¹ Yesu wa twaleye mu temu dia zala fufuta gwa Pheve mukunda nu gu mu mega gwa Diabulu. ² Gu nyima ya gu tuna gudia ilumbu makumi a wana mwanya nu phipha, mwene wa vile nzala. ³ Mudimbi wa mu phusanele enji wa mu lezele egi: " Gula udi wa Muna Nzambi, leza maseso wawa a kituge mapha." ⁴ Uvi Yesu wa mu vutudile egi: " Ya sonegeye egi, "Muthu mba gwa jingila go kaka nu mapha, uvi gu ndinga yinyi idi mu zoga mu kano dia Nzambi." ⁵ Gu nyima diabulu wa mu tuphudile ha gu mu bata mu dimbo dia santu wa mu hagele hama ha gosa gwa leha holo dia inzo ya isambu ⁶ enji wa mu lezele egi: " Gula udi wa Muna Nzambi, di kwembe u bwe haha hoshi; mukunda ya sonegeye egi: " Mba udi mu leza ba wanjio enji ha gu gu keba" nu gu gu bata holo dia mago awo muphila egi kulu diaye dile gu tutana ndo gu seso." ⁷ Uvi Yesu wa mu vutudile egi: " ya sonegeye nji egi:" wa jiyile go gu dimba Fumiaye Nzambi." ⁸ Diabulu wa mu batele nji hama ha moshi ha gu balega gu leha wa mu monesele ifumu ikima ya haha hoshia mavu nu khembo ikima. ⁹ Wa mu lezele egi: " Nga mbo guhwa ima yiyi ikima gula wa fugama ha gu ngu hwa lukumu." ¹⁰ Yesu wa mu lezele egi: " Katuga haha, satana! mukunda ya sonegeye egi: " U feto hana lukumu kaka gwa Fumu Nzambi waye enji kaka mwene u feto salela." ¹¹ Gu nyima diabulu wa mu bembele muya ebuna ma wanjio ejile enji a yandigile gu mu salela. ¹² Tangwa Yesu a vile egi Yowani wa kwateye, mwene wa yile genji gu Galileya. ¹³ Tangwa a katugile gu Nazareti wa yile mu jinga gu Kapernaum gu khanda ya muta wa Galileya mu membo a Zabiloni nu Neftali. ¹⁴ Ndaga jiji jia bwile mukunda nu gu lungisa ndaga jia zwelele profeta Yezaya egi: ¹⁵ " Mavu a Zabiloni nu Neftali gu khanda ya muta wa mungwa mungwa ha sambwa dia Yolodani, Galileya nu ikanda ya aphagano! ¹⁶ Athu adi mu jinga mu katshi dia phipha a mona semo ya koma; enji wanyi adi mu jinga mu membo a givudi vudi gia nu bata lufwa, semo imoshi ya mi zogela." ¹⁷ Katuga mu tangwa diene, Yesu wa yandigile gu longa nu gu zwela egi: " Balulenu mitshima; mukunda gifumu gia gosa gidi phene-phene." ¹⁸ Mu phila a yandigile gu wenda mu khelelego ya muta wa mungwa wa Galileya, wa monele aphangi muyadi, Simoni wa nu tamegeya egi Phetelo nu Andele phangienji. A khalele mu kwemba wanda mu muta wa mungwa; mukunda a khalele enya gu lowa swi. ¹⁹ Yesu wa a lezele egi: " Zenu, ngu hatenu nga mbo mi bwisa enya gu lowa athu." ²⁰ Mu mbala imoshi, a bembele wanda wawo wa gu lowela a mu hatele. ²¹ Tangwa Yesu a khalele mu hata njila yenji, wa monele aphangi ako muyadi, Zake, muna zebede, nu Yowani phangienji. A khalele mu katshi dia wato nu Zebede shawo; a khalele mu londa wanda wawo. ²² Wa a tamegele mu mbala imoshi a bembele wato nu shawo hene a mu hatele. ²³ Yesu wa wendele mu dimbo dia Galileya dikima gu guya mu longa mu katshi dia jinzo jiawo jia isambu, mu longa sango jia gifumu nu gu belula misongo ikima nu ifu ikima ya khalele nu athu. ²⁴ Sango jienji jia phanzanele mu siriya ikima enji athu a khalele muza mu mu batela enya imbefu, nu wanyi a khalele nu phashi jia phila nu phila nu wanyi a imbefu ya phila nu phila enji, nu wanyi a khalele nu ba diabulu, nu wanyi a khalele mubwa gishidi nu wanyi enya khonzo; ebuna Yesu wa khalele mu a belula. ²⁵ Imvuga ya vula ya athu ya khalele mu mu hata katuga gu Galileya, gu Dekapolo, gu Yelusalemi, gu Yudeya ti nu gu khanda ya Yolodani.