¹ Ne olwa Yesu yali niyakahamala okhuboola yako, yaboolera abechibe, ² Mumanyire mbu, olunyuma lwetsinya tsibiri khulaba nende iPasaka, naye Omwana womundu alakhobwa nabambwa,

³ Kho bekhung'asia halaa abakuhani abakhongo, nabahandichi nende abakhulundu babandu, mushikoro shiomukuhani omukhogo, owalangwa mbu, Kayafa, ⁴ nabo nibakasia mbu, bamubukule Yesu bamwire; ⁵ Nabo nibaboola mbu, shiilaba inyanga ya Pasaka tawe, khwakhaba nende liyoka liabandu,

⁶ Naye Yesu olwa yali Bethenia, munzu ya Simioni petero wobuchere, ⁷ yetsa omukhasi owali nende eshimuka shiamarashi amalayi kobukusi obukhongo, naye natsukha khumakuluke, olwa yali niyekhali nalitsanga, ⁸ nabo olwa abechibe balola, baulira obubi, nibaboola khuno shinokhusasia? ⁹ Okhuba amarashi kano kakhakusibwe khubukusi obukhongo nibakabirwa abatakha.

¹⁰ Naye Yesu olwa yamanyirisia, yababoolera,"mbushina nimunyasia omukhasi uno? Okhuba yakholire eshindu eshilayi, ¹¹ okhuba abatakha muli ninabo khasotso, nasi isie shimuli ninasi buli lwosi ta. ¹² Amafura kaatsushire kano, nikhulwo khuyabirwa khwanje, ¹³ toto mwene ebaboolera mbu, hosi ewa oburume obulayi buno buliyalwa mushibala eshilamba, eshia omukhasi uno akholere shiakhabolwe shinga eshitsuliro khuye."

¹⁴ Kho mulala khubechi oulangwa Yuda Iskarioti natsia khubakuhani abakhongo, ¹⁵ nareba mbu, mulamba shina, nemuhana khwinywe? nabo nibeyamana ebipande amakhumi kataru keifetsa, ¹⁶ Okhurula yao, nakhaba obwiyangu bwokhumukhoba.

¹⁷ Nayo khunyanga yamberi yomwimo kwomukate kubulamwo limera, abechi betsa khuYesu, nibamureba, mbu, hena ewakhulakhukasiria Lisabo mbu, olie?

¹⁸ Naye nababoolera, tsie mwitokho, khumundu undi, mumuboolere, Omwami aboolanga mbu, ebise biuulire biokhulia Ipasaka nabechibe munzuyo. ¹⁹ Nabo abechi nibakhola shinga olwa yababoolera. Nibakasia Ipasaka.

²⁰ Olwakwola omukoloba, yekhala hasi nabechibe ekhumi nende babili, ²¹ olwa bali nibalitsanga, yababolera, "toto mwene, mulala wenywe niyakhobe."

²² Nabo nibatirwa neshiberesi eshikhongo, buli mulala namureba Omwami, niwina?

²³ Naye nakalusia, "ulia outonga ninasi mushikaye, niye oulakhoba. ²⁴ Omwana womundu atsia shinga olwa kaandikwa, ne woowee, khumundu ulia oumukhoba, bwakhabere obulayi yabula okhwibulwa." ²⁵ Naye Yuda owali mbu amukhobi nakalusia, Omwami nesie no? Naye namuboolera, "niwe ouboolere omwene."

²⁶ Ne olwa bali nibalitsanga, Yesu yabukula omukate, nakhupa orio, nasonyola nabaheresia abechibe, naboola bukule mulie kuno nomubiri kwanje." ²⁷ Nabukula eshikombe, nakhupa orio, nabaheresia, naboola "nywe mwesi, ²⁸ okhuba kano niko amatsayi kanje keindakano imbia, okaratsa khulwa okhurusia tsimbi. ²⁹ Nasi ebaboolera, shindila nywakhwo khandi khumatunda kano ta, okhula khunyanga yandakhanywe Mubwami bwa Papa wanje."

³⁰ Ne olwa bali nibakhemba olwimbo, batsia khushikulu shiemizeituni.

³¹ Naye Yesu nababolera,"mwesi mwitsa okhwisicherasia khulwa esie eshilo eshiro, okhuba kaandikwa mbu, ndalakhupa omwayi, nako amakondi kalasalaana. ³² Olunyuma lwene ndakhalamusibwe, nemuranjilila muGalilaya.

³³ Naye Petero nakalusia, mbu kata abandu bosi nibesicherasia khululwo, esie shindalakhulekha ta.

³⁴ Naye Yesu namukalusia, "toto mwene ekhuboolera, mbu, Itaywa ilashiakholiokha eshiro shino ta, olanzikana khandi khataru."

³⁵ Naye Petero nakalusia, kata kakhaba mbu, efwa khulwa iwe, shenyala okhwikana ta. Abechi bandi bosi nibaboola bario.

³⁶ Naye Yesu natsia ninabo Gethesemane, nabira abechibe, mwikhale hano, nasi nenzia khushikulu okhusaya, ³⁷ Naye nabukula Petero nende abasiani babiri baZebedayo, naye naba neshibera, nomwoyo omusiro. ³⁸ Naye nababira, omwoyo kwanje kuberere okhula khukhufwa, linde hano, mube meso ninasi. ³⁹ Naye nasita imberi. nakwa hasi mafumama, nasaaya,"Papa, kanyalikha eshikombe shino shirusie, nebutswa shikhulaba okhwenyakhwanje ta, ne mbu, elianye lio." ⁴⁰ Naye nakalukha khubechi, nanyola nibakonire, naboolera Petero, "shina? shimunyala okhuba meso ninasi kata lsaa ndala ta?" ⁴¹ Mube meso, musaaye mbu, mulenjira mumatemo ta. Omwoyo kwenyanga, ne omubiri nomuteshere."

⁴² Natsia khandi lwakhabiri, nasaya naboola, "Papa, kali mbu, khatimba enywe eshikombe shino, kho lekha elienya lio likholeshe."

⁴³ khandi nacherera, nanyola nibakonire, okhuba tsimoni tsiabwe tsiali tsisitohe. ⁴⁴ Nabalekha khandi natsia, nasaya lwakhataru, nakalushira amakhuwa yako. ⁴⁵ Nakalukha khubechibe, nababoolera,"kone bulano, muulushe, lole isaa yulire, naye omwana womundu akhobwa mumakhono kabetsimbi. ⁴⁶ Sinjire, khutsie, lole oukhoba amalire okhuula."

⁴⁷ Ne olwa yali nashiboola, lola Yuda mulala khubechi ekhumi nababiri, yetsa nali nomukanda omukhongo, netsinganga, nebikong'o, okhurula khubakuhani abakhongo nende abakhulundu babandu. ⁴⁸ Naye yabaheresia eshilolero mbu, yesi owamulola nemutsunzuna, niye omweneyo. ⁴⁹ Naye nachoma khuye, naboola, Omwechesia, namutsunzuna.

⁵⁰ Naye Yesu namuboolera, "omwitsa, orula hena?" Nabo nibetsa nibamutira nibamubukula. ⁵¹ Ne lole, mulala khubali nende Yesu. narusia olukanga, narema eshirwi shiomukhalabani womukuhani omukhongo. ⁵² Naye Yesu namuboolera, "kalusia olukanga lwo mushikhoba, okhuba abera khulukanga, balifwa khulukanga. ⁵³ Muparanga mbu, shenyala okhusaba Papa wanje, naye yamberesia tsing'anda ekhumi nende tsibiri tsia malaika? ⁵⁴ Nako amaandiko kakhatusibwe karie, mbu okhula kekholeshe?"

⁵⁵ Khufiise yifo, Yesu naboolira omukanda,"mwitsire shinga abetsera Omwifi? Netsinganga, nebikong'o, embere ninenyu buli lwosi, nindiechesinjia muhekalu, nenyu shimwandirakhwo ta. ⁵⁶ Ne kano kosi kekholeshe mbu, amaandika kabalakusi kanyale okhuula," nabo abechi bosi nibamulekha.

⁵⁷ Nabo abamutira Yesu nibatsia ninaye, bamuyira khuKayafa omukuhani omukhongo, ewa abahandichi nende abakofu bali nibakhung'anire. ⁵⁸ Naye Petero nalondakhwo ehale okhula womukuhani omukhongo, niyenjiramwo mbu, alole shina eshikholekha.

⁵⁹ Bulano abakuhani abakhongo nende abakhulundu, nende beshina bosi, nibakhaba obuloli bwobubeyi, mbu banyale okhumwira. ⁶⁰ Nibalanyola liosi ta, kata olwa bobubeyi betsa. Olunyuma lwene betsa abaloli bobubeyi babiri, ⁶¹ Nibaboola, omundu uno yaboola mbu, ali nobunyalii okhusasia Ihekalu yaNyasaye, nende okhuchumbakha khutsinyanga tsitaru.

⁶² Naye omukuhani omukhongo nasinjira naboola, shokalusia shiosi ta? Shina shino eshia baboolanga khwiwe? ⁶³ Naye Yesu nalaboola liosi ta, naye omukuhani omukongo nakalusia, ekhulaka mulira liaNyasaye umenyanga, noba noli niwe Kristo watsana Omwana wa Nyasaye umenyanga.

⁶⁴ Yesu nakalusia naboola," ewe omwene oboolire. Kata kario ekhuboolera mbu, olalola Omwana womundu niyekhale khumukhono musatsa kwobunyali kwa Papa, naye niyekha mumalesi koMwikulu."

⁶⁵ kho omukuhani omukhongo narandula tsingubotsie, naboola, amalire okhunyeka, ⁶⁶ mupara shina? Nibakalusia, akhoya okhufwa. ⁶⁷ Kho nibamufutsakhwo amare mubweni, nibamupa ebifusi abandi, nibamupama tsikhofi. ⁶⁸ Nibaboola, rusia obulakusi, mbu, niwina oukhupire,

⁶⁹ Naye Petero yali niyekhale erwanyi weinzu yomukuhani, omukhana undi namwitsira, ewe wesi wabere nendeYesu waGalilaya.

⁷⁰ Naye nakana imberi wabwe, naboola mbu, shemanyire shioboolanga ta.

⁷¹ Olwa yali narulile mushikoro, omukholi undi yamulola, naye naboolera abali ninaye, omundu uno yesi abere nende Yesu waNazareti.

⁷² Naye khandi niyetsuba mbu, shemanyirekhwo omundu uno ta.

⁷³ Ne olunyuma lwefise, abali nibasinjire yao nibetsa, nibaboolera Petero, toto mwene, wesi oli mulala khubo, okhuba kata okhuboolakhwo nishinga okhwabo,

⁷⁴ Naye nabalaama, niyetsuba naboola, shemanyirekhwo omundu oyo ta, ne lwangu, Itaywa niikholiokha.

⁷⁵ Naye Petero niyetsulira lioMwami, mbu Itaywa ilashiakholiokha ta, olanzikana khandi khataru. Naye narula erwanyi, nalira obululu.