¹ Abraham la David ungka kyumkya law ciah Jesuh Khrit ah ng'shonlam pakhui gui cu: ² Abraham ah hta Isaac; Isaac ah hta Jakop; Jakop ah hta Judah la a phäinau gui; ³ Judah la Tamar ah ani hta Pharez la Zerah; Pharez ah hta Hezron; Hezron ah hta Ram; ⁴ Ram ah hta Amminadab; Amminadab ah hta Nahshon; Nahshon ah hta Salmon; ⁵ Salmon la Rachab ah ani hta Boaz; Boaz la Ruth ah ani hta Obed; Obed ah hta Jesse; ⁶ Jesse ah hta David ghangpughang. Cunkawnah, David ghangpughang naw Uriah ah chu awn ani hta Solomon.

⁷ Solomon ah hta Rehoboam; Rehoboam ah hta Abijah; Abijah ah hta Asa; ⁸ Asa ah hta Jehoshaphat; Jehoshaphat ah hta Jehoram; Jehoram ah hta Uzziah; ⁹ Uzziah ah hta Jotham; Jotham ah hta Ahaz; Ahaz ah hta Hezekiah; ¹⁰ Hezekiah ah hta Manasseh; Manasseh ah hta Amon; Amon ah hta Josiah; ¹¹ Babylon ah ami ng'khah law püi ung, Josiah ah hta Jekhoniah la a nau guiah kyak ci.

¹² Babylon ah ami ng'khah püi kawnah, Jekhoniah a hta Shealtiel; Shealtiel ah hta Zerubbabel; ¹³ Zerubbabel ah hta Abiud; Abiud ah hta Eliakim; Eliakim ah hta Azor; ¹⁴ Azor ah hta Zadok; Zadok ah hta Achim; Achim ah hta Eliud; ¹⁵ Eliud ah hta Eleazar; Eleazar ah hta Matthan; Matthan ah hta Jakop; ¹⁶ Jakop ah hta cu Bawi Khrit ah kyak ciah Jesuh hta nak ci Mary ah cei Joseph ah kyak ci.

¹⁷ Cunkyasei, ng'shon a ng'düin avan cu Abraham ungka naw tüin ne, David a khüt ah ghaleiphli, David ungka naw Babylon ah ami ng'khahpüi ah khin khüt khai ah ghaleiphli, Babylon ah ami gawk kawn ungka naw tüin ne Bawi Khrit khüt khai ah ghaleiphli ah kyak ci.

¹⁸ Bawi Jesuh Khrit ah a ng'tüi-awm law ah mawng cu shinah kyak ci. Bawipa ah nu Mary cu Joseph ka vaiah ami bet tu kawnah, kä aning ng'chungla pha ung, Mümcha Theing awn pum mah ci. ¹⁹ Joseph cu chang k'ni ah kyane, Mary ah a thang kä m'sheit hlü ne, düm ah nawng khai ah ng'ngai ci. ²⁰ Cunah a ng'ngaih sang ung, a ng'mang she neta, Khanpughi ah khankhochang naw, "David ah htapa Joseph aw, Mary na shuilak vaiah amawng, kä na ng'ä vai. Shinah a pummah cu Mümcha Theing awn kyak ci. ²¹ Htapami ng'tüi lawk khai. Cunah htapami cu akchang gui ami katnak ungka phyawn gui khai ah kyasei, Jesuh cine a ng'ming sui vai" ciah pyein nak ci. ²² Cunah mawng cu Khanpughi naw a ng'shächang gui awn a pyeinsak guiah a ng'thumkha gui, a kümpäng sak vaiah phäh ah kyak ci. ²³ Ng'thumkha naw a pyein cu, "Teng shüm ä, ng'lamihta cu kä-mah neta, pami ah hta lawk khai. Cunah htapami cu Immanuel ah a ng'ming sui khai gui" cine lawk ci. Immanuel cicu mikmi awn atäng ah om ciah Khanpughi ah kyak ci. ²⁴ Joseph cu a ih nak ungka ng'shüm law neta, Khanpughi ah khankhochang naw a m'cäi ah mäih ah Mary cu m'htei ci. ²⁵ Cung phih, Mary naw a htahtük kä a hta nak pha chüih, Joseph naw kä ih om püi ci. Cunah htapa cu Jesuh ah a ng'ming sui ci.