¹ Esitabo siolwibulo lwa Yesu Kristo, musiani wa Daudi, musiani wa Abraham. ² Abraham yebula Isaka, Isaka yebula Yakobo, Yakobo yebula Yuda nende basiani babwe. ³ Yuda yebula Peres nende Sera hurula mu Tamari, Peres yebula Hesron, Hesron yebula Ram. ⁴ Ram yebula Aminadab samwana Nashon samwana Salmon. ⁵ Salmoni yebula Boas, Boas hurula mu Rahab, Boas yebula Obed hurula mu Ruth, Obed yebula Yese. ⁶ Yese yebula Daudi, omuruki. Daudi yebula Solomoni hurula mu owari muhasi wa Uria. ⁷ Ne Solomon yebula Rehoboam, Rehoboam yebula Abija, Abija yebula Asa. ⁸ Asa yebula Yehosafat, Yehosafat yebula Joram. ne Joram Yebula Usia. ⁹ Usia yebula Jotham, Jotham yebula Ahaz, Ahaz yebula Esekia. ¹⁰ Esekia yebula Manasi, Manasi yebula Amoni, Ne Amoni yebula Josia. ¹¹ Josia yebula Jekonia nende abasiani babwe, esiha sia Berusibwa nibachia Babiloni.

¹² Nibamala hufunyisibwa Babiloni, Jekonia yari samwana Salathiel, Salathiel yebula Serubabel. ¹³ Serubabel yebula Abiud, Abiud yebula Eliakim, Eliakim yebula Asori ¹⁴ Asori yebula Sadok, Sadok yebula Achim ne Achim yebula Eliud. ¹⁵ Eliud yebula Eliasari, Eliasari yebula Nathan ne Nathan Yebula Yakobo. ¹⁶ Yakobo yebula Yosefu wamwe Maria, owebula Yesu olangwa Kristo.

¹⁷ Chinjibulo chino chiosi hurula hu Abraham ohuula hu Daudi chiali lihumi nende chine, ohurula nga bafunyisibwa Babiloni chiari lihumi nende chine handi hurulao paka huola hu Kristo chiali chinjibulo lihumi nende chine.

¹⁸ Ohwibulwa hwa Yesu Kristo hwari huri. Maria yari amarire ofukirisania nende Yosefu mbu bakekana. Ne nibarakekana bianyoleha mbu Maria ari asiro hu mani komwoyo mulafu. ¹⁹ Ne Yosefu musacha waye, ngayari omundu womwoyo mulayi, siyadaha omufwimbia omurwe, yenya omureha mubwekisi. ²⁰ Yari nasipara nga yahahola, malaika wa Nyasaye yamulolohera mumaloro, nabola ari "Yosefu omwana wa Daudi, oraria obukula Maria abe muhasi wao, hubera esiakingire munda esio namani komwoyo mulafu. ²¹ Anebula omwana musiani, ne onamulanga ori Yesu, oyo achioonia bandu baye ohurula hu mabi kabwe" ²² Kano kosi kahoreha ohusia akabolwa nende omwami hubirira hu manabii kaye nikabola mbwe. ²³ "Lingala, Omusisira yahadire inda ne yahebule omwana musiani ne erira riaye bamulange bari Emanueli" Nibakaluhania, biekesia mbu "Nyasaye nafu". ²⁴ Yusufu yasumuha mundolo mani yahola nga malaika wowami yamubolera, yabukula Maria yaba muhasi waye. ²⁵ Ne sibahubanana naye mibiri hula ngolwayebula mwana waye omusiani wamberi mani namukuliha lira Yesu.