¹ Tangwa Yesu a monele gimvuga gia athu, wa kandugile ha mulundu wadi tumbigile hoshi, alongogi ejile phene-phene nu mwene. ² Mwene wa kangudile kano, wa yandigile gu a longa egi:" ³ kiese gwa athu wanyi adi a sugami a mu gipheve, mukunda Gifumu gia Nzambi gidi giawo. ⁴ Kiese gwa athu wanyi adi mu dila, mukunda mba adi mu zula gikesa. ⁵ Kiese gwa athu wanyi adi nu mawete nu gu hima mukunda mba adi mu zula mavu. ⁶ Kiese gwa athu wanyi adi nu nzala nu luhungu lwa masonga mba adi mu kuta. ⁷ Kiese gwa athu wanyi a nu vila athu ako khenda, mukunda mba adi mu viya khenda. ⁸ Kiese gwa athu wanyi adi nu mitshima ila phe, mukunda mba adi mu mona Nzambi ⁹ Kiese gwa athu wanyi adi mu bata ngemba mba a tamegeya ana a Nzambi. ¹⁰ Kiese gwa athu wanyi adi mu moneseya phashi mukunda nu masonga, mukunda Gifumu gia Gosa gidi giawo. ¹¹ Kiese gienu kana athu adi gu mi monesa phashi, kana adi mu mi mbila mambo mu ndaga jikima jia bola, jia phila-nu-phila mukunda nu Eme ¹² mu khala mu kiese, kiese gia vula, mukunda mba mba mu zula mabula a vula Gosa, mukunda kaka phila imoshi a profeta a ha thomo wanyi a jingile gu twama diene a moneseye phashi ¹³ Enwe mudi mwa mungwa wa ha mavu; gula mungwa wa totesa gufula, phila khi gufula gwene gwa jiya gu vutudiya? Mungwa wene ushi go nu funu, khuta gu u bishila gonze mukunda athu a u diate. ¹⁴ Enwe mudi mwa mwanya wa ha mavu. Dimbo dinyi dia tungiya holo dia mulundu dia jiyile go guswegeya. ¹⁵ Giteso gimoshi, athu a nu lemesa go mwinda ha gu u haga goshia mulongo u moshi. Uvi a nu u haga holo dia gima mukunda u leze gieji-gieji gwa athu wanyi adi mu katshi dia gisapha. ¹⁶ Nganyi mu feto sema gu meso a athu, mukunda a mone isalo yenu ya bonga, enji a hane lukumu gwa shenu yonu udi Gosa. ¹⁷ Mu khadi go mu yindula egi Eme nge jile ha gu shiya shigo, to ba profeta (athu wanyi a zwelele ndinga ya Nzambi ha thomo); nga jile go mukunda nu gu jishiya, uvi mukunda nu gu ji lungisa. ¹⁸ Mu masonga ngu mu mi leza egi, gosa nu mavu mba gu balega, uvi ata gisono gi moshi gia zonda gia isono ya shigo mba gi katudiya go ti nu gu salama gwa ndaga jikima. ¹⁹ Hene yonu mukima mba ushiya shigo ya gubalega guzonda mu katshi dia shigo, nu udi mulonga athu ako ha gusala giteso gi moshi, mba ukhala muthu wa gubalega guzonda mu Gifumu gia Gosa, uvi muthu yonu wanu salela shigo jiene nu gu longa athu ako ha gusala giteso gi moshi mba ukhala muthu wa koma mu Gifumu gia Gosa. ²⁰ Ngu mu mi leza egi gula masonga enu a balegele go masonga a alongogi a shigo nu afalisaye, mba mu ngila go ata fioti mu Gifumu gia Gosa. ²¹ Enwe mwa vile egi, mu tangwa dikulu a zwelele egi:"gushiya ndo muthu", hene" konso muthu yonu mba ushiya muthu muko mba udi mu sambeseya". ²² Uvi Eme ngu mu mi leza egi, konso muthu yonu udi mu vila phangi enji khabu mba udi mu sambeseya, enji muthu yonu udi mu leza phangi enji egi udi wa muthu wa phamba " mba udi mu sambeseya gu twama dia gimvuga; konso muthu yonu mba uzwela egi" udi wa gikata" wa jiya gu tumiya gu tshiya twa bilungi" ²³ Phila imoshi gula udi mu bata makapo aye gu mesa-a- gimenga, enji wa yangiga gu yibuga egi udi nu ndaga nu phangi'aye, ²⁴ bemba dikapo diaye gu twama dia mesa-a-gimenga, vutuga udi vise thomo nu phangi'aye. Gu nyima vutuga uze uhane dikapo diaye ²⁵ Londa mu phushi-phushi ndaga wa fundiya, tangwa mudi thomo mu njila ha guya mu samba; mukunda gula muthu yonu wa gufundi wa gutwala gu mago a nzuji; nzuji mba uguhana gwa suta, ebuna mba udi mu gu ngidisa mu bologo. ²⁶ Mu masonga ngu mu gu leza egi: Eye mba uzogi go mu bologo ti nu tangwa mba umanesa gufuta mbongo ata jia ga gibende ga suga. ²⁷ Enwe mwa vile a zwelele egi: "wa jiyile go gusala uthambi". ²⁸ Uvi Eme ngu mu, mi leza egi, konso muthu yonu udi mu hatesa meso gwa mukwetu mu, moshi nu guvwa nzala ya gu mu tshigina, mwene udi mu katshi dia gusala uthambi mu mutshima nu mukwetu mwene ²⁹ Hene gula diso diaye dia gi tata didi mu gu twala ha gu tutana dibako, di katule, udi bishile gwa leha phene-phene n'eye, mukunda idi ya bonga gwa eye ha gu totesa gitshidi gia mwila waye ha gukonda gu totesa mwila waye wa mvimba gu bilungi. ³⁰ Gula koko diaye dia madia didi mu gu twala ha gu bulana dibako, batula koko diene udi bishile gwa leha nu eye; mukunda idi ya bonga mukunda nu eye ha gutotesa gitshidi gia mwila ha gukonda gutotesa mwila waye wa mvimba gu bilungi ³¹ A zwelele nji egi:" konso muthu yonu wa kaya mukaje'nji wa feto gu muhwa mukanda wa gushiya makwela ". ³² Uvi Eme ngu mu mi leza egi konso muthu yonu wa shiya makwela nu mukaje'nji, kaka mukunda nu uthambi, udi mu twala mukwetu mwene ha gusala uthambi; muthu mukima mba u kwela mukwetu gu nyima ya gushiya makwela udi mu sala uthambi. ³³ Mwa nu vwa nji egi a lezele a khakha jienu egi: "Wa jiyile go gu batula giba gia luvunu, ³⁴ uvi batula giba giaye gwa Fumu"gudia ndo giba mu jina dia Gosa, mukunda gosa gudi kiti gia Nzambi to mu jina dia mavu, mukunda mavu adi hama henji ha gu haga malu; ³⁵ to mu jina dia yelusalemi, mukunda didi Dimbo dia Fumu wa koma. ³⁶ Gubatula nji ndo giba mu jina dia mutwe waye, mukunda wa jiyile go gu balula lu sugi lu moshi lu bwe lwa phelegeta to lwa bwiyila. ³⁷ Tangwa udi mu zwela guzwela gwaye gu khale gwa kielega "Eya, Eya " nga ndo: "ndo ndo" ndaga jinyi jidi mudi yiga jia nu katuga gwa muthu wa bola. ³⁸ Enwe mwa vile a zwelele egi;"diso nu diso, dizo nu dizo". ³⁹ Uvi Eme ngu mu mi leza egi, mu hagi go gingolo-ngolo gwa muthu yonu udi muthu wa bola uvi gula muthu wa gu beta mbata gu butu diaye dia gitata, mwa bonga u mu baludile butu diko nji ⁴⁰ Gula muthu wa tshigina gu gu funda mu sambe, mukunda a gu tambule gazau, mu bembe a tambule nu gikhutu giaye. ⁴¹ Gula konso muthu yonu wa gubangiga ha gusala gitamina gia ba metelo funda-di-moshi, mwa bonga mu sale n"enji mafunda-a-yadi. ⁴² Hua muthu yonu udi mu gu lomba, gutuna ndo guhwa muthu yonu wa tshigina ha gu somba gima giaye ⁴³ Enwe mwa vile a zwelele egi:"Eye tshigina phangi'aye, uvi vweza mbeni waye " ⁴⁴ Uvi Eme ngu mu mi leza egi;" tshiginenu mbeni jienu, enji mu khala mu lombela athu wanyi adi gu mi monesa phashi, mu khala mu lombela lusagumunu gwa athu wanyi adi gu mi shinza. Mu sala mambote gwa athu wanyi adi gu mi vweza ". ⁴⁵ Nganyi mba mu kituga ana a Tata yonu udi Gosa, mukunda wa nu zola mwanya mukunda nu athu a bola nu gwa athu a bonga, wa nu nogesa mvula mukunda nu athu a kielega nu gwa athu a konda kielega ⁴⁶ Gula mudi mu tshigina khuta athu wanyi a nu mi tshigina, mabula khi mba mu zula? Ata tulagi twa nu futisa itadi twa nu kita nganyi, enwe mu khala mu kita ndaga jia gu a balega. ⁴⁷ Gula mudi mu hana mbote kaka gwa aphangi'enu, ndaga khi jia bonga mudi mu sala jia gubalega athu ako? Ata a aphagano adi mu kita giteso-gi-moshi. ⁴⁸ Hene, enwe mu khala mwa kuwa, phila Shenu wa gosa adi wa kuwa.