¹ А ки андиавин саворе главна свещеникя тай народна старейшинес съвещиненас пес против Исус, за те мударен Лес. ² Тай като панле Лес, ингалде Лес тай предине Лес ко управители Пилат.

³ Тогава Юда, ковато прединясас Лес, като дикляс кай Исус уло осъдиме, разкаисало тай ирингяс о триянда сребърника ко главна свещеникя тай старейшинес, тай пенгяс: ⁴ Съгрешингьом, кай прединиом невинно рат. А он пенде: Амен со си грижа? Ту мислине лес. ⁵ Тай като чикяс о сребърникя андо храми, иклило тай гело, тай обесисало. ⁶ А о главна свещеникя лиле о сребърникя тай пенде: Нанай позволиме те товас лен ки храмово каса, понеже си цена ратескири. ⁷ Тай като съветвиненас пес, кинде ленца и грънчарово нива за паромнаске на чужденци. ⁸ Далкеске койка нива пенгяс пес Кръвно нива, сарто пенел пес жи авдиес. ⁹ Тогава изпълнисало о пендо чрез о пророк Еремия, ковато пенгяс: “Тай лиле о триянда сребърникя, и цена на Оценения Колес оценинде десаве таро израиляния, ¹⁰ тай дине лен за грънчаровата нива, според сарто заповедингяс манге о Дел.”

¹¹ А Исус зачило англал о управители; тай о управители пучляс Лес, като пенгяс: Ту о Юдейско Тагар ли синян? А Исус пенгяс леске: Ту пенес.

¹² Тай като обвининенас Лес о главна свещеникя тай о старейшинес, нищо на отговоринелас. ¹³ Тогава о Пилат пенгяс Леске: На шунес ли ките букиенге свидетелствинен против Туте? ¹⁴ Но Ов на отговорингяс леске ни иеке варесосте; чука че о управители чудинелас пес бут. ¹⁵ А секоне празникиесте е управителес сине обичай те мукел е народоске иекес таро затворникя, колес манген. ¹⁶ А тогава сине лен иек прочуто затворники, ко алав Варава. ¹⁷ Тай чука като уле кидиме, Пилат пенгяс ленге: Кас манген те мукав туменге- Варава ли или Исус пендо о Помазаники? ¹⁸ Понеже жанелас, кай от завист прединесас Лес.

¹⁹ Тай като бешелас ко съдийско престоли, лескири ромни бичалгяс жи лесте те пенен леске: Ма кер нищо Калке Праведникиеске; соскето авдиес бут страдингиом андо соиба ашал Леске.

²⁰ А о главна свещеникя тай о старейшинес убединде е народос те изпросинен Варава, а Исус те погубинен. ²¹ О управители в отговор пенгяс ленге: Колес таро дуи манген те мукав туменге? А он пенде: Варава.

²² Пилат пучляс лен: Тогава со те керав с Исус, пендо о Помазаники? Он саворе пенде: Те овел разпниме.

²³ А ов пенгяс: Че со канило кергяс? А он още по бут запищинде: Те овел разпниме!

²⁴ Тай чука Пилат, като дикляс, кай нисар нана помагине, а напротив, кай ваздел пес размирие, лилас пани, товгяс пе васта англал о народос тай пенгяс: Ме синиом невино за е ратеске Калке Праведникиеске; туме мислинен лес.

²⁵ Тай саворо народос в отговор пенгяс: О рат Лескоро нека те овел упрал аменде тай упрал амаре чадовиенде. ²⁶ Тогава муклас ленге Варава; а Исус маргяс тай прединяс Лес на разпятие.

²⁷ Тогава о войникия е управителескере ингалде Исус ки претория тай кидинде турял Лесте и цело дружина. ²⁸ Тай като нангярде Лес, урявде Лес лоли мантия. ²⁹ Тай кувде венеци таро каре, тай товде лес ко шеро Леске, тай товде тръстика ки десница Леске; тай като пеле кочиенде англал Лесте, асанас Леске, тай пененас: Здравей, Тагара Юдейски! ³⁰ Тай чунгаденас Лес, тай лиле и тръстика, тай чалавенас Лес ко шеро. ³¹ Тай след като опетнинде Лес, нангярде Лескири мантия, тай урявде Лес, Лескере шехя, тай ингалде Лес те разпнинен Лес.

³² А ко иклиба аракле иеке киринеецос, ко алав Симон; лес товде те пиравел о кръстос Лескоро. ³³ Тай като ресле иеке танесте, пендо Голгота, ковато значинел Лобно тан, ³⁴ дине Лес те пиел мол, ехмиме жлъчкаса; но Ов като вкусингяс, на манглас те пиел. ³⁵ Тай като разпнинде Лес, разделинде песке Лескере шехя, като чивте жребий!* ³⁶ Тай бешенас, тай пазиненас Лес оте. ³⁷ Тай товде упрал о шеро Леске о обвиниение Лескоро, пишиме ачука: Кавка си Исус, о Юдейско Тагар. ³⁸ Тогава сине разпниме Леса дуи разбойникя, иек отдясно тай иек отляво. ³⁹ А о колка кате накенас отар подигравиненас пес Леске, като клатиненас шере тай пененас: ⁴⁰ Ту, Ковато разрушинес о храми, тай трине диесенге пак съградинес лес, спасине Тут; ако синян Божие Чаво, ухли таро кръстос!

⁴¹ Също о главна свещеникя е книжникиенца тай о старейшинес асанас Леске, тай пененас: ⁴² Аверен избавингяс, апа Пес нащи избавинел! Ов си о Израилево Тагар! Нека ухлел акана таро кръстос, тай ка повервинас Лесте. ⁴³ Уповинелас пес ко Дел; нека избавинел Лес акана, ако си Леске угодно; понеже пенгяс: Божие Чаво синьом. ⁴⁴ Е същоне укуриеса асанас Леске о разпната да Леса разбойникя.

⁴⁵ А таро шесто сахати тъмнина покринелас цело пув жи ко девето сахати. ⁴⁶ А около о девето сахати Исус пищингяс силноне гласоса тай пенгяс: Или, Или, лама савахтани? Тоест: Девла Моро, Девла Моро, соске муклан Ман?

⁴⁷ Десаве таро бешле оте, като шунде, пененас: Ов викинел Илия.

⁴⁸ Тай веднага иек лендар прастанило, лилас гъба, топингяс ла андо шут тай като тогяс ла ки тръстика, диняс Лес те пиел. ⁴⁹ А окола пенде: Мук! Те дикас дали ка авел Илия те избавинел Лес. ⁵⁰ А Исус, като пищингяс пак силноне гласоса, издъхнингяс.

⁵¹ Тай аке, и завеса е храмиескири чиндили на две от упрал жи теле, и пув закелгяс, о скали париле, ⁵² о миморя путердиле тай бут теловя муле светииенгере уле възкресиме, ⁵³ колато, като иклиле таро миморя палал Лескере възкръснениесте, дине андо свето градос тай явисале на мнозина. ⁵⁴ А о стотники тай колка, кате заедно леса пазиненас Исус, като дикле о земетресение тай всичко, ковато ачило, дараниле бут, тай пенде: Наистина Кавка сине Чаво е Девлескоро. ⁵⁵ Оте сине още тай дикенас удурал бут ромня, колато следвиненас Исус тари Галилея, тай служиненас Леске; ⁵⁶ машкар коленде сине Мария Магдалина тай Мария, и даи на Яков тай на Йосий, тай и даи Зеведеевиенгере чавенге.

⁵⁷ Тай като ратило, ало иек барвало таро Ариматея, ко алав Йосиф, ковато също чука учинелас пес ко Исус. ⁵⁸ Ов ало ко Пилат тай манглас е Исусескоро телос. Тогава о Пилат заповедингяс те дел пес леске. ⁵⁹ Йосиф като лилас о телос, пакяргяс Лес шуже плащаницаса, ⁶⁰ тай положингяс Лес пере неве миморасте, ковато изсечингяс анди скала; тай като перагяс баро бар е мимораске ко вудар, гело песке. ⁶¹ А оте сине Мария Магдалина тай окоя Мария, колато бешенас мамуял о мимори.

⁶² Тай ко следващо диес, ковато сине о диес палал о приготовление за ко празники, о главна свещеникия тай о фарисея кидисале ко Пилат тай пенде: ⁶³ Господарю, динямамен годи, кай ковка измамники живдесте пенгяс: Слес трин диеса ка възкресинав. ⁶⁴ Заповедине о мимори те пазинелпес здраво жи ко трето диес, тена о ученикия Лескере авен тай те чорен Лес, тай те пенен е народоске: Възкръснингяс таро муле. Чука и последно измама ка овел по-канили тари първо.

⁶⁵ Пилат пенгяс ленге: Лен стража; жан завардинен лес сар жанен. ⁶⁶ Он геле тай завардинде о мимори, като запечатинде о бар с помощ тари стража.