¹ Ua mavae le Sapati, ua malama le taeao o le aso muamua o le vaiaso, ona o atu ai lea o Maria le Makatala ma le isi Maria e asiasi i le tu'ugamau. ² Fa'auta, ua luluina le mafui'e tele, ina ua alu ifo mai le lagi le agelu a le Ali'i, ua sau o ia ma fuli 'ese le ma'a sa le gutu o le tu'ugamau ae ti'eti'e ai i luga. ³ Ua foliga mai o ia e fa'apei o se uila, ma ona ofu pa'epa'e fa'apei o se timu aisa (snow). ⁴ Ua gatete ē na leoleoina le tu'ugamau, 'ona o le fēfefe tele ma ua pei o ni tagata ua feoti i latou. ⁵ Ua fai atu le agelu i fafine, " aua le fēfefe oulua, aua ua ou iloa o lo'o lua sāili iā Iesu, o lē sa fa'asatauroina. ⁶ E le'o toe i nei o ia, ae ua toe tu o ia e pei ona fai mai ai o ia. Ia omai ia e matamata i le mea sa taoto ai o ia. ⁷ Ia fa'avave atu fo'i ma ta'u atu i ona so'o, 'Ua toetu o ia mai le oti. O le a muamua atu o ia iā tei oulua i Kalilaia, ma o inā tou te vaai ai iā te ia, e pei ona ou fai atu ai. ⁸ Ua o ese i lā'ua ma le fefe ma le fiafia tele, ma ua taufetuli e ta'u atu i ona so'o. ⁹ Ua fa'ateia i laua, ina ua fetaui ma Iesu, ma ua fa'apea mai, Talofa! Ua omai i lā'ua ma to'atutuli i lalo o ona vae ma ua vivi'i atu iā te ia. ¹⁰ Ua fa'apea atu Iesu ia tei lā'ua, "Aua nei lua fēfefe, ae ia o atu oulua ma ta'u atu i o'u uso e ō i Kalilaia latou te iloa atu ai a'u. ¹¹ Ua ō fafine, ae ua o atu nisi o leoleo i le a'ai ma ta'u atu i ositaulaga sili mea uma sa tutupu. ¹² Sa feiloa'i ositaulaga sili ma toeaiina ma ua talanoaina le mataupu, ona latou avatu lea o tupe e tele i fitafita ¹³ ma fa'apea atu, " Ia outou fai atu i isi, e fa'apea ' Na ō mai so'o o Iesu i le pō ma gaoi lona tino a'o tatou momoe. ¹⁴ O le ā matou fa'aoleole i le ali'i kovana ina ia aua nei iai se popole iā te outou, pe a o'o atu lenei tala iā te ia. ¹⁵ Ua talia e fitafita tupe, ma ua faia lea mea e pei ona fa'atonuina ai i latou. Na salalau atu lenei tala i tagata Iutaia ma o lo'o fa'aauau pea i le asō. ¹⁶ Ua o atu le au so'o e to'asefulu ma le tasi i Kalilaia, i le mauga sa fa'apea ona fa'asino atu e Iesu iā tei latou. ¹⁷ Ua latou iloa atu o ia, ona latou vivi'i atu lea iā te ia, ae sa masalosalo lava isi. ¹⁸ Ua sau Iesu ma ua fai atu iā tei latou, " Ua tu'uina mai ia te a'u le pule uma lava i le lagi ma le lalolagi. ¹⁹ O lenei, ia outou ō atu e fai nu'u uma lava ma so'o. Ia papatiso atu ia tei latou i le suafa o le Tamā, ma le Alo, ma le Agaga Paia. ²⁰ Ia a'oa'o atu ia tei latou, ina ia usiusita'i (tausi) i mea uma lava ua ou fai atu ai iā te outou. Ia iloa, ou te iai pea ma outou i aso uma lava ma e o'o lava i le gata'aga o le lalolagi.