¹ Mana Yesu nakalusia nababoolera khandi mutsinjero, naboola, ² "Obwami bwoMwikulu bufwana shinga Omuruchi undi, owakasiria omwanawe eshiserero, ³ naruma abasumbabe okhubalanga abali nibalanjirwe mushiserero, nibaloba okhwitsa. ⁴ khandi naruma abasumba bandi, ari baboolere abalanjirwe mbu, emalire okhutekha buli shindu, tsing'ombe tsianje nende buli ebinulu biosi biirwe, ebindu biosi birechekhwe mwitse mwikhoye. ⁵ Nabo shibaulira shiosi ta, buli mulala natsia ewa yatsia, mulala mumukundakwe, oundi mubukhalabani bwe. ⁶ Abandi nabo nibatira abasumbabe, nibabakhola obubi nibabera. ⁷ Ne olwomuruchi yaulira yako, yatirwa neliruma. Naruma abalindibe nibamalirana aberi yabo, nasamba litokho liabwe. ⁸ Mana naboolera abalindibe mbu, eshiserero shikasibwe, ne abalangwa shibakwanire ta. ⁹ kho tsie khumianda nokhumasanganjira, murere abandu mushiserero. ¹⁰ kho abasumbe nibatsia khumianda emikali, nibakhung'asia halala bosi abanyolekha, ababi kata abalayi, mana eshiserero shitsulamwo abacheni. ¹¹ Ne olwa Omuruchi yenjira, yalolamwo omundu owalaliniyefwalire tsingubo tsieshiserero. ¹² Namuboolela ari, "omwitsa, winjire muno orie nobula eshifwalo shieshiserero? "nabula likalusio. ¹³ Mana Omuruchi naboolera abasumbabe ari, mubohe amakhono nebirenje, mana mumubukule, mumusukune mushirima erwanyi, khulabayo okhulira nokhulumaasia ameno, ¹⁴ Okhuba abanji balangwa, ne batutu balalobolwa."

¹⁵ Mana abaFarisayo nibatsia nibasanjirana shinga olwa banyala okhumureka mukhuboolakhwe. ¹⁶ Nibamurumira abechi babwe halala nende abaHerode, bamulanga bari omwechesia, khumanyire shinga olwa oli watoto, wechesinjia injira yaNyasaye mubwatoto, nolatebakhwo omundu yesi ta, shichira shoparanga akali komundu yesi ta. ¹⁷ kho khuboolere, ne habwene okhurunga obushuru khuKaisari?

¹⁸ Naye Yesu nalola obumayanu bwabwe, naboola ari,"mundema mbushi inywe abekati? ¹⁹ muberesiekhwo ifedha yene yobushuru,"nibamuheresia limondo, ²⁰ Nabareba "nobukondo bwa wina obulikhwo buno nende obuhandiche?"

²¹ Nibamukalusia, obwa Kaisari. naye Yesu nabakalusia", heresie Kaisari ebiri ebia Kaisari, ne ebiaNyasaye muheresie Nyasaye." ²² Ne olwabaulira amakhuwa yako nibauka muno, nibamulekha nibatsia tsinjira tsiabwe.

²³ Inyanga eyo abaSadukayo nibamwitsira, ababoolanga mbu, bubulao obulamushi ta, nibareba, ²⁴ baboolanga mbu, Musa yaboola, omundu musatsa naba nafwa nalali nabana ta, omusiani wabwe alateshia omukhasiwe, mbu, akhusie imwo yomusiani wabo. ²⁵ Ne khwali nende abasiani musafu abomunzu ndala, owamberi yateshia omukhasi nafwa nalashiebula omwana ta, naleshera omusiani wabwe omukhasi. ²⁶ Mana owakhabiri yesi khandi nakhola ario, nende owakhataru, okhula owamusafu, ²⁷ olunyuma lwabosi, omukhasi yesi nafwa, ²⁸ kho mukhulamukha, aliba omukhasi wa wina shichira bosi musafu bamuteshia?

²⁹ Naye nakalusia nababoolera ari,"mukoranga nimulamanya amaandiko kata obunyali bwaNyasaye ta. ³⁰ okhuba mubulamushi shimuteshinjia kata okhuteshibwa ta, ne bali shinga malaika Mwikulu. ³¹ Ne khumakhuwa kobulamushi, bwabafu shimwamanya akaNyasaye yababoolera, naboolanga, ³² "nisie Nyasaye wa Abrahamu, khandi Nyasaye wa Isaka, khandi Nyasaye waYakobo, Nyasaye shaliNyasaye wabafu ta, habula wabalimwoyo."

³³ Ne olwa abomukanda baulira kano, bauka khukhwechesia khwe.

³⁴ Ne olwa abaFarisayo baulira shinga olwa yali nabaholelresiye abasadukayo, nibakhung'ana halala. ³⁵ Ne mulala khubo omukhuludu wamalako, yamureba lirebo, namutema naboola, ³⁶ Omwechesia, nelilako shina likhulundu?

³⁷ Yesu namuboolera mbu,"omuherenje Omwami Nyasayewo nende omwoyokwo kwosi, namaparoko kosi, ³⁸ lino nilio lilako likhongo khandi liamberi. ³⁹ Ne eliakhabiri elifwana ninalio ndielino mbu, omuhere omumenyaniwo shinga wehera omwene. ⁴⁰ Amalako kosi nende obulakusi keletanga khwilako lino."

⁴¹ Ne abaFarisayo bali nibakhung'anire halala, Yesu yabareba, ⁴² "muboolanga murie khuKristo? Nomwana wa wina?" NibamubOolera mbu, nomwana waDaudi.

⁴³ Nababoolera mbu, kho Daudi muRoho amulanga arie mbu, Omwami, naboola ⁴⁴ Omwami yaboolera Omwami wanje, yikhala khumukhono kwanje musatsa okhula olwa emba nikholire abasukubo babe bokhusenakhwo ebilenje bio. ⁴⁵ kho Daudi naba niyakhamulanga mbu, Omwami, yakhaba arie omwanawe? ⁴⁶ Ne yabulao omundu owanyala okhumukalusia likhuwa ta.