¹ Mana Yesu naboolera abechibe nende abomukanda, ² Abahandichi nende Abafarisayo bali mushifumbi shia Musa. ³ "kho shiosi eshiabamuboolera, lole lino, khole lino, nimukhola, neshimulakhola akababola ta, okhuba baboolanga akabalakholanga ta. ⁴ Okhuba bamuheresinjia emisiko emisiro echiamulanyala okhuchinga ta, nibara khumabeka kenywe, nabo abene shibanyala okhuluma kata nolutere lwabwe ta. ⁵ Halali bakholanga emirimo chiabwe mbu, balolwe nende abandu, okhuba babambusinjia tsirisi tsiabwe, nibakaliyia tsikanzo tsiebifwalo biabwe. ⁶ Nibayanza tsinzu tsiemilukha, nende obwikhalo bweikulu musinagogi. ⁷ Nende okhwichingimisia khubiro, nibalangwa mbu, abachesi. ⁸ Nenyu shimulalangwa abechesi ta, okhuba omwechesi nimulala, ouli Kristo. Nenyu mwesi muli abananda. ⁹ Ne shimulalanga omundu khushialo mbu, Papa ta, okhuba muli nende Papa mulala ouli Mwikulu. ¹⁰ Kata shimulalangwa mbu, Omwami ta, okhuba Omwami wenywe ni mulala, Kristo ouli Mwikulu. ¹¹ Ne ulia ouli omukhongo mwinywe, akhoyera okhuba omukhalabani. ¹² Naye yesi owichingula, aleshibwa. Naye owitutuyia, alachingulwa.

¹³ Ne woowe, khwinywe abahandichi nabaFarisayo abekati, okhuba mwikaliranga abandu okwinjira Mubwami bwoMwikulu. okhuba shimwinjirangamwo ta, noho okhulekha abenjiramwo benjire ta. ¹⁴ woowe, khwinywe abahandichi nende abaFarisayo abekati, okhuba mwinjira mutsinzu tsiabalekhwa nibasayaira amasayo amarambi, kho balinyola eshilamo eshikhongo.

¹⁵ woowe, inywe abahandichi nabaFarisayo abekati, shichira mulambulanga Inyanza nende eshialo khulwa okhukalukhasia omundu mulala, Ne olwa abaniyekalukhasiye, mumukholanga omwana wemakombe khandi shikhabili okhushila inywe.

¹⁶ Woowe, khwinywe abemirisi ababofu, ababoolanga mbu, omundu yesi niyetsuba khuhekalu, eshitsubo shie nishiabutswa, ne omundu yesi niyetsuba khutsahabu yeihekalu, kho abaniyeboyire. ¹⁷ Enywe abasiru khandi ababofu, shina eshikhongo? itsahabu nomba ihekalu itsienulanga itsahabu? ¹⁸ Ne mbu, owitsuba khushisambiro nibutswa, naye owitsuba khushihanwa shio khushisambiro, ali nobubi. ¹⁹ Enywe abasiru, nishina eshikhongo? eshihanwa nomba eshisambiro shitsienulanga eshihanwa? ²⁰ kho yesi owitsuba khushisambiro, yetsuba nende biosi biirikhwo. ²¹ Naye owitsuba khuhekalu, yetsuba khubiosi ebirimwo. ²² Naye owitsuba Mwikulu, yetsuba khuburuchi bwaNyasaye nende owikhalekhwo.

²³ woowe, khwinywe abahandichi nende abaFarisayo abekati, okhuba murusia eshie likhumi shiokhuminaa nende khubinzari, nende khuchiraa nimulchweya okhuusia amakhuwa amakhongo akomumalako, mbu obukhalachi bwatoto, nende tsimbabasi, nende obwisikwa, Niko akamukhoyere okhukhola nimulalekkha okhukhola akene kalia ta. ²⁴ abemil/risi ababofu, inywe abeluulangamwo Isuna, nimumira Ingamia.

²⁵ Woowe, khwinywe abahandichi nende abaFarisayo abekati, abosinjia erwanyi weshikombe, neisani ne mukari neshichafu. ²⁶ Enywe abaFarisayo ababofu, yosie mberio eshikombe neisani mukari, mbu, erwanyi yosi ibe inzerereshe.

²⁷ Woowe, khwinywe abahandichi, nabaFarisayo abekati, okhuba muli shinga ebiindwa ebilolekha biabafwa olufuyo erwanyi, ne mukari shietsula amakumba kabandu bafwa nende obuchafu bwosi. ²⁸ Nindio Kali mwesi mulolekha abalunjishi erwanyi, ne mukari, mwetsula obwikati nobwononi.

²⁹ Woowe, khwinywe abahandichi nende abaFarisayo abekati, okhuba mumbakha ebirindwa biaBalakusi nimung'oona ebirindwa biabalunjishi. ³⁰ Nasi ebaboolera mbu, mwakhabere mutsunyanga tsia baPapa benywe, shimwakhahambanire halala ninabo khumatsai kabalakusi ta. ³¹ kho mwirumbuliranga abene akobuloli, mbu muli abana babalakusi. ³² Kario mwitsusie eshichero shiabakuka benywe. ³³ Inywe tsinzokha, olwibulo lwa shishieno mulahonokokha murie obukhalachi emakombe? ³⁴ Kho lole ebarumianga abalakusi nende abandu abachesi, nabahandichi, ne abandi khubo mulabera nabandi nimubakhupa emisharati musinagogi, nimusandia okhurula mwitikho okhula mwitokho Lindi. ³⁵ Mbu, khwinywe kabe amatsai kabatsienukhu bosi khushibala, okhurula khumatsai komutsienukhu Abeli, okhulu khuka Samaria omwana wa Baraki owamwera hakari weihekalu neshisambiro. ³⁶ Toto mwene ebaboolera mbu, amakhuwa kano kosi kalanyola olwibulo luno.

³⁷ Oo, Yerusalemi Yerusalemi, enywe aberanga abalakusi nimukhupa amachina abandu barumwa khwinywe, noluhono nindikombire okhubafumberera halala shinga olwa Ingokho ifumbereranga ebiminywi, biayo, nenyu shimwenya ta. ³⁸ Lole inzu yenywe itonyere likunda. ³⁹ Ebaboolera toto mbu, shimulandolakhwo ta, okhula olwa muliboola mbu, noweikhabi owitsa mulira lia Omwami."