¹ Tamy andro zay Jesosy nandeha niboaky ty tsano sady nipetsaky tamy sisy ty riaky. ² Nisy olo lako maré nivory niodidy Azy, ka le nilitsy tan-daka ao Ie sady nipetsaky tamy zay ao, laha nitsanga tamy sisin-driaky eo koa ty olo lako iaby. ³ akeo Jesosy nivola raha lako tamin-drozy tamy ty alala ty fanohara. Hoy Ie hozao: “Ingo, nisy mpamboly raiky nandeha niboaky handraraky voa. ⁴ Lafa nandraraky iny ie, le nisy voa ilany latsaky tamy sisin-dala eny, sady tamy voro rey ka ke nandrapaky rey. ⁵ Voa hafa rey ndraiky ro latsaky tamy ty tany be vato eny, ze tsy nahazo nofon-tany soa rey. direkita le nitiry rey, safe tsy laliky ty tany. ⁶ Fa lafa niboaky ty masoandro, le maiky rey safe tsy nisy fotony, sady le nalazo. ⁷ Nilatsaky tamy ty fatiky ro voa hafa rey. Nitiry fatiky rey sady nanasazy androzy. ⁸ Voa hafa nilatsaky tamy ty tany soa rey sady namoa voany, ty ilany nitombo zato, ty ilany enim-polo, sady ty ilany telo-polo. ⁹ Ze manan-tsofy, engao ie hijanjy.”

¹⁰ Tamy mpianatsy rey sady nivola an'i Jesosy hozao: “Nanino Iha ro miresaky amy olo lako rey amy ty alala ty fanohara?”

¹¹ Namaly Jesosy sady nivola androzy hozao: “Nareo ro namea tombony hahaiza raha-tsy hita ty fanjaka ty lanitsy rey, fa ho androzy ro tsy namea zay. ¹² Safe ndra ia ndra ia mana, le ho bey vatany aza ro hamea. Fa ndra ia ndra ia koa tsy mana, ndra ze hananany aza halà aminy. ¹³ Zay ro dika ty hiresahako amin-drozy amy ty alala ty fanohara: Ndra le manenty aza ndrozy, le tsy mahita; sady ndra le mijanjy aza ndrozy, le tsy maharé, ndra mahazo. ¹⁴ Amin-drozy ty hato-resaky Isaia ro tanteraky, ze mivola hozao: ‘Lafa mijanjy le haharé nareo, fe tsy hahazo mihintsy; lafa manenty le hahita nareo, fe tsy hahatakatsy.

¹⁵ Fa nanjary ty fo olo lako toy, sady mahery sofy ndrozy, sady napin-drozy ty masony, mba tsy hahita amy ty mason-drozy, ndra hahare amy ty sofin-drozy, ndra hahazo amy ty fon-drozy, ka le hivebaky ndraiky ndrozy, sady hanafajy androzy Zaho.’

¹⁶ Fa sambatsy ty masonareo, safe mahita; sady ty sofinareo, safe mahare. ¹⁷ Ambarako aminareo marina fa olo to-resaky noho olo-marina lako ro naniry ty hahita raha ze hitanareo rey, nefa tsy nahita an'i rey. Naniry ty hahare raha ze renareo rey rozy, nefa tsy nahare an'i rey.

¹⁸ Ka le mijanjy sady ty fanohara ty amy ty mpamboly raiky ze nandraraky ty voany. ¹⁹ Lafa misy mahare ty safa ty fanjaka nefa tsy mahazo zay, le niavy azy raty iny sady manombotsy ze nararaky ram-pony ao. Io azy voa nararaky tamy sisn-dala eny iny. ²⁰ Azy nararaky tamy ty tany be vato eny iny ro ty olo ze mahare ty safa sady direkita le mandramby azy am-pifalea, ²¹ fe tsy mbo miorim-paka anainy ao ie sady le tsy ela tsy ela avao. Lafa niavy ty fahoria ndra ty faniana noho ty amy ty safa, le malaky meloky ie. ²² Azy nararaky tamy ty fatiky eny iny, io ro ty olo ze mahare ty safa, fe ty fiahiahy ty tany iaby toy noho ty fitaky ty hanana ro manasazy ty safa, sady le nanjary tsy mamoa ie. ²³ Azy nararaky tamy ty tany soa iny, io ro olo ze mahare ty safa sady mahazo zay. Mamoa voankazo ie sady mahavy ty voa raiky, hanome mitombo mandilatsy zato ze nambole, ty ilany enim-polo, ty ilany mitombo telo-polo.”

²⁴ Nanoro fanohara raiky hafa tamin-drozy Jesosy. Hoy Ie hozao: “Ty fanjaka ty lanitsy ro manahaky ty lahilahy raiky ze nandraraky voa soa tamy baibony eo. ²⁵ Fa lafa niroro iny ty olo, le niavy ty fahavalony sady nandraraky voa-tsimparifary avao koa tamy vary rey ao sady nandeha. ²⁶ Lafa nitiry vary rey sady bakeo namokatsy boany rey, le niboaky avao koa voan-tsimparifary rey. ²⁷ Niavy mpiasa ty tompon-tany rey sady nivola taminy hozao: ‘Tompoko, tsy nandraraky voa soa tamy ty baibonao va iha? Nanino ie amy zao ro misy voan-tsimparifary?’

²⁸ Hoy ie tamin-drozy hozao: ‘Nisy fahavalo nanao zay.’ Hoasa mpiasa rey taminy hozao: ‘Ka le teanao va ty handehananay manombotsy androzy?’

²⁹ Azy tompon-tany iny nivola hozao: ‘Aha. Safe laha manombotsy tsimparifary rey nareo, le mety hanombotsy ty foto vary rey miaraky amy rey koa. ³⁰ Engao hiara-hitiry rozy roe zisiky amy ty fambolea. Amy ty fotoam-pambolea le hivola amy ty mpamboly zaho hozao: “Alao aloha ahi-draty rey sady fehezo ho fehy lako mba hanoroa androzy, fa avorio amy ty fipetsaham-bokatsiko ao koa vary rey.”’”

³¹ Bakeo Jesosy nanoro fanohara raiky hafa tamin-drozy. Hoy Ie hozao: “Ty fanjaka ty lanitsy ro mahahaky ty voatsinapy ze nala ty lahilahy raiky sady nararakiny tamy ty baibony eo. ³² Voa io tokoa ro voa kelikely bibiky amy ty voa hafa iaby. Fa lafa nitiry zay, le bevata noho raha-mitiry rey amy ty baibo ao. Nanjary hazo zay, mba hiavia ty voro ty lanitsy sady hanao ty tsanon-drozy amy rantsany rey eo.”

³³ Bakeo Jesosy nivola fanohara raiky hafa. “Ty fanjaka ty lanitsy ro manahaky ty lalivay ze nala ty ampela raiky sady nafangarony tamy lafariny intelo fameza zisiky-mampiakatsy ty foto-koba iaby.”

³⁴ Fanohara ro nambara i Jesosy raha-iaby rey tamy ty olo lako rey; sady tsy nivola ndra ino ndra ino tamin-drozy hafa-tsy tamy ty fanohara Ie. ³⁵ Zay ro mba hahantanteraky ze nivolany tamy ty alala ty to-resaky, lafa nivola Ie hozao: “Zaho hiloa-bava amy ty alala ty fanohara. Hivola raha ze tsy hita fa ela namboara ty tany iaby toy Zaho.”

³⁶ Bakeo Jesosy niala olo lako rey sady nana an-tsano ao. Nandeha aminy eo mpianatsiny rey sady hivola hozao: “Hazavao aminay ty fanohara mikasiky tsimparifary ty baibo iny.”

³⁷ Namaly Jesosy sady nivola hozao: “Azy mandraraky voa soa iny le ty Anan'olo. ³⁸ Ty baibo ro tany iaby zao; sady ty voa soa, ro ana ty fanjaka rey. Ty tsimparifary ro ana azy raty iny, ³⁹ sady ty fahavalo ze nandraraky androzy ro ty devoly. Ty fambolea ro ty fihafarà ty tany iaby toy, sady ty mpamboly ro anjely rey. ⁴⁰ Laha zay, manahaky ty amoria noho anoroa tsimparifary rey amy ty afo, ro anovy koa amy ty fihafarà ty tany iaby toy. ⁴¹ Haniraky anjeliny rey ty Anan'Olo, sady ho avorin-drozy hiala amy ty fanjakany raha iaby ze mahavy fahota rey, noho ze manao raty rey. ⁴² Ho atoran-drozy amy ty laforo bevata mirehitsy afo ao ndrozy, ze hisy ty fitania noho ty fikotsohan-ký. ⁴³ Bakeo hipiriaky manahaky ty masoandro amy ty fanjaka ty Baban-drozy ao ty olo-marina. Ze manan-tsofy, engao ie hijanjy.

⁴⁴ Ty fanjaka ty lanitsy ro manahaky ty hanana ze tsy hita amy baibo raiky ao. Nisy lahilahy nahita zay sady navony. Nandeha tamy ty hafaleany ie, namarotsy ze iaby nananany, sady nivily baibo io.

⁴⁵ Sady koa, ty fanjaka ty lanitsy ro manahaky ty lahilahy ze mpamarotsy mila voangy sarotsy vily. ⁴⁶ Lafa nahita voangy raiky ze tena sarotsy vily ie, le nandeha ka le namarotsy ze iaby nananany ka le nivily zay.

⁴⁷ Sady koa, ty fanjaka ty lanitsy ro mahahaky ty harato ze natoraky tan-driaky any, sady namory karazan-draha-manan'ay iaby rey. ⁴⁸ Lafa atsiky zay, le nisintony mpihaza rey ho amy sisin-driaky eo rey. Bakeo rozy nipetsaky ka le namory raha soa rey ho amy ty fipetsahany ao, fa raha tsy ilà rey koa narian-drozy. ⁴⁹ Hanahaky zay amy ty fihafara ty tany iaby toy. Ho avy anjely rey sady hampisaraky ty raty fanahy amy marina rey. ⁵⁰ Hatorakin-drozy amy ty fandoroa bevata mirehitsy afo ao ndrozy, ze hisy ty fitania noho fikotsohan-ký.

⁵¹ Azonareo va raha iaby zay?” Hoy mpianatsy reh taminy hozao: “Eka.”

⁵² Bakeo Jesosy nivola tamin-drozy hozao: “Laha zay ty mpanora-dalà iaby ze nanjary mpianatsy amy ty fanjaka ty lanitsy eo ro manahaky ty lahilahy tompon-tsano raiky, ze mampiboaky raha fa ela rey noho raha vaovao rey baka amy ty hananany ao.”

⁵³ Bakeo lafa nahavita fanohara rey Jesosy, le niala tamy toera zay Ie. ⁵⁴ Bakeo Jesosy nilitsy tamy ty taniny manoka ao sady nampianatsy olo lako rey tamy ty synagogan-drozy ao. Vokatsy zay le jilo rozy sady nivola hozao: “Baka aia ro ahazoa lahilahy toy ty fahendreny noho hatsereha rey? ⁵⁵ Tsy lahilahy io va ro ana azy mpandrafitsy iny? Tsy Maria va ro hikaiky ty reniny? Tsy Jakoba, Josefa, Simona, sady Jodasy va ro rahalahiny? ⁵⁶ Tsy miaraky amintsika va anabaviny iaby rey. Baka aia ro nahazoany raha iaby rey?”

⁵⁷ Neloky noho ty aminy rozy. Fa hoy Jesosy tamin-drozy hozao: “Tsy misy to-resaky tsy misy hajany laha tsy amy ty fireneny ao noho amy ty longony ao avao.” ⁵⁸ Tsy le nana hatsereha vey tao Ie noho ty tsy finoan-drozy.