¹ Ilumbu isambano gu nyima, Yesu wa zudile Phetelo, Yakobo nu phangienji Yowani wa a batele mu lwega ha mulundu wa leha. ² Gunu wa yandigile gu balumuga gu twama diawo. Meso enji a khalele mu sema phila ya tangwa, enji milele yenji ya balumugile ya phembe ole mwanya. ³ Mu tangwa diene Moyize nu Eliya ejile mu monega hene, a yandigile gu solula nu Yesu. ⁴ Petelo wa lezele Yesu egi:" Fumu idi ya bonga phila tudi haha. Gula wa tshigina, twa jiya gutunga isasa itatu, gi moshi giaye, gi moshi gia Moyize, gi moshi giko gia Eliya ⁵ Tangwa Petelo a khalele mu zwela tuta di moshi die jile mu a tshiga, ebuna ndinga ya zogele mu tuta diene egi: "Muthu yogu udi Munami nga tshigina mwa vula; ngudi nu kiese gia vula gwa mwene, mu khala mu mu vila. " ⁶ Tangwa alongogi a vile ndinga yene a vile woma wa vula. ⁷ Hene Yesu a phusanele phene-phene nu alongogi wa a kwatele, gu nyima wa a lezele egi;"Zugenu mu vi go woma!" ⁸ Tangwa a talele gosa a monele go ata muthu, kaka Yesu ha khenji. ^9-10 Mu phila a khalele mu bulumuga ha mulundu, Yesu wa a hwile shigo egi:"Mwa jiyile go gu leza ata muthu ndaga jinyi mwa katuga gu mona ti nu gilumbu mba a zugisa Muna-Muthu gu lufwa." Alongogi a hudile Yesu egi:" Mukunda nu ikhi alongi a shigo a nu zwela egi Eliya mba uza thomo?" ¹¹ Yesu wa a vutudile egi:" Mu masonga Eliya mba udi muza ha gu yidiga ndaga ji kima phila ji feto khala. ¹² Uvi Eme ngudi gu mi leza egi Eliya we jile gale mwa leha, ebuna athu a mu bagishile go, uvi a mu salele ndaga mu phila a tshiginile. Giteso gi moshi nji mba adi mu monesa Muna-Muthu phashi. " ¹³ Hene alongogi a bagisele egi Yesu wa khalele mu zwela mukunda nu Yowani-mubotigi ¹⁴ Tangwa ejile mu vutuga ha gu sanga athu, muthu mu moshi we jile gwa Yesu, wa fugamele gu malu a Yesu, ¹⁵ ebuna wa lezele Yesu egi: "Fumu munami udi nu gimbefu gia gu konia, mu vile khenda mukunda udi mu phashi jia vula. Mbala jia vula udi mu Konya nu gubwa ha tshiya to gu muta. ¹⁶ Nga mu bati gwa alongogi aye, uvi a monele go phila ya gu mu belula. " ¹⁷ Yesu wa vutudile egi: Enwe athu a tangwa didi mwa nu kwikila go, enwe athu mwa jimbila njila ya bonga! Ma tangwa gutshi mba ngu khala n'enu ha gu mi kangela mutshima? Ngu batelenu mona mwene haha. ¹⁸ Yesu wa balele pheve yene ya bola, hene ya zogele gwa mona mwene, kaka mu tangwa diene mona mwene wa belugile. ¹⁹ Hene alongogi a hudile Yesu tangwa a khalele ene ha khawo egi:" Mukunda nu ikhi ta monyi phashi ha gukaya pheve yene ya bola? " ²⁰ Yesu wa vutudile egi: " Mukunda mu shi nu lukwikilu lwa gu lunga go. Ngudi gu mi leza ndaga jia masonga: gula nga mwa khala nu ga lukwikilu ga koma gifwa ga bundu ga mutshi wa mutarde, mwa jiya gu leza mulundu wuwu egi: "katuga haha, nda u bwe gunu " mulundu wene guya sha, enji Nga mwa nu sala ndaga jikima!" ²¹ Pheve ya phila inyi ya nu zoleya kaka mu njila ya isambu nu gutuna gudia ha gusamba Nzambi " ²² Tangwa alongogi a vutugile gu Galileya, Yesu wa a lezele egi:"Muna-Muthu mba udi mu haneya gu mago a athu, ²³ ebuna athu mba adi mu mu shiya uvi mu gilumbu gia tatu, Nzambi mba udi mu mu zugisa gu lufwa ", hene khenda jia vula jia kwatele alongogi. ²⁴ Mu tangwa Yesu nu alongogi a kumile mu dimbo dia Kapernaum, tulagi twa nu futisa itadi mu inzo-Nzambi twe jile mu hula Phetelo egi:" Keti Longi wenu wa nu futa gitadi gia inzo-Nzambi? " ²⁵ Phetelo wa vutudile egi:"Eya! wa nu futa. Tangwa Phetelo a ngidile mu inzo, Yesu wa mu hudile muthu wa thomo egi:" Simoni, ikhi udi mu yindula? A kwatshi a nu futa gitadi gia mafumu a hoshia mavu? Ana a mu dimbo nga a nzenza?" ²⁶ Phetelo wa vutudile egi:"Nzenza jia nu futa " Yesu egi " Gula idi nganyi, ana a mu dimbo a jiyile go gufuta gitadi. ²⁷ Uvi ha gutuna guhwa a Afutisi a itadi phashi, idi ya bonga u ye mu gijiba u sonona ndobo u Lowe, iswi ya thomo wa mbo kwata u zule gibende gi moshi gia mbongo, tangwa wa mbo kangula kano dia iswi yene; u ze u fute gitadi.