¹ Teteet nyi nyee roobu siintaaryeetaab Yeesu. Salu Yeesu *Kiriisto Baytooyiinteet *Tawuti akusalu nkinee *Abraam.

² Ki kwaaniitaab Isaaka Abraam. Nto Isaaka ki kwaaniitaab Yaakobo. Ki kwaaniitaab Yuuta akoo mbo ng'eetaabkaam Yaakobo.

³ Ki kwaaniitaab Berees akoo Seera Yuuta. (Nto kaamet ku Tamaar.) Ki kwaaniitaab Esroon Berees. Nto Raam ku kwaan Esroon.

⁴ Ki kwaaniitaa Aminataab Raam. Kwaaniitaab Naasyoon ku Aminataab. Kwaaniitaab Salmoon ku Naasyoon.

⁵ Nto Salmoon ku kwaaniitaab Boowaas. (Ki kaametiitaab Boowaas Raa-ab.) Ki kwaaniitaab Obeet Boowaas. (Nto kaametiitaab Obeet ku Ruut.) Kwaaniitaab Yeese ku Obeet.

⁶ Kwaaniitaab baytooyiinteet Tawuti ku Yeese. Ki kwaaniitaab Solomoon Tawuti. (Nto kaametiitaab Solomoon ku koorkoonoo kibo chiichoo kikeekuuree Uriiya.)

⁷ Kwaaniitaab Reewoboowaam ku Solomoon. Kwaaniitaab Abiiya ku Reewoboowaam. Kwaaniitaab Aasa ku Abiiya.

⁸ Ki kwaaniitaab Yeewosyafaat ku Aasa. Kwaaniitaab Yooraam ku Yeewosyafaat. Nto kwaaniitaab Usiiya ku Yooraam.

⁹ Kwaaniitaab Choosam ku Usiiya. Nto choosam ku kwaaniitaab A-aas. Ki kwaaniitaab Esekyaa A-aas.

¹⁰ Kwaaniitaab Manaase Esekyaa. Nto kwaaniitaab Amoon ku Manaase. Ki kwaaniitaab Choosaaya Amoon.

¹¹ Kwaaniitaab Yeekonnyaa ankoo mbo ng'eetaabkaam ku Choosaaya. Besyoosyechooto chee kikeenamee Yuutayeek ankeeyib bokuyek motwoor am Babuloon.

¹² Yu kabokeeyib kuba Babuloon, kunyoor Yeekonnyaa weeriit nyee kikeekuuree Syeeltyeel.

¹³ Kwaniitaab Abiyuut ku Serubabeel. Kwaaniitaab Elyaakim Abiyuut. Nto kwaaniitaab Asoor ku Elyaakim.

¹⁴ Ki kwaaniitaab Saatook Asoor. Kwaaniitaab Akiim ku Saatook. Nto kwaaniitaab Elyuut ku Akiim.

¹⁵ Kwaaniitaab Elyeeser Elyuut. Kwaaniitaab Maatan ku Elyeeser. Kwaaniitaab Yaakobo ku Maatan.

¹⁶ Nto kwaaniitaab Yooseef ku Yaakobo. Nto Yooseef ku saanteetaab Maaryaa nyoo kaametiitaab Yeesu nyoo keekuure kule *Kiriisto.

¹⁷ Kunyoo kung'eetee Abraab akoy Tawuti, ku binuutek taman ak ang'wan. Nto kung'eetee besyoosyechooto kikeeyibe Yuutayeek kuba Babuloon akoy yoo kikeesiche Kiriisto, ku binuutek alak taman ak ang'wan.

¹⁸ Wolee kikeesikto Yeesu Kiriisto kumii kule: Kikiikuwo Yooseef makiisyo kumache koomut Maaryaa kaametiitaab Yeesu. Nteenee kutoombo koomute keey, kutook kule kinyikiis Maaryaa. Kinyikiis am kaamukeyweekaab Tamirmiryeetaab Yeyiin. ¹⁹ Ki saannyaa Yooseef nyee ki churtaat. Koosoot koochuchuuy keey simeentosuur Maaryaa. ²⁰ Nto yu takumii Yooseef koosoote ng'aleechu, kuchoonchi *malayikeet am kiirwootik ankumwoochi kule, “Yooseef nyebo kootaab Tawuti, meetay Maaryaa kuyek cheebyoosyeeng'uung'. Ntee Tamirmiryeetaab Yeyiin nyee kayey kumanach Maaryaa. ²¹ Makusich weeriit anku meetoochi kaayneet kule Yeesu kuuyu makooraraach biiko am ng'ookiswookikwaa.” ²² Kiyityiin ng'aleechu tukul kubo kiyee kimwooy Yeyiin kubununee woorkooyoonteet ake kule, ²³ “Makunyikisiit *arung'oonyoo ankusich weero nyee makeekuuree Manweel. (Ibooru kaaynaani bo Manweel kule 'Keeboonte keey Yeyiin.')” ²⁴ Nto mii letuunoo yu kawokung'eetee Yooseef rwoo, koomut Maaryaa kuu kimwooytoochine malayikeetaab Yeyiin. ²⁵ Kiibuurto Yooseef Maaryaa nyee manaatuuyo tukwaay kuy keesich weeroo. Yu kakeesich, kutoochi Yooseef weerooto kaayneet kule Yeesu.