¹ Paikite kitamunyo cha lisoba lya sabato, liumu lyabile liyomoka, kuyenda lisoba lya kwanza lya wiki, Mariamu magdalena, na yolo Mariamu ywenge batiisa kulilolekeya likaburi. ² Linga pabile na lilendemo ngolo, kwa kuwa malaika ba Ngwana atiuluka na kulimbilingiya lelo liwe, na kulitamya. ³ Sura yake yatimelemetya kati umeme, na ngobo gake gabile gai'uu kati theluji. ⁴ Balo alinzi kabayogopa muno no panga kati batiwaa. ⁵ Yolo malaika kaabakiya balo alwawa kabaya, "Kana muyogope kwa mana nitangite sa mukipala Yesu, ywasulubilwe. ⁶ Abile kwaa pano, ayokile kati mwaamakiye, Muiche mulole pandu agonjike. ⁷ Muyende upesi mukaabakiye wanapunzi bake, 'Ayokile boka mu kiwo, linga alongwiye Galilaya akwo ngamwalowa kumona.' Linga nenga niamakiye."

⁸ Balo alwawa boti baboite palo palikaburi upesi babile na hofu ni puraha ngolo, na kababutuka kwabakiya wanapunzi bake. ⁹ Linga Yesu kakolyana nabo no baya, "Salamu." Balo alwawa batiisa kunkamwa magolo gake, na kumwabudu. ¹⁰ Yesu kaabakiya, "Kana muyogope, muyende mukaabakiye alongo bango balongoli Galilaya. Akwo banibona.

¹¹ Wakati balo alwawa babile kabayenda na baadhi ya alinzi bayei mjini no kuabakiya akolo ba Makuhani makowe goti gabile gapangike. ¹² Na makuhani pababile bakwembine na apindo na kulijadili likowe lee pamope na bembe, papiyite mbanje yanansima kwapeya balo alinzi, ¹³ no kwabakiya, kana mwabamakiye bandu panga, wanapunzi bake Yesu baisi kilo kujiba ntwii wa Yesu wakati twenga tugonjike.' ¹⁴ Abali yee mana itei kwa liwali, twanga twenga twalowa nshawishi na kumoya mwenga mashaka goti." ¹⁵ Kwa eyo balo askari kabaipokya yelo mbanje na panga kati mwababakiye. Habari yee yatitangazilwa muno kwa Ayahudi na baaminiya nyoo mpaka leno.

¹⁶ Lakini balo mitume komi na jimo bayei Galilaya, palo pakitombe payomwi kwabakiya. ¹⁷ Na bembe pabamweni, batikumwabudu, ila baadhi yabe babile na mashaka. ¹⁸ Yesu aisile kasabe kabakokeya no baya, "Nipeyilwe mamlaka goti ga kilambo na kumaunde. ¹⁹ Kwa eyo muyende mukabapange mataifa goti kuba wanapunzi bango. Mukaabatize kwa lina lya Tate, na lya mwana, na lya Roho mpeletau. ²⁰ Muapundishe kugatii makowe goti ganibaamuru, Na linga, nenga nibile pamope na mwenga masoba goti, mpaka mwisho wa dunia.