¹ Kahiza tsiku zizo Johana mubatizaji were achihubirikahiza nyika ya ya Yudea achaamba, ² "tubuni kwa kukala ufalume wa Mulunguni u vhevhi," ³ kwa kukala yuyu ndiye ariyenenwa ni nabii Isaya, achiamba, "sauti ya Mutu aihaye kula jagwani, 'ikani tayari njira ya Bwana, igoloseni mikondo wa kwakwe."

⁴ Hikara Johana wavala nguo za nyoga za ngamira na ukanda wa chingo chununi mwakwe. Chakurya cha kwakwe were ni nzije na nyuchi ya tsakani. ⁵ Kisha Jerusalemu, Yudea yosini, na lalo rosini rizungulukaro muho wa jorodani achimwendera iye. ⁶ Were achibatizwa ni iye kahiza muho wa Jorodani, achitubu dambi zao.

⁷ Ela arivho aona mafarisayo anji na masadukayo achidza kwakwe kubatizwa, achiamba Ao, "Mwino chivyazi cha nyoka chenye sumu, nyani ariye aonya kuichimbira gadhabu idzayo? ⁸ Vyalani matunda gapasago toba. ⁹ Na musiaze na kuambirana kahiza mwimwi, 'Hunaye Iburahimu dza beyehu,' kwa kukala nina mwambira Mulungu yunauwezo wa kumuunurira Iburahinu ahoho kahiza mawe gaga. ¹⁰ Kare tsoka ridziikwa kahiza kolo ra muhi 'kwa vivyo kila muhi usiovyala matunda madzo nikukatwa na kutsuvhiwa kwenye moho.

¹¹ Nina mubaatiza kwa madzi kwa ajili ya toba. Ela iye adzaye badala ya mimi ni mukulu sana kuriko Mimi, na Mimi sistahili hata kutsukula virahuvye. Iye yundamubaatiza kwa Roho mutakatifuna kwa moho. ¹² Na kuvheta kwa kwakwe ku mikononi mwakwe kusafisha kamare lwandalwe na kuikusanya ngano ye lutsagani. Ela yundaocha mavhevhe kwa moho urio kauweza kuzimika.

¹³ Kisha Jeso achidza kula Galilaya muhadi muho wa Jorodani achibakitizwa ni Johana. ¹⁴ Ela Johana wahenza kumuzulia achiaamba, "mimi nahenza kubatizwa ni uwe, nawe unadza kwangu?" ¹⁵ Jeso achimujibu achimwaamba, "ruhusa ikale vivi kare, kwa kukala ndivyo ihenzekanavyo kuitimiza haki yosi." Kisha Johana achikubali.

¹⁶ Baada ya kubakitizwa, mara Jeso achiombola madzini, na lola, mbingu zichimufunukira kwakwe na achona Roho wa Mulungu achitserera here mufano wa ngia manga na achihurira dzuluye. ¹⁷ Lola, sauti ichiombola Mulunguni ichinena, "yuyu ni mwanangu muhenzwi. Nafairwa niiye muno.