1 Ina ua oo I le taeao, ua faufau leaga le au Ositaulaga sili ma le au toeaiina uma lava ina ia latou fasioti ia Iesu. 2 Ua latou fusifusi ia te ia, ma taítaí ese atu ia te ia, ua latou tuuina atu o ia I luma o Pilato le kovana. 3 Ina ua iloa atu e Iuta, le na faalataina o ia le faasalaga ua oo ia Iesu, ua salamo o ia ona ia toe faafoí lea o tupe siliva e tolu sefulu I le au Ositaulaga sili ma le au toeaiina. 4 Ua ia faapea atu, “Ua ou agasala ina ua ou faalata I le toto e le sala.” A ua latou faapea mai, O lea la matou mea e fai atu ai? O le faafitauli lena a oe lava ia.” 5 Ona ia togi lea I lalo o tupe siliva I totonu o le malumalu, ua alu ese atu, ona alu ai lea ma faatautau ia te ia. 6 Ua ave e le au ositaulaga sili le tupe siliva ma faapea atu, “O le solitulafono le tuu o nei tupe siliva I totonu o le mea e teu ai tupe ona o le totogi o le toto.” 7 Ua latou fefaasoaaí i lea mataupu ona latou faatau ai lea o le fanua a le fai ipu omea I le tupe siliva ina ia tanu aí tagata ese. 8 O le mafuaaga lea ua faaigoa ai lea fanua o le “Fanua o le Toto” e oo mai lava I le aso nei. 9 Ina ia taunuu ai le upu na tautala ai le perofeta o Ieremia, “ua latou ave tupe siliva e tolu sefulu, o le tau lea na latou tuu I ona luga e tagata Isaraelu.” 10 Ma ua latou tuuina atu I le fanua o le fai ipu omea, e pei ona poloaí mai ai le Alii ia te aú.’ 11 Ua tulaí Iesu I luma o le kovana, ona fesili atu lea o le kovana ia te ia, “O oe ea o le tupu o tagata Iutaia?” Ona tali atu lea o Iesu ia te ia, “O le na tonu lava ua e faimai ai.” 12 Ina ua tuuaíina o ia e le au ositaulaga sili ma le au toeaiina, na te leí tali atu lava I se upu se tasi. 13 Ona faiatu lea o Pilato ia te ia, “Ua e faalogo atu ea I tuuaíga ua faasaga atu ia te oe?” 14 Ae leí tali atu lava o ia I se upu se tasi, ona ofo tele ai lea o le Kovana. 15 O le taimi tonu lea o le tausamiga, ma o le tu ma aga a le kovana I lea taimi, na te faasaóloto ai se pagota se toatasi e filifilia mai e le motu o tagata. 16 O le taimi tonu lea o loo taofia ai se pagota mataútia ua igoa ia Parapa. 17 Ina ua latou faapotopoto mai, ua faapea atu Pilato ia te I latou, “O ai tou te mananaó ou te faasaoloto atu ia te outou? O Parapa, poo Iesu le ua taúa o le Keriso?” 18 Aua ua ia iloa, o lo latou lotoleaga ua ala ai ona latou ta’itaí mai Iesu I ona luma. 19 Aó nofo o ia I luga o lona nofoa faamasino, ua auina mai e lana ava le upu ia te ia ua faapea ane “Aua nei iai se mea e te faia I lena tagata e leai se sala.” 20 Ua tauanau pea e le au ositaulaga sili ma le au toeaiina le motu o tagata ina ia latou fesili mo Parapa, a ia fasioti ia Iesu. 21 Ona fesili atu lea o le Kovana ia te I latou, “O ai o le toalua lea tou te mananao ou te faasaóloto atu ia te outou?” ua latou faapea mai “Parapa.” 22 Ona faiatu lea o Pilato ia te I latou, “Se a se mea ou te faia ia Iesu, le ua taúa o le Keriso?” Ua latou tali atu “Faasatauro ia te ia.” 23 Ona faapea atu lea o ia ia te I latou, “Aisea, o lea se solitulafono ua ia faia?” A ua leotele atu le latou alaga ua faapea atu, “Faasatauro ia te ia.” 24 Ina ua iloa e Pilato ua leai sana gaioiga e toe mafai ona fai, peitai ane ua amata ona vevesi le motu o tagata, ona ia au mai lea o le vai, ua fufulu ai ona lima I luma o le motu o tagata, ua ia faapea atu, “Ua mama aú ma le toto o lenei tagata e leai se sala, faitalia outou ma ia.” 25 Ua faapea mai tagata uma lava, “Ia I luga o I matou ma a matou fanau le toto o lenei tagata.” 26 Ona ia tatala ai lea o Parapa ia te I latou, a ua ia sasaina ia Iesu ma tuuina atu ia te I latou ina ia faasatauroina. 27 Ona auina atu lea o Iesu e fitafita a le Kovana I le nofoaga tutotonu a le malo ma ua faapotopoto ai vaega áu uma. 28 Ua latou tatala I ona ofu ma ua faaofu ia te ia i le íe mumu. 29 Ua latou faia se pale tuitui ma tuu I lona ulu, ua latou tuu foi le toótoó I lona lima taumatau. Ua latou ifo I ona luma ma ua latou faifai ia te ia ua faapea atu, “Ia Nofotupu, le Tupu o tagata Iutaia.” 30 Ua latou feanu ia te ia, ua latou aveese le totoó nai lona lima ma taia ai lona ulu ua faatele lava. 31 Ua latou faifai ia te ia, ona aveese ai lea o le ie na faaofu ai ae to faaófu o ia I ona lava ofu, ona latou taítaí ese lea ia te ia ina ia faasatauroina. 32 Ao latou ulufafo, na latou iloa ai se tagata mai Kurene ua igoa ia Simona, ua latou fosi ia te ia ina ia tauave e ia le satauro o Iesu. 33 Ua latou oo mai I le nofoaga ua taúa o Korokota, o lona uiga “O le nofoaga o le au Ulupoo.” 34 Ua latou ave ia te ia le uaina ua fefiloai ma le gaó, Ina ua tofo ai o ia, na te leí inu ina. 35 Ina ua latou faasatauro ia te ia, ua latou vaevae I ona ofu ma faia ai le vili. 36 Ua latou nonofo I lea mea ma leoleo ia te ia. 37 Ua latou tuu I luga atu o lona ulu le moliaga e faasaga ia te ia ua faitau e faapea, “O Iesu lenei, le tupu o tagata Iutaia.” 38 E toalua pagota na faasatauro faatasi ma ia, o le tasi I lona itu taumatau, ma le tasi I lona itu tauagavale. 39 O I latou sa agaí ane I lea mea ua latou faatiga ia te ia, mau a lulu o latou ulu. 40 Ua latou faapea atu, “Na e faimai e te lepetia le malumalu ma te fai I aso e tolu, ia e faaola ia te oe! Pe afai o oe o le Alo o le Atua, sau I lalo mai le satauro!” 41 Ua tutusa lelei lava ma upu faifai a le au ositaulaga sili ma le au toeaiina ia te ia, ua latou faapea atu, 42 “Na ia faaola I isi tagata, ae le mafai ona ia faaola ia te ia lava. O ia o le tupu o Isaraelu, tuu ia te ia e sau lava ia I lalo ma le satauro ona faatoá tatou Talitonu loa lea ia te ia. 43 Na te talitonuina ole Atua, tuu I le Atua na te laveai ia te ia I le taimi lenei, Pe a finagalomalie le Atua e tatala ia te ia. Aua ua ia faapea mai lava, ‘O aú o le alo o le Atua.’ 44 Ua tutusa lelei ai foi ma upu faifai a pagota e na latou faasatauro faatasi na fai ia te ia. 45 Ina ua oo I le itula lona 6, ua ufitia le laueleele uma I le pogisa seía oo lava I le itula lona 9. 46 Ina ua oo I le itula e 9, ua alaga atu Iesu ma le leo tele ua faapea atu, “Eli, Eli, Lama sabatani?” o lona uiga, “Loú Atua e, Loú Atua e, aisea ua e tuulafoaí ai ia te au?” 47 Ina ua faalogo ai nisi o e na laulaututu ai lea mea, ua latou faapea ane, “Ua ia valaau atu ia Elia.” 48 I le taimi lava lea, ua tamoé atu le tasi o le au fitafita ma aumai le momi ua tupu I le vineka, ua faapipii i se laáu umi ma tuuina atu ai ia te ia ina ia inu ai. 49 Ua faapea atu nisi o I latou, “Tuu ai pea ia te ia, se I vaai pe sau Elia e laveai ia te ia.” 50 Ona toe valaau atu lea o Iesu ma le leo tele ma tuuina atu ai lona agaga. 51 Faauta, ua saeluaina le ie puipui I le malumalu amata mai I le pitoaluga seia oo I le pito I lalo, ua luluina le laueleele uma ma ua valuaina ai maá. 52 Ua matalatala ai tuugamau ma ua toe faatuina mai ai nai e ua oti le au paia o e na momoe. 53 Ua latou omai I fafo ma o latou tuugamau ina ua ia toe tu mai nai e ua oti, ua latou ulufale atu I le aai paia, ma ua latou faailoa atu I latou I le toatele o tagata. 54 Ina ua iloa atu e le taítaí o le toaselau ma I latou uma o e na matamata ia Iesu le mafuíe ma mea uma na tutupu, ua oo ai le fefe tele ia teí latou ma latou faapea ane, “E moni lava, o le atalii lenei o le Atua.” 55 E toatele ni tina o e na mulimuli ia Iesu mai lava I kalilaia ina ia latou tausi ia te ia, ua latou matamata mamao mai ia te ia. 56 O nisi o I latou ua igoa ia Maria le Makatala, Maria le tina o Iakopo ma Iosefa, ma le tina o atalii o Sepetaio. 57 Ua oo I le afiafi, ona sau ai lea o le tasi tagata mauóa mai Arimataia ua igoa ia Iosefa, o se tasi o soó o Iesu. 58 Ua alu atu o ia ia Pilato ma faanoi I le tino o Iesu. Ona faatonuina lea e Pilato ia tuuina atu ia te ia. 59 Ua ave e Iosefa lona tino, ua taai I ie mama, 60 Ua ia tuu ai ia te ia I lona tuugamau fou na ia eli mai le papa. Ua ia faataavale mai le Maa tele I le gutu o le tuugamau ona alu ese ai lea o ia. 61 Sa iai Maria le makatala ma isi Maria I lea mea, sa latou nonofo mai I leisi itu o le tuugamau. 62 O le aso na sosoó ai, o le aso lea o le Tapenaga, ua faapotopoto ai le au Ositaulaga sili ma le au Faresaio faatasi ai ma Pilato. 63 Ua latou faapea atu, Alii e, ua matou manatua aó soifua le na taufaasese, na ia faapea mai, ‘A mavae aso e tolu ona ou toe tu mai lea nai e ua oti.” 64 O lea ia e faatonu ai ina ia matua leoleoina le tuugamau seia maeá le aso tolu, neí teí ua omai ona soo ma ave faa gaoi ia te ia ma latou fai atu ai I tagata, ‘Ua toetu mai o ia nai e ua oti.’ Ona sili atu lea o le faasese mulimuli nai loa le na muamua. 65 Ona faiatu lea o Pilato ia te I latou, “Ina ave ia se fitafita, ma ia outou faamautinoa ia matua malu le puipuiga.” 66 Ona latou o lea ma leoleo I le tuugamau, ua faamaufaailoga I le maá ma tuu ai le tagata e leoleo ai.