nɔnvi-ɔ. ²⁶ Ɛ mɔn ke ɛmɛ ɔwe gɔ can mɔn ku e mɔn ke e ko ji ovi ti le yi we fofo si-ɔ wu, ɛmɛ ɔtɔngo can onu ɖokpo-ɛ ye, gbun do jɛ ɛmɛ acowegɔ ji. ²⁷ Ke ye mɛ acowe bi ku vɔ, ye mɛ ti ko ji ovi lé nyɔnnusi-ɔ wu, nyɔnnusi-ɔ can ku. ²⁸ Sié-ɔ yesu lɔ na mi, le fifɔn sɔn we oku we godo vɔ, ɛmɛ ni tɔn lɛ na nyi nyɔnsi-ɔ le yeme acowe-ɔ mɛ? ɖo ye mɛbi wɛ ɖé. » ²⁹ Yesu bo ɖo ewu na ye bio: « Mi le onu man nyɔn mɛ, ɖo mi ɔn nyɔn Mawu we hɔnhlɔn kpo kpo mi ɔn sé onu winwlan ye we gɔnmɛ. ³⁰ Ɖo le fifɔn sɔn oku we godo-ɔ, ɛmɛ ɖé ɔn mɔn ɖé nyɔnnu nɔ, ye ko mɔn sɔ ɛmɛ ɖe do dan ɔlɔ wiwlé gbe-nɔ, vɔ mi na leɖi Mawu dɔla hé ha le sɛxwe. ³¹ Vɔ onu ke kan ɛmɛ kuku ye we fifɔn sɔn oku ye-ɔ mi ɔn xlé oxɔ ke Mawu lɔ: ³² "Bo wɛ nyi Blahamu we Mawu, Mawu Izaki tɔn, kpo jakɔbu we Mauw?" Mawu ɔn nyi kutɔye we Mawu, vɔ ɛmɛ le ɛgbɛ ye we Mawu wɛ. » ³³ Ke otogun sé yesu we onukplan ɛmɛ ye-ɔ e kpaca ye. ³⁴ Ke falizi tɔye sé bio yesu mɔn bɔ onu do na sadusenyin tɔ ye-ɔ, ye bɔ. ³⁵ Ɛmɛ ɖokpo le falizi tɔye mɛ bo nyi osɛn kplan ɛmɛ tɔ ɖaxo, kan oxo ɖe wu yesu sé a do doé kpɔn: ³⁶ « Onukplan mɛ tɔ, osɛn ni lɛ nyi osɛn ɖaxo le osɛn ye mɛ? » ³⁷ Yesu bo ɖo ewu ni bio « "Nyi owan na Mawu tɔwe kpo oji tɔwe bi, kpo okla tɔwe, kpo susu tɔwe." ³⁸ Osɛn ke wɛ nyi tantin bo nyi ɖaxo le osɛn ye mɛ. ³⁹ Osen ɔwe gɔ mɔn tantin-ɔn ha: "Nyi owan na ɔwe gɔ tɔwe ɖi yi tété ha." ⁴⁰ Osɛn ɔwe hin ye, hinɛnyi do Mɔnyigi we osɛ ji kpo oxo lɔɖonyitɔye we oxo ji. » ⁴¹ Ke falizi tɔye gbɛ le bibɔ mɛ-ɔ, yesu kan oxoye sé: ⁴² Yesu kansé bio: « Tamɛ ni lɛ mi nɔ bu do kliso-ɔ wu? Ɛmɛ ni we ovi lɛ enyi? » Ye bo ɖo ewu nü-bio « Davidi we ovi wɛ enyi. » ⁴³ Yesu bo lɔ na ye bio « Naɖe lɛ na Davidi, va gɔ kpo gbigbɔ kinkwɛn, bo nɔ va yɔ-ɛ bio xwetɔ, le gan ke mɛ na e lɔ nɔ bio: ⁴⁴ "Xweto lɔ na bo we xwetɔ": "Hinɛnyi le bowe aɖusi mɛ, gbun na ganke mɛ na ko sɔ yi we kintɔye do wasi yi we ɔfɔ tutu nu."? ⁴⁵ Na Davidi nɔ va yɔ kliso-ɔ bio "Xweto"-ɔ naɖé Kliso-ɔ mɔ va nyi Davidi we ovi nɔ ɖo? » ⁴⁶ Ɛmɛ ti ɔn kpe wu na lɔ oxo ɖokpo tété nü. Sɔn gbe hin gbe, ɛmɛ ti ɔn mɔn gla bo mɔ do kan oxo ɖe wi sé.