¹ Tamy fotoa zay, Heroda mpanjaka nahar ty vaovao mikasiky an'i Jesosy. ² Hoy ie tamy mpiasany rey hozao: “I Jaona mpanao batisa zay; nitsanga tamy ty maty ie. Laha zay le miasa aminy ao hery rey.”

³ Fa Heroda nanambotsy an'i Jaona, namehy azy, sady nandefa azy tan-tsano maiky any noho i Herodiasy, valy i Filipo rahalahiny. ⁴ Fa hoasa Jaona taminy hozao: “Tsy ara-dala ho ahy nao ty mana azy ho valinao.” ⁵ Naniry ty hamono azy Heroda, fe natahotsy olo lako rey ie, sady nirambesin-drozy manahaky ty olo to-resaky ie.

⁶ a lafa niavy ty fiavia ty andro nahareta i Heroda, le nisindraky tanivo vahiny rey eo vahiny nala ty anak'ampela i Herodiasy ka le nitea an'i Heroda. ⁷ Ho setsy zay, le nampanantena tamy ty fiaina ie ty hanome ze hangatahiny ndra ino ndra ino. ⁸ Lafa baka nitoroa ty reniny mariky, le hoy ie hozao: “Ameo ahy eto, anabo ty lovia, ty loha i Jaoana mpanao Batisa.” ⁹ Nalahelo mare noho ty fangatahany ty mpanjaka, fe noho ty voaliny noho iaby nihina niaraky taminy rey, le nanome beko ie fa tokony ho vita zay. ¹⁰ Naniraky ka nanapaky ty loha i Jaoana tan-tsanomaiky ao ie. ¹¹ Bakeo nandesy tamy ty lovia ty lohany sady namea ajam-pela iny sady nandesiny tamy ty reniny eo zay. ¹² Bakeo le niavy mpianatsiny rey, nangalaky faty iny, sady nandevy zay. Tafara zay, le nandeha ndrozy sady nivola tamy i Jesosy. ¹³ Sady lafa nahare zay Jesosy, le niala baka amy laka raiky eo ie hana amy toera mitoka raiky any. Lafa nahare zay olo lako rey, le nanoriky Azy an-tombony baka amy tanà-bevata rey any. ¹⁴ Bakeo Jesosy nana alohan-drozy eo sady nahita olo lako maré bibiky rey. Nangoraky androzy Ie sady nanafaky ty aretin-drozy.

¹⁵ Lafa niavy ty hariva, le nana aminy eo mpianatsy ret sady nivola hozao: “Toy ro toera avao, sady fa tapitsy sahady ty andro. Alefaso olo lako rey, mba hafahan-drozy mandeha amy tanà any sady hivily hany ho ahy ty vatan-drozy.”

¹⁶ Fa Jesosy nivola andro hozao: “Tsy mila mandeha lavitsy rozy. Ameanareo raha hany rozy.”

¹⁷ Hoasan-drozy taminy hozao: “Mofo limy noho hazandrano roe avao ro hanananay eto.”

¹⁸ Hoasa Jesosy hozao: “Andeso amiko etoa zay.” ¹⁹ Bakeo Jesosy nibeko olo lako rey mba hipetsaky amy ty boka eo. Nalany mofo limy rey noho fia roe. Niandrandra tan-danitsy any, le nisaotsy Ie sady mpianatsy, sady mpianatsy rey nanome zay ho ahy ty olo lako. ²⁰ Nihina iaby ie iaby sady vintsy. Bakeo le navorin-drozy ty sisy potin-kany kable nahatsiky folo roa amby sobiky. ²¹ Tamy ty limy arivo lahy eo nihina rey, hafa tsy aja ampela.

²² Direkita le nalanay nana amy ty laka ao sady nandeha hitariky Azy ho amy sisiny eny mpianatsiny rey, laha mbo nandeha olo lako rey Ie. ²³ Tafara ty nandefasany olo lako rey, le nandeha niakatsy tambohitsy eny Ie raiky mba hivavaky. Lafa niavy ty hariva, Ie raiky ro teo. ²⁴ Sady ty sambo ro fa nandeha lavitsy ty fanety, natopatopa ty onja, safe niala nanohitsy androzy ty tsioky. ²⁵ Tamy ty fiembena faha efatsy ty haliky ro namonjy androzy Jesosy, nandeha tanabo riaky eny. ²⁶ Lafa nahita Azy nandeha tanabo riaky eny mpianatsy rey, le natahotsy ka le nivola hozao: “Angatsy io,” sady le nikorakoraky tamy tahotsy ndrozy. ²⁷ Fa Jesosy nivola tamin-drozy direkita hozao: “Mahareza! Zaho toy! Ka matahotsy.”

²⁸ Namaly Azy Petera ka le nanao hozao: “Tompo, laha Iha io, le anovo mamonjy Anao anabo ty rano eny zaho.”

²⁹ Hoasa Jesosy hozao: “Mamonjea” Ka le niala baka amy ty laka ao Petera sady nandeha tanabo rano eny mba hamonjy an'i Jesosy. ³⁰ Fa lafa nahita ty tsioky Petera, le nanjary natahotsy. Laha nanomboky nilentiky iny ie, le nikoraky mare ie sady nivola hozao: “Tompo, vonjeo zaho!”

³¹ Direkita Jesosy le nanampatsy ty tanany, nitandraky an'i Petera, sady nivola taminy hozao: “Iha kelikely finoa a, fa manino iha ro niahiahy?” ³² Bakeo Jesosy noho Petera nandeha namonjy ty laka, nijano niala ty tsioky.

³³ Bakeo mpianatsy tanay laka ao rey nanompo an'i Jesosy sady nivola hozao: “Iha marina ro Anan-Janahary.”

³⁴ Lafa baka nianapaky ndrozy, le niavy tan-tany Genesareta eny ao. ³⁵ Lafa nahay an'i Jesosy lahilahy rey tamy toera zay, le nandefa hafatsy famy ty faritsy miodidy ao iaby, sady nandesin-drozy Taminy eo ze olo narary iaby.

³⁶ Nangataky Taminy ndrozy mba hafahan-drozy mikasiky ty sisin'akanjony avao, sady lako nikasiky rey zay ka le afaky.