¹ Kwa masoba ago Yesu atiboka kaya na tama bwega ya bahari. ² Kipenga sabandu satikusanyika kwa kutindiya, ajingi kati ya ngalaba natama nkati yake likundi lyoti lyayema kwiye ya bahari. ³ Boka po Yesu alongeyi makowe gananchima kwa mifano, Atibaya, linga, mpandi ayei panda. ⁴ Wakati kapanda mbeyu yenge yatumbuki bwega ywa ndela na iyuni bati kuichonywa. ⁵ Mbeyu yenge yatomboki paliwe, napembe pakosike ukando wananchima. Payabalike yatiyoma mwanjaukando wabile lii. ⁶ Nalumu palubai watiyoma mana yabile kwa na ndandai no yoma. ⁷ Mbeyu yenge yatomboki kumimimwa. Mikongo yene mimimwa yatikolaa na kwiingilya. ⁸ Mbeyu yenge yatomboki paukando wananoga na pambika matunda, yenge mia jomo, yenge sitini na yenge thelathini. ⁹ Ywa abii na makutu ayowe.

¹⁰ Wanapunzi bake bateisa na kummakiya Yesu, "mwanja namani ulongela na kipenga sa bandu kwa mifano?"

¹¹ Yesu kayangwa na kuakokeya, "Mupeyilwe upendeleo wo tanga siri ya upwalume wa kumaunde, ila kachabe banapeyelwa kwaa. ¹² Lakini ywoywoti ywabile nacho, ywembe alowa yongekelwa muno, na alowa pata faida ngolo, ila ywaabile kwaa kilebe hata chelo kichunu chaabile nacho alowa pokonyolwa. ¹³ Kwa eyo nilongela nabo kwa mifano kwa mwanja kwale babone, kana baibone kweli. Na ingawa bayowa kana bayuwe wala tanga. ¹⁴ Unabii wa Isaka utimile kachabe, ngolo wa baite "Yowa mwalowa yowa, lakini mwaelewa kwa, bona mwalowa bona lakini mwatanga kwaa. ¹⁶ Ila minyo ginu gatibalikilwa, mwaya genda bona, na makutu ginu mwanja genda yowa. ¹⁷ Kweli nenda kuamakiya manabii bananchima na bandu bene haki babile na hamu ya kugabona makowe galo gamugabona, na bawezike kwaa kugabona. Batitamaniya kugayowa makowe galo gamugayowa bagayowine kwaa. ¹⁸ Tubwe mupekani mfano wa mpandi. ¹⁹ Wakati ywoyoti ywalowa yowa likowe lya utawala na kana atitange, nga nchela icha kukitola chakiyomwile pandikwa mumwoyo nkati wake. Hayee nga mbeyu yaipandile mbwenga ya ndela. ²⁰ Ywembe ywapandike mumaliwe nga yolo ywaliyowine likowe na kulipokya upesi kwo pulaika. ²¹ Bado ntopo ndandai nkati yake, nopumuliya kwa muda mwipi matatizo ao mateso pagapita kwa mwanza likowe kwikobala ghafla. ²² Ywa pandikwe mumimwa, ayu nga yolo ywaliyowine likowe lakini maangaiko ga dunia no kongana ni utajiri kulingilya lelo likowe lya kana pambika matunda. ²³ Ywa apandilwe pa ukando unanoga, nga yolo ywaliyowine likowe ni kulitanga. Hyo nga ywapambike matunda no yendelya pambika limo zaidi ya mara mia, yenge sitini, yenge thelathini."

²⁴ Yesu apei mfano wenge, kabaya. Utawala wa kumaunde ulandanishwe na mundu jwapandike mbeyu inanoga mung'unda wake. ²⁵ Lakini bandu pabapabagonjike, mbii wake nembe atiicha panda manyei nkati yangano ngakabuka kachake. ²⁶ Baadae ngano paibalike no pweka, na manyei nembe gatipweka nagembe. ²⁷ Na atumishi ba mwene nng'unda batiicha nakummakiya, Ngwana, hupandike kwa mbeyu inanoga mung'unda wako? Ibikitiwi kwi na manyei?

²⁸ Nga bakiya, mbii ngapangite nyoo, Atumishi gabammakiya, "Tugatupwe" ²⁹ Mwene ng'unda ngabaya, "hata, pamwalowa tupwa manyei mwalowa tupwa na ngano. ³⁰ Mugaleke gakue pamope mpaka wakati wouna, wakati wo una nalowa kwabakiya babauna, "Wete mugatupwe manyei mugatabe makenda makenda ni kugayocha mwoto, na mwikusanyi ngano mulighala lyango.

³¹ Boka po Yesu abakiye mfano wenge. "Upwalume wa kumaunde ulandine na mbeyu ndebele nayo mundu atikwitola na kwipamda mung'unda wake. ³² Mbeyu ye njene sana kuliko mbeyu yenge yoti. Lakini mana ikoi lopokwa kulliko yoti mubustani, pana kati nkongo, mpaka kiyuni chenge iyumba mundambe yake. ³³ Nga kaabakiya mfano wenge kai, "Upwalume wa kumaunde ubi kati mandibale ngalo gatweti mnwawa no yangabana ipemo itatu kwa bwembe mpaka ilole.

³⁴ Aga goti Yesu atiabakiya nkati ya kipenga sa bandu petya mifano. Na bila mifano abatei kwa kilebe chochote kachabe. ³⁵ Ayee ywabi na mana panga gote gabalongei manabii gaweze timya, palyo pabaite, naliwa yuwa nkano wango kwa mifano. Nalowa longela makowe galo iyilwe boka mumisingi ya dunia.

³⁶ Mwisho Yesu kakileka sa kipenga sa bandu buya kaya, Anapunzi bake batikunyendelya na kummakiya, "Utuyongoli mfano wa manyei ya kumigunda."

³⁷ Yesu kayangwa ni ukoya, "Ywapanda mbeyu inanoga nga mwana wa Adamu. ³⁸ Mng'unda nga dunia, mbeyu inanoga, aba nga bana ba utawala, Na manyei nga bana ba yolo nnau na kibii sakipandike nchela. ³⁹ Na mauno ni mwisho wa dunia, babauna nga malaika. ⁴⁰ Kati mwagabile kusanyilwa na yoselwa mwoto, Nyo ngawabaa mwisho wa dunia. ⁴¹ Mwana wa Adamu alowa kwatuma malaika bake, na kubaleta mu upwalume wake na makowe gati gagasababilwe na sambi na balo babapanga makosa. ⁴² Balowa kwataikwa boti mulitanuli lya mwoto, na akwo kwalowa bana kilelo na tauna mino. ⁴³ Na bandu bene haki bamelemetya, kati lisoba mu utawala wa Tate bake. Ywembe ywabii na makutu ni ayowe.

⁴⁴ Upwalume wa kumaunde ubi kati akiba yabaiyembi mung'unda. Mundu atikuibona na kwiiya. Katika pulaika kwake ngayende pemeya kila cha bile nacho na kuupema ng'unda. ⁴⁵ Kae Upwalume wa kumaunde ubi kati mundu jwapanga biashara ywapala madini gene thamani. ⁴⁶ Paibweni yelo yene thamani, ayei bene ya kila kilebe abile nacho ni akapemia.

⁴⁷ Upwalume wa kumaunde kati lupelele lwalubile kati ya bahari, no panga lukumba iumbe ya kila aina. ⁴⁸ Palutweti lupelele baluhuti bwega. Mwisho batanganite pae ngabakulya ilebe yoti kati ya chombo lakini yango thamani baitaikuli kutalu. ⁴⁹ Yalowa baa nyonyonyo wakati wa mwisho wa dunia malaika balowa icha na kwabangana bandu abaya boka nkati ya bandu azuri. ⁵⁰ Na kwataikwa mulitanuli lya mwoto, kwalowabana ilelo no saga mino.

⁵¹ Mutangite makowe goti aga? Anapunzi kabayangwa, "Elo", ⁵² Boka po Yesu kabakokeya, "Kila mwandishi ywabile mwanapunzi wango wa utawala alandana na mwene nyumba jwapiya mu'akiba yake ilebe yaayambe ni ya zamani.' ⁵³ Ikawa Yesu payomwoi mifano eyo yoti, atiboka pandupo.

⁵⁴ Na Yesu paikite pa nkoa wake apundisha bandu mu'sinagogi. Mwisho wake bende shangala no baya, "Kwako kwagapatike mapundisho gaa miujiza yee? ⁵⁵ Mundu yoo nga yolo mwana wa selemala? Mariamu nga mao bake kwaa? Nongo bake kwaa Yakobo, Yusuph, Simoni ni Yuda? ⁵⁶ Ni alombo bake tubi nabo papano? Bai mundu yolo apeilwe kwako aga goti?" ⁵⁷ Batichukya. Lakini Yesu atikuakokeya, "Nabii akosa kwaa heshima isipo kuwa kachake na panema wake. ⁵⁸ Apangite kwaa miujiza yananchima maana bamwamini kwaa.