4
Shuri vey Ma̠nglhaa ka lhahsāpu ma̠nglhaa

1 Lūngaleybou mehda, Ma̠nglhaa moūji na̠nh kagaphrā nihrouu. Ma̠nglhaa mehdou Shuri veyni Shuri vey ka̠hruihrouu rapu nameh nanh dwenza̠nrouu. Chhourārouu rapuli ka̠ywei vey phonnih rabou mehdou leimā gabouna̠nh latou.

2 Shuri vey Ma̠nglhaa na̠nh ka̠hrā theitha rouu rapuli nōnōnpumihsayera rarapu Jishu Khrista na̠nh hwang peh rapu Ma̠nglhaa dou Shurivey-u.
3 Nōnōnpu mihsayera rarapu Jishu Khrista na̠nh hwangpekmukpu Manglhaa dou Shurivey ka̠hrou-u. Doupu ma̠nglhaa dou nameh nanh yuehza raba̠lengnei heypu leimāgabou na̠nh rayerapu nganaang atui rangouu rapudou Khrista cha gakhā rapu ma̠nglhaau.
4 Lūngaley bou mehda nameh dou Shuri vey-u. Doubou na̠nhleh yolotou. Chhourārouu rapuli nasarkpa ngouurapu mihdou leimagabou sarhpa ngouurapuna̠nh ka̠lengnei kareipou.
5 Doubou mehdou leimagabou vey rapu nganaang leimagabou chhuindou hwangthei yeou. Nōnōnpu mih douli doubou dlo dou tla̠nyeou.
6 Alihmehnanh Shuri vey-u. Shuri na̠nh thei rapu mihdou alihdlo tla̠nngūn yeou. Shuri vey mih ka̠hrueh rabounanh alih dlo dou tla̠nchau. Doupu na̠nhdou alihnanh sueye gadhunpu ma̠nglhaaleh, ka̠yweipu ma̠nglhaaleh theiloyeou.
Lūngaleypu na̠ng Shuri na̠nh thei rapoh

7 Lūnley rabou mehda alih nanh thakinanh thakina̠nh lūnley rouu. Chhourārouu rapuli, lūngaley dou Shuri vey-u. Lūnley theirabou mehdou Shuri vey naang salorabou meh-u. Shuri na̠nhleh theirapu mih-u.
8 Lūngaley ngouu mukpu mihdou Shuri na̠nh theicha-u, chhourārouu rapuli Shuri heydou lūngaleypou.
9 Beinārlapu ngana̠ng alih nanh ka̠ra̠ng ma̠nglhaa garok valhaapān Deimei Shuri nanh thakita rapu bei nārlapu na̠nh nōnōnpu phāwnna̠nh ka̠swey rānih rapunaang alih na̠nh prinnei lūngaleydou gathei nihratou.
10 Alih nanh Shuri na̠nh lūnleyyeou ra hwangchou. Shuri nanh alihna̠nh lūnleyyeou, alih vey diywēn zaangnih valhaapān beinārlapu na̠nh ka̠swey rānihrapu na̠nh lūngaley ngouuyeou.
11 Lūngaleybou mehda, Shuri nanh alih na̠nh heyaki naangngaapa lūnley tatu alihli thakinanh thakina̠nh lūnley ba̠lungyeo.
12 Shuri na̠nh chhuenanh tali theichou. Hrouli thakinanh thakina̠nh lūnley tatu Shuri nanh alihcha ngouu ye alih nanh lūngaleypu naang phreydanra ngouuyeou.
13 Shuri nanh Ma̠nglhaa gathenpu vey chennih rapudou alihlhaa nihrapu nganaang alihnanh Shuri cha tasa ngouura ba̠lengnei Shuri nanh alihcha tasa ngouyeou rapu theiyeou.
14 Nōnōnpu mihna̠nh gannih rapu mihpu sava lhaapān Beipuh nanh beinārlapu na̠nh ka̠swey rapudou alih nanh theiye shaakhi sayeou.
15 Jishu dou Shuri nārlapoura hwangpeh rabou mehdou Shuri cha ngouuye, Shuri douli douboucha ngouu yeou.
16 Shuri nanh alih na̠nh prinrapu lūngaley na̠nhdou haananh theiye gaphrā yeou. Shuri heydou lūngaleypu mihpou. Lūngaley tangouu rapu mihdou Shuri cha tasa ngouuyeou. Shuri nanhleh beicha tasa ngouuyeou.
17 Douhrā alih nanh lūngaley naang phreydan rapu nganaang pichehrisarapu zaangna̠k naang jirapu ngouu chau. Chhourārouu rapuli nōnōnpu phāwn na̠nh alih nanh Deimei ba̠lengtau.
18 Lūngaley na̠nh jirapu ngouuchou. Jirapu nanh lunh saaphānye nāka̠naa nihrapu nganaang kaken rapu lūngaley dou lunhphānrapu na̠nh rengzen thau. Jirapu mihdou lūngaley na̠nh kaken paleiu.
19 Shuri nanh alihna̠nh lūnley khuk rapu nganaang alih nanh Shuri na̠nh lūnleyravey-u.
Shuri vey nīnnih rapoh

20 Dimih thaki nanh ha Shuri na̠nh lūnley yeoura hwang mēnkou beichi nārpu na̠nh lūnley chitatu doupu mihdou nihgalehpu mihdou. Theiye ngouurapu chinārbou na̠nh lūnley chitatu theipali rapu Shuri na̠nh ka̠hrā lūnley tharouu.
21 Shuri na̠nh lūnley rapu mihdou pachinārbou na̠nh lūnley ba̠lungyeou ra nīnnih rapudou Khrista vey na̠ng garoktou.