¹ Ichuli maherebende, Makuhani bahongo alala nende abahulundu babandu bapanga ohwira Yesu. ² Bamuboya nemikoye mani bamuyira imberi wa Pilato omuruki.

³ Yuda owamukusia niyalola ari bachia hwira Yesu, yekanira bibi biaye mani yafunyisiria makuhani bahongo nende abahulundu, chisilingi mahumi kadaru karia,

⁴ naboola ari "Horire bibi okusia machai kabula erikosa. Nabo bamubolera bari "Ebio nisina hwefwe, wehonye omwene." ⁵ Yasuhuna asi chisilingi echio mukanisa, yachia ruanyi mani yemika.

⁶ Makuhani bahongo abo babukula chisilingi echio nibabola bari "Sinebilayi ora chisilingi echio musubihiro siomukanisa hubera nobukusi bwamachai." ⁷ Baulisania alala mani nibakula sipapi sia Pota siohusiha bandu baramanyihane. ⁸ Huluako sipapi silangwa mbwe "Sipapi siamachai" hula rero.

⁹ Biosia chimbosi chiabolwa nende nabii Yeremia nabola ari "Babukula chisilingi amahumi kadaru, obukusi bwa bamuraho nende abasiani ba Israili, ¹⁰ mani barunga sipapi sia Pota, kori nga omwami yari ambolere.

¹¹ Haro Yesu yema imberi yomuruki ne omuruki yamureba ari "Newe omwami wabayaudi?" Yesu yamukalusia ari, "Obola orio."

¹² Ne niyasitakwa nende makuhani bahongo nende abahulundu, siyakalusia sindu siosiosi.

¹³ Pilato yamubolera ari "Souriranga mbwe nebindu bianga bia bahusitaka nabio?" ¹⁴ Naye siyakalusia ata imbosi ndala, handi omuruki yauka muno.

¹⁵ Inyanga yomwimo, kwari muluha mbwe omuruki yarehulanga omuboye mulala oyierirwe nomuhung'ano. ¹⁶ Muchindalo echio bari nende omuboye wamakana owalangwa Baraba.

¹⁷ Huako nibehung'ania alala, Pilato yabareba ari "Mwenya mbarehurire wina? Baraba, kose Yesu olangwa Kristo?" ¹⁸ Yamanya mbwe bamurerera Yesu hulweimbaliha.

¹⁹ Ngayari niyehale husisala siohenga musango, muhaye waye yamurumira chimbosi nabola ari "Oraholaho sindu siosiosi humundu ouma makosa. Hubera amaloro kasandisie muno hulwomundu oyo."

²⁰ Makuhani bahongo nende abahulundu babolera muhung'ano mbwe basabe Baraba ne barehe Yesu yerwe. ²¹ Omuruki yabareba ari "Hubandu babiri bano mudaha mbarehurire wina?" Bakalusia bari "Baraba."

²² Pilato yabareba ari "Ne holendie Yesu olangwa Kristo?" Boosi bakalusia bari "Mubambe" ²³ Narulao abola ari "Husi, aholire sibi sina?" Nabo bakalusia nomwoyo kwa akulu bari "Mubambe"

²⁴ Pilato niyalola ari siumao sianyola, handi riye richakire, yabukula machi yesaba imberi yomuhung'ano nabola ari, "Amachai komundu uno kamumaho. Mumanye ngamuhola abene."

²⁵ abandu bosi babola bari, "Reha amachai kaye kabe huefwe nabana befwe." ²⁶ Yabarehurira Baraba, nababeresia Yesu, bachie bamubambe.

²⁷ abasikari bomuruki babukula Yesu bamwingisia mudala rihongo riasirikali mani nibabusia omukanda kwoosi kwabasikari. ²⁸ Bamufwalula chingubo mani nibamufwala ikanju injahanyu. ²⁹ Bahwania isimbihira yamabwa mani nibamura humurwe, nibabukula indabuhi nibamura mumuhono mulungi. Barulao nibasikama imberi waye nibachaka chingera nibabola, "Yogaho, Omwami wabayaudi!" ³⁰ Bamufuchaho mare, nibabukula indabuhi nibamuhuya humurwe nibalondamo. ³¹ nibamala omuchara, bamufwalula ikanju nibamufwala chingubo chiaye, nibarulao bachia naye omubamba.

³² bari barula rwanyi nibabukanana nomundu olangwa mbwe Simoni hurula musialo sia Sirini, nibamuyika ochianabo akinge Omusalaba. ³³ Bola abundu alangwa Golgotha, ebiekesia mbwe "Abundu a makumba komurwe." ³⁴ Bamuberesia Ifini ikikirwemo indusie. Ne niyahombaho, biamuhaya ong'wa. ³⁵ Nibamala omubamba, bakabana chingubo chiaye niboba ikura. ³⁶ Handi behalao nibamurinda. ³⁷ Akulu humusalaba bandika chimbosi chia bamusitaka nachio, echibola mbwe "UNO NIE YESU OMWAMI WABAYAUDI." ³⁸ Abang'usi babiri babambwa naye, mulala muhono kwaye mulungi noundi muhono kwaye mukada. ³⁹ Abandu babirao bamunyeka nibayiengia mirwe kiabwe. ⁴⁰ handi babola, "Ewe owari ochia humukula ikanisa norulao oyimbaha muchindalo chidaru, weonie omwene! Nori mwana wa Nyasaye iha hurula humusalaba!"

⁴¹ Hulwa kano abemeresi Wa malako nende bekesia bamalako wamucheha nababola mbu, ⁴² Yawonia bandi ne husiana hero sanyala hweonia? ne sinie omuruki owabaisraeli? harp yeheho hurula omusalaba, nafu huna hunamukana. ⁴³ Yegena Nyasaye, reha Nyasaye amuonie nibiri mbu anyal a okanya omubolola. Hubera yabola ari 'Nesie musiani wa Nyasaye.'" ⁴⁴ Mungira ngeyo irio Abang'uusi bayabambwa nabo boosi bamunyeka.

⁴⁵ Ohurula musiha siohusasaba esirima siari musialo ohuula musiha sia tisa. ⁴⁶ Ambi nesiha siatisa, Yesu yarira nomwoyo kwakulu nabola ari "Eli, Eli, lama sabakthani?" Ebiekesia biri "Nyasaye wange, nyasaye wange, husina niundeha?" ⁴⁷ Abandi hu abari bemire ambiao nibaurira bario babola bari "Alanga Eliya." ⁴⁸ Esihasienesio mulala hunibo yeruha yabukula esiponji, niyeniha mufini, narulao yakiha hulusala namura muhanua ang'we.

⁴⁹ Abadong'ire babola bari, "Mumurehe. Hahulole Eliya nanecha omuonia." ⁵⁰ Yesu yarira handi nomwoyo kwakukulu narulao ahalaka mwoyo. ⁵¹ Lola, Ipasia yomukanisa yaranduha habiri hurula akulu paka asi handi sialo siarengereha mani olwanda lwakabuhanamo. ⁵² Ching'ani chiekuha, emibiri kiabandu balafu abakona basingira. ⁵³ Barula muching'ani inyuma yohulamuha hwaye, bengira mutauni itakatifu, handi balolohera bandu bangi.

⁵⁴ Abasikari nende baria abari nibaringala Yesu, nibalola sialo nisirengereha alala nende bindu biari biehorire, bari noburi muno nibabola bari "Adieri uno yari mwana wa Nyasaye."

⁵⁵ Abahasi bangi abari bolondire Yesu hurula Galilaya nibamurumihira baariao nibamokera are. ⁵⁶ Akariabu barimo Maria Magdalina, Maria ng'ina Yakobo nende Yosefu, nende ng'ina abasiani ba Sebedayo.

⁵⁷ Nibiola sichiambo, omundu muyinda hurula Arimasia, owalangwa Josefu mulala hubeki ba Yesu. ⁵⁸ Yachia hu Pilato, yamusaba amuberesie omubiri kwa Yesu. Pilato yarusia rilako mbwe aberesebwe. ⁵⁹ Joseph yabukula mubiri, yakuboya mungubo indafu, ⁶⁰ Narulao ara mung'ani yayari ayabire mulwanda. Yasegia rikina rihongo humuliango kweing'ani Mani nabwao. ⁶¹ Maria magdalina nende maria undi uria bari nibehale ambi neing'ani.

⁶² Muchuli waluo, eyari inyanga yohwehwania, Makuhani bahongo nende abafarisayo bebusia alala nende Pilato. ⁶³ Babola bari " Omuhulundu, hwichurisia mbwe omubeyi uria niyari asiri mulamu yabola ari, Inyuma yechindalo chidaru ndalamuhe handi.' ⁶⁴ Huako rusia rilako mbu ing'ani irindwe paka indalo yohudaru, bihayasa Abeki baye banyala hwicha nibamwiba nibarulao babolera bandu mbwe alamuhe hurula mubafu,' handi obubeyi bweinyuma bunaba bubi muno ohira bweimberi."

⁶⁵ Pilato yababolera ari Bukula omusikari. Chia orinde ing'ani eyo kori oba nomanyire. ⁶⁶ Bachia mani nibalinda ing'ani, nibekala muliango, nibarehao omusikari.