¹ Ua fai atu foi Iesu ia te i latou i tala fa'a-fa'atusa, ua faapea atu, ² "E tai tutusa le mālo o le Atua ma se tasi tupu na sauni se aiga tele o le fa'aipoipoga mo lona atalii". ³ Sa ia fa'atonuina lana auauna e alu e vala'aulia mai nisi o tagata ina ia latou fiafia fa'atasi i le aiga o le fa'aipoipoga, ae le i ōmai i latou. ⁴ Sa toe fa'atonuina e le tupu isi auauna ma ia fai atu, "Ina o atu ma fai atu i ē ua vala'aulia, ma ta'u atu iai, ua uma ona ou sāunia le aiga tele. Ua kukaina le oti ma le povi peti lelei, o mea ia ua tāpenaina. Omai ia tatou fiafia faatasi i le aiga o le fa'aipoipoga." ⁵ Na o atu auauna e pei ona fa'atonuina ae le fa'alogo mai i latou ma sāvavali ese, o nisi o lo'o i o latou fa'atoaga ae o nisi o lo'o fai a latou galuega masani. ⁶ Sa faia foi e nisi o i latou, ua pu'e i auauna a le tupu, ua inosia ma fāsiotia i latou. ⁷ Ua ita tele le tupu ma ua fa'atonuina ana fitafita ina ia fasioti i ia tagata ma sūsūnuina o latou nuu. ⁸ Ua ia fai atu foi i ana auauna, "Ua uma ona tapenaina o le faaipoipoga, ae o i latou sa vala'aulia ua le toe mo'omia. ⁹ Ia o atu ia outou i auala uma ma vala'aulia mai soo se tasi tou te tau atu iai, ina ia tatou aai fa'atasi i le aiga o le fa'aipoipoga." ¹⁰ Ua o atu auauna i auala uma lava ma aumai so'o se tasi na latou tau atu iai, o nisi e lelei o nisi foi e leaga. Ua tumu foi le fale i le 'au vala'aulia. ¹¹ Na alu atu le tupu ma vaai atu i le au vala'aulia, ma ia iloa atu se tasi e le o iai ni ona ofu e fetaui mo le fa'aipoipoga. ¹² Ua fai atu le tupu, "La'u uo e, e faapefea ona e sau i totonu e le o iai ni ou ofu mo le fa'aipoipoga?" ae ua leai o sana tali. ¹³ Ua fai atu foi le tupu i ana auauna, "Ia outou saisai i lima ma vae o lenei tagata, ma tuli atu o ia i fafo i le pogisa, i le mea o loo iai le fetagisi ma le lilivau o nifo. ¹⁴ E to'atele o ē vala'aulia, ae itiiti i latou e filifilia." ¹⁵ Na fai le tonu a le au faresaio pe faapefea ona latou molia Iesu e ala i ana upu o lo'o tautala ai. ¹⁶ Sa latou tu'uina atu o latou so'o poo ē o lo'o mulimuli atu ia te i latou fa'atasi ma le au Herotiana. Ua lātou fai atu ia Iesu, "Le faiaoga e, ua matou iloa o oe o le tagata amiotonu, e te a'oa'o foi i le upu a le Atua ma le faamaoni. E te lē popole foi i ni fāitioga ma amioga i le va o tagata. ¹⁷ Ia e ta'u mai poo le a sou manatu, pe tatau ona totogi lafoga ia Kaisara pe leai?" ¹⁸ Ua malamalama lelei Iesu i o latou manatu leaga ona fai atu lea, "Aisea ua outou tofotofo mai ai ia te a'u outou tagata pepelo e,? ¹⁹ Ia outou fa'aali mai le tupe o lo'o faia ai a tou lafoga". Ua latou aumai foi le tenari ia te Ia. ²⁰ Ua fai atu Iesu ia te i latou, "O le igoa lenei ma le ata o ai o lo'o i luga o lenei tupe?" ²¹ Ua latou fai mai ia te ia, "O Kaisara". Sa toe tali atu Iesu ia i latou, "Ia outou avatu mea uma e tatau ia Kaisara ae fa'afoi atu mea e tatau i le Atua ia te Ia." ²² Ua le fiafia i latou ina ua latou fa'alogo atu i lana tali. Ua latou o ese ae tuu ai na o Ia. ²³ O lea lava aso na o atu ai ia te Ia nisi o le au satukaio, e lē talitonu i se tagata ua oti ae ua toe tu mai. Na latou fesili atu ia Iesu, ²⁴ ua fai atu ia te Ia, "Le faiaoga e, na fai mai Mose, afai ae oti se tamā ae leai sana fanau, ona mafai lea ona faaipoipo atu o lona to'alua i lona uso ma na tausia lana fanau." ²⁵ Sa iai se āu uso se to'afitu. Na fa'aipoipo le ulumatua ona oti ai lea o ia. E leai foi sana fanau ma ua tu'ua lona to'alua i lona uso. ²⁶ Ua faapenā foi le uso lona lua, ma le lona tolu se'ia oo lava i le lona fitu. ²⁷ Ua feoti uma i latou fa'apea foi le fafine. ²⁸ O ai la o i latou nei e to'afitu le to'alua moni o lenei fafine pe ā o'o i le aso e toe tutu ai tagata ua feoti? Aua sa faaipoipo atu o ia i ā i latou uma nei. ²⁹ Ua tali atu Iesu ia te i latou, "Ua fa'aseseina outou ona ua outou lē iloa uiga o upu o le afioga Pāia a le Atua ma lona mana. ³⁰ O le fa'atūtūina mai o ē ua oti i le aso o le faamāsinoga, e lē toe iai ni fa'aipoipoga i le va o le tama ma le teine. Ae avea i latou uma e pei o agelu o le lagi. ³¹ E tusa ai ma le fa'amalamalamaina o le toe tutu mai o ē ua oti, tou te lē iloa ea na fai (fetalai) atu le Atua iā te outou, ³² "O a'u o le Atua o Aperaamo, le Atua o Isaako ma le Atua o Iakopo?" O le Atua ia o ē o lo'o ola ae lē mo ē o oti." ³³ Sa ofo le to'atele o tagata na fa'alogologo i ana a'oa'oga. ³⁴ Na fa'alogo le au faresaio ua fa'afilemu e Iesu le au satukaio, ona latou fa'apotopoto ai lea. ³⁵ O lē tasi o i latou o le tāusi tulafono, na ia fesiligia o Ia e ala i lana fesili tofotofo, ³⁶ "Le a'oa'o e, o le ā le tulāfono e sili i tulāfono uma?" ³⁷ Sa tali atu Iesu ia te ia, "Ia ē alofa atu i le Alii lou Atua ma lou loto atoa, ma lou agaga ātoa ma lou manatu atoa". ³⁸ O le tulāfono sili lenā ma le tāua. ³⁹ E fa'apēna foi le tulāfono lona lua, "Ia e alofa atu i lou tuāoi, ia pei o oe lava ia te oe." ⁴⁰ O nei tulafono e lua, e fa'atatauina i ai tulafono ma le au perofeta." ⁴¹ O lo'o potopoto pea le au faresaio, ae fesili atu loa Iesu ia te i latou. ⁴² Ua fai atu o Ia, "O le a so outou manatu i le Keriso? O se atali'i o ai?" Ua latou fai mai ia te Ia, "O le atali'i o Tavita." ⁴³ Ua tali atu o Ia ia te i latou, "E faapefea ona valaau Tavita a'o iai o ia i le agaga, o Ia o lona Alii, ⁴⁴ "Ua fai atu le Alii i lo'u Alii, Ia e nofo i lo'u itu taumatau, seia ou faia ē ua ita mai iā te oe ma mea e tu ai ou vae?" ⁴⁵ Na valaau e Tavita le Keriso o le Alii, pe faapefea ona fai o ia ma atalii o Tavita?" ⁴⁶ E le i mafai ona tali ane se tasi o i latou, e le i mafai foi ona toe fesili atu se tasi talu mai lava lena aso.