5

1 Jishu dou Khrista ra gaphrā rabou mehdou, Shuri veyna̠ng sehra vey gala̠ngtou. Beipuh na̠nh lūnley rabou mehdou beinār na̠nhli lūnleythei ra ba̠lengnei,

2 Alih nanh Shuri na̠nh lūnleye nīnnih rapudou ngaktatu Shuri naarbou na̠nh lūnleyeou rapu alih nanh theiu.
3 Nīnnih rapu na̠nh ngakrapu dou Shuri na̠nh lūnley rapucha thatau, Nīnnih rapu na̠nh ngakrapu dou ka̠sa̠k ka̠hrou.
4 Shuri naarbou mehnanh nōnnōpu na̠nh yokthau, nōnnōnpu na̠nh yokrapu dou alihvey gaphrārapu naangtau.
5 Chhuenaar nanh nōnnōnpu na̠nh yokrouu? Jishu na̠nh Shuri naar lapouragaphrā rabou mih ka̠hruehnee?
Jishu Khrista vey shaakhi

6 Doupu mihpu nanh diruenaang ka diyinaang rarapu mihdou beitau. Dirui naangta ka̠hrou, aley dirui naang ka diyinaang raravey-u. Shaakhi sarapu nanh Ma̠nglhaa gathengpu dou gadhunpou ra shaakhi saravey-u.
7 Doupurā zang-a phāwnna̠nh beipuh thakeh, Gathenpu dlo thakeh, ka Ma̠nglhaa gathenpu thakeh ra shaakhi sarapu ka̠chhuin ngouuyeou, doupu ka̠chhuin dou thakitau.
8 Dilei mana̠nh leh, Ma̠nglhaa gathenpu thakeh, dirui thakeh, ka diyi thakeh ra shaakhi sarapu ka̠chhuin ngouu yeou. Doupu ka̠chhuin dou chankitau.
9 Dimih vey shaakhi na̠nh gaphrā tatu Shuri vey shaakhi na̠nh ka̠lengnei gaphrā veiyeo, atui hwangza rapu shaakhi nanh Shuri dou beinār lapu vey chuin shaakhi sakou lēnravey-u.
10 Shuri naar lapu na̠nh gaphrārapu mihdou pashung na̠nh doupu shaakhi garok ravey-u. Shuri na̠nh gaphrā mukbou mihnanh Shuri na̠nh ka̠ywei twēnmey-u. Chhourārouurapuli Shuri nanh beinār lapu vey chuin shaakhi sarapu dlo na̠nh doupu mihdou gaphrācha ngouuyeou.
11 Shaakhi sarapu nanh Shuri dou alihlhaa ka̠ra̠ng vey ma̠nglhaani doupu ma̠nglhaa douli beinār lapu kukna̠nh ngouuyeou.
12 Beinār lapu na̠nh garok rapu mihdou ka̠ra̠ng ma̠nglhaa garok keiu, aley Shuri naar lapu na̠nh garok chirapu mihdou ka̠ra̠ng ma̠nglhaa garokchau.
13 Shuri naar lapu na̠nh gaphrārapu namehnanh ka̠ra̠ng vey mihdun dou napewnsuih naang garoktou rapu thei valhaapān heypu chuinmoū namehlhaa hananh yakloneiu.
14 Alih nanh Shuriza̠kron na̠nh lunhban rapudou alih nanh ngūnrapu chennih rapucha rakita fingtatu Shuri nanh tla̠nsan niu.
15 Chwēnjwen rapu dlo moū tla̠nnih rapudou alih nanh theitatu, Shuri za̠kron na̠nh alih nanh fingrapu garok kei rapu theiyeou.
16 Chinārbou thakinanh thakina̠nh shiivapu ngāmukpu diywēn sarapu thakinanh theitatu beinanh chwēnjwen ba̠lungyeo. Shiivapu diywēn samukboulhaapān Shuri nanh mihdun ka̠ra̠ngdou niu. Aley diywēn ngouurabou lhaapān chwēnjwen nihrouu. Shiivapu chwēnjwen nihrouu ra hwangra vey ka̠hrou.
17 Dhunmukpu yeimoūdou diywen-u. Hroulisaashi thuihrapu diywēng ka̠hrou.
Dlopeh

18 Shuri naarbou mehdou diywēn sacha rapu alih nanh theiyeou. Shuri naarbou nanh pananh pana̠nh kōnrapu nganaang ka̠swei nanh doupu naarna̠nh shonkeh rāchau.
19 Alih nanh Shuri vey mihdou rapu theiyeou. Nōnōnpu mih gama̠ngji ka̠shipu dirāwu vey kukna̠nh ngouu yeou rapuli alihnanh theiyeou.
20 Shuri naar lapu nanh raye gadhunpu Shuri na̠nh theirapu loshanleh alihlhaa nihrapuli alih nanh theiyeou. Gadhunpu Shuri ka beinārlapucha alihnanh tasa ngouuyeou. Beinanh gadhunpu Shuri u. Ra̠ngya̠n rapu ma̠nglhaau.
21 Anārboumehda, ba̠muk na̠nh khohruim rapu na̠nh khareng rouu.