¹ Yesu atiboka muhekalu kayenda kachake. Wanapunzi bake kabayendelya na kunangwa majumba ga hekalu. ² Lakini atikwayangwa na kuabakiya, "Je! Mugabona kwaa makowe gote? Kweli nenda kuwamakiya, ntopo liwe lyalyalowa igala lingelekine na lenge lyalyo kotoka bomoyelwa."

³ Na paatami pa kitombe cha mizeituni, anapunzi bake batekunyendelya ku faragha no baya, "Utubakiye, makowe gagapitya pakibawi? KInamani chachapanga dalili ya buya kwako na mwisho wa dunia?

⁴ Yesu kayangwa na kubaya, "Mube mwatulivu panga kana aiche mundu kumwobeya. ⁵ Kwa kuwa baingi balowa icha kwa lina lyango. Balowa baya nenga na Kristo, nabalowa kwa obeya banyansima. ⁶ Mwalowa yowa ngonda na habari ya ngondo. Mulinge kana mube na masaka. Kwa kuwa makowe aga galowa petya, lakini mwisho ubile bado. ⁷ Kwa kuwa litaifa lyalowa kombwana na lyenge, na pwalume hayo ayumana na upwalume. Paba na njala na matetemeko ga nnema muma'eneo mbalembale. ⁸ Lakini makowe ago gote nga mwanzo wa uchungu wo beleka. ⁹ Nga walowa kwapotwa kwaajii yo kwatesa ni kwabulaga. Mwalowa chukilwa ni mataifa gote kwa sababu ya lina lyango. ¹⁰ Ni banansima balowa kobala na salitiana na chukyana bene kwa bene. ¹¹ Manabii banansima baubocho baicha ni kuabocholiya baingi. ¹² Kwa mwanza ubaya waba wananchima, pendana kwa bandu kwopola. ¹³ Lakini ywapumiia mpaka mwisho alowa okoka. ¹⁴ Yeno Injili ya upwalume yalowa hubiriwa mu kilambo choti panga uushahidi kwa mataifa gote, Hapo nga ulo mwisho wa icha.

¹⁵ Kwa eyo pamwaubweni ubou wouharibifu, lyalabayitwe ni nabii Danieli liyemi pandu patakatifu (ywosoma atange), ¹⁶ Nga balo babile Yuda bayende mu'itombe. ¹⁷ Nga ywabile nnani ya nyumba auluke kwaa pae kutola kilebe chochote buka nkati ya nyumba. ¹⁸ Nga ywabile kung'unda kana abuyangane kuisa tola ngobo yake. ¹⁹ Lakini naasikitikya bene bana na babayongea wakati woo. ²⁰ Mulobe butuka kwinu kana kube wakati wa mbepo, wala lisoba lya sabato. ²¹ Kwasababu kwabaa dhiki ngolo, ayo inapilya kwa buka umbilwa dunia mpaka saayeno na wala yapitya kwa kae. ²² Ikapangage machoba gakakotoka pungoyelwa, ntopo mundu ywapele okoka. Lakini kwa mwanja atente, masoba go galowa pongoyelwa. ²³ Kae mana itei mundu ywoywoti alowa kumakiya 'lola, Kristo abi pa! Au 'Kristo abi kulo, kana mwaamini makowe go. ²⁴ Kwa sababu Makristo ga ubocho na manabii ga ubocho walowa icha na kulaya ishara ngolo na maajabu, kwa kusudi lya kwaobeya, yawezekana na hata kwa babachaulilwe. ²⁵ Mulole, nitikwatahazarisha kabla makowe go pitya. ²⁶ Kwa eyo, mana bammakiya, "Kristo abikupongote, kana mwayende kwo kupongote. Au lolekeya, abile nkati ya nyumba, kana mwamini ago. ²⁷ Kati njai paimulika kebuka mashariki no mulika mpaka magharibi, ngayopanga isa kwa mwana wa Adamu. ²⁸ Popote ubile mzoga, apo ngaba twelwana tai.

²⁹ Lakini baada ya dhiki ngolo ya lisoba lyo, lisoba lya banalubendo, mwei wabakwa na bweya wake, ndondwa yalowa tomboka buka kunani na ngupu ya kumaunde yalowa tikiswa. ³⁰ Nga ishara ya Mwana wa Adamu yalowa bonekana kumaunde, na makabila yoti ya dunia yalowa lombola. Balowa kunoma mwana wa Adamu kaicha mumaunde ya kunani kwa ngupu ya utukufu nkolo. ³¹ Alowa kwatuma malaika bake kwa lilobe likolo lya tarumbeta, nabembe balowa kwa kubya pamope ateule bake buka ipande ncheche ya kilambo, buka kumwisho wa kilambo mpaka mwisho.

³² Mwiyanganee lisomo buka munkongo mtini. Pamwibona ndambe keipuka kagabita makapi, mutangite panga mpenja wenda icha. ³³ Na yo kai, pamwagabona makowe gote mpalikwa tanga panga aegelile, karibu abi paniango. ³⁴ Kweli nenda kuwamakiya, mmelekwogo ubeta kwaa, hata makowe ga ngote galowa pitya. ³⁵ Mbingu na nnema walowa peta, lakini maneno yango yapeta kwaa kamwe. ³⁶ Lakini husu lisoba lyoo na saa ntopo mundu atangite hata malaika ba kumaunde, wala mwana ila Tate kichake. ³⁷ Kati mwayabile wakati wa Nuhu, nga mwaba wakati wa buya mwana wa Adamu. ³⁸ Kwa mwanja masoba ago kabla ya gharika bandu babile kabalyaa no nyaa, kaba kobekana konda mpaka lisoba lelo lyajingii Nuhu musafina, ³⁹ na batangite kwaa kilebe chochote mpaka garika paisile na kwakumba bote nga mwayaba icha kwa mwana wa Adamu. ⁴⁰ Nga bandunabele baba kung'unda-yumo alowa tolelwa na ywenge kalekelwa. ⁴¹ Alwawa abele balowa bakusangi pamope yumo atolelwa na ywenge kalekelwa. ⁴² Kwa eyo, mube mminyo kwa mwanja mutangite kwaa lisoba gani lwabuya Ngwana witu. ⁴³ Lakini mutangite panga, ipangite mwene nyumba akatanga saa ilenga mwii apala icha, apelekeleka na alowe yeketya kwa nyumba yake bamomwe. ⁴⁴ Kwa eyo, mupalikwa ba tayari, kwo panga mwana wa Adamu alowa isa kwa masaa ga mukotwike tanga.

⁴⁵ Tubwe nyai ywabii mwaminifu, mmanda mwene lunda, ywapeyilwe madaraka na Ngwana kwa babile munyumba yake, linga apei chakulya kwa muda wofaika? ⁴⁶ Atibarikiwa mmanda ywoo, aywo Ngwana wake alowa kukolya kapanga nyoo papala buya. ⁴⁷ Kweli nenda kumakiya Ngwana na alowa kum'beka kunani ya kila kilebe cha kibii chake. ⁴⁸ Lakini mana itei mmanda mmaya kabaya pamwoyo wake, 'Ngwana wango atiselewa. ⁴⁹ Nga tubwa kwakombwa atumishi bake benge, na kalya na kalobya wembe, ⁵⁰ Ngwana wake mmanda ywoo palowa isha lisoba lyakotwike tanga, na saa yakotwike tanga. ⁵¹ Ngwana wake alowa kunketani ipande ibele na kummeka nafasi yimo na anafiki na kwaba na kilelo no taunya mino.