¹ Yesu na anapunzi bake baikite karibu na Yerusalemu na bayei mpaka Bethfag, kukitombe sa mizeituni, Boka po Yesu ngatumite anapunzi bake abele, ² Kabakokeya, "Muyende kukijiji cha kibii nnonge, na mwalowa kummona mwana wa mbonda bantabite palo, mukamwunde na kuniletya. ³ Mundu mana kanaluya mwammakiye, 'Ngwana indakumpala' na mundu ywo alowa kunneka na mwuiche nakwe."

⁴ Likowe lyoo lyapiti lyalibaite nabii lazima litimye. Kabakokeya, ⁵ Mum'bakiye mwale Sayuni. Linga, mpwalume wako endaicha kachinu, mnyenyekevu na ampoki mwana wa mbonda, mwana wa mbonda mnele.

⁶ Mwisho anapunzi bati buka no panga kati Yesu mwalangile. ⁷ Baneti mbonda na mwana wake, no tandika ngobo na Yesu ngampokya. ⁸ Bingi nkati ya bandu balandike ngobo yabe mundela na benge batekwi matawi ga mikongo no tandika mundela. ⁹ Kipenga satilongolya Yesu na babamwindikiyae kabayoba, kabaya, "Hosana Mwana wa Daudi umebarikiwa ywaisa kwa lina lya Ngwana. Hosana kunani muno.

¹⁰ Yesu paikite Yerusalemu, mji woti watishtuka no baya, "Hayo wa nyai?"

¹¹ Kipenga chayangwa, "Hayo nga Yesu nabii, boka Nazareti ya Galilaya."

¹² Na mwisho Yesu ajingii mu'nyumba ya ibada ya Nnongo. Atikwapiya panja bote bababile kabapema no mpemeya mu'hekalu. Nga nokwa meza yabang'andae kamali na itengo ya babapemeyange ngunda. ¹³ Kabakokeya, "Yaandikilwe, nyumba yango yalowa kemelwa ya maombi. Lakini mwenga mwipangite lipango lya anyang'anyi."

¹⁴ Boka po ipofu ni ilema batikumwisilya muhekalu, ni ywembe atikwaponiya. ¹⁵ Ila apindo ba makuhani na aandishi pababweni maajabu agapangite, na pabayowine bana kabapanga ndoti muhekalu na kubaya, "Hosana mwana wa Daudi," batikasirika muno.

¹⁶ Batikumakiya, "Uyowine chabakibaya haba bandu?" Yesu ngabakiya, "Elo! Lakini muna wai kwaa soma, buka munkano wa aba bana na bana alele baba yonga benda sifu kinanoga?"

¹⁷ Boka po Yesu atikwaleka no yenda panja ya nnema akwo Bethania na agonjike kwokwo kwo.

¹⁸ Kindae kabuyangana, boka mjini, abweni njala. ¹⁹ Abweni mtini bwega ya ndela. Atikuuyendea, lakini alibweni kwa litunda nnani yake ila makapi, atikuubakiya, "Buka lino kana wapambike kae." Na mtini wene watiyoma.

²⁰ Wanapunzi pababweni, batishangala no baya, "Ibi kitiwi mkongo utiyoma mara jimo?

²¹ Yesu kayangwa no kwabakiya, "kweli nenda kwamakiya, mana mubile na imani bila mashaka, mwalowa panga zaidi ya nkongo, mwalowa kukibakiya kitombe chelo kiboke kikatumbuki mu'bahari, ni yalowa pangilwa. ²² Chochote cha mwaloba kwo salya, mana muaminile mwalowa pakya."

²³ Yesu paikite muhekalu, apindo ba makuhani na apindo babandu batikunyendelya wakati kapundisha na kunnaluya, "Kwa ngupu gani upanga makowe aga? Na nyai ywakupei mamlaka ago?

²⁴ Yesu kayangwa na kuamakiya, Na nenga mbala kwanaluya linga liswali limo. Mana mwalowa kunibakiya, na nenga nilowa kuwabakiya na kwa ngupu ilenga nipangite makowe aga. ²⁵ "Ubatixo wa Yohana waboka kumaunde au kwa bandu?" Kabakokeyana bene, kababaya, mana tubaye uboka kumaunde, 'apala kutumakiya kwanini tuuaminite kwaa?' ²⁶ Lakini mana tubayite, 'uboka kwa bandu,' twalowa yogopa kipenga sa bandu, mana bote bamweni Yohana kati nabii." ²⁷ Boka po batikunkengama Yesu bakibaya, "Tutangite kwa" kabakokeya, "wala nenga niamakiya kwaa ngupu gani nipanga makowe aga. ²⁸ Lakini muwaza namani? Mundu mwene bana abele. Kayenda kwa yumo na kummakiya, 'Mwana wango, nenda ukapange kazi kung'unda wa mizabibu.

²⁹ Lino mwana kayangwa no baya, 'niyenda kwaa.' Lakini baadae atibadilisha mawazo gake ni kuyenda.

³⁰ Na mundu yo ayei kea mwana wake ywana ibele na kumakiya kati ywa kwanza. Mwana ayo kayangwa na kummakiya, nilowa yenda ngwana,' lakini ayendike kwaa. ³¹ Ywaako kati ya aba abele ywapangite chakipendike tate bake? Kababaya, mwana wa kwanza." Yesu kabakokeya, "kweli nenda kuamakiya baba kusanya ushuru na amalaya balowa jingya mu'utawala wa Nnongo bila mwenga jingya. ³² Kwa mana Yohana aichile kwinu kwa ndela inyookile, lakini mwenga mwangana mwamini, wakati babakusanya ushuru na amalya batikumwamini. Na mwenga, pamubweni aga gapangite, muweza kwaa kutubu ili badae mwamini.

³³ Mupekani mpwano wenge. Pabile na mundu mwene lieneo likolo lya bwe. Apandike mzabibu pawaegelile, atumite baadhi ya apanga kazi bake kwa balo akulima ba mizabibu yotola mizabibu yake. ³⁴ Wakati wa mizabibu ikaribu na kwiuna, atumite atumishi kwa akulima wa mizabibu yotola mizabibu yake. ³⁵ Lakini akulima ba zabibu ngabatola balo atumishi bake batikumkombwa yumo, batikum'bulaga ywenge, ni yumo bamkombwi na maliwe. ³⁶ Kwa mara yenge, mmiliki atumite atumishi benge, banansima zaidi ya balo bakwanza lakini akulima wa mizabibu bapangite kati balo ba kwanza. ³⁷ Baada ya ago ngwana yolo atumite mwana wake, kabaya, "kwasababu ywa mwana wango balowa kumweshimu."

³⁸ Ila akulima ba mizabibu pabamweni kijana yolo, kababakiyana, "Hayo nga mrith, muiche, tumulage na kumiliki urithi.' ³⁹ Kabampotwa, kabantaikulya panja ya ng'unda wa mizabibu na kummulaga. ⁴⁰ Je! Mwene ng'unda wa mizabibu paalowa icha, alowa kwapanga buli akulima ba miabibu?"

⁴¹ Atikwabakiya, "alowa kwabomwana hobo bandu abya kwandela inanyata muno na mwisho alowa kukodisha ng'unda wa mizabibu kwa akulima bingi payalowa kelya."

⁴² Yesu kabakokeya, "Munasoma kwa maandiko, liwe lyabalikani aandishi libile liwe likolo lya papembe Alii lyapitike kwa Ngwana sangala paminyo gitu?' ⁴³ Nga nyoo nganimakiya, utawala wa Nnongo ulowa boloywa buka kachinu na peyelwa mataifa genge gaga jali malunda gake. ⁴⁴ Ywoywoti ywalowa tomboka kunani ya liwe lyo alowa tekwanika ipande ipande na kwaywoywoti lyalya mtombokya, lyalwa kumtimba." ⁴⁵ Akolo ba makuhani na mafarisayo pabayowine mifano yake batangite alongelya bembe. ⁴⁶ Lakini kila pabapalage kummoywa bakiyogopage kipenga, kwa mwanja bamonage kati nabii.