¹ Bulano nga Yeso yebulwa Betelekhemu eya Buyaudi muchinyaanga chio muruki Herodi, lingeera, abakesi okhurula ebukwe beecha Yerusalemu, ² Nibaboola bari, "Aliena oyo owibuulwe, Omuruki wa Abayaudi? khulwo khuba khubwene ing'ining'ini yaye ebukwe, ne khwichire okhumwinamira."

³ Olwa omuruki Herodi yabulira amakhuwa kano, yabeyabeya, alala nende Yerusalemu yoosi. ⁴ Ne olwa yali nakhung'anisie alala abakhongo ba bakukhani nende abaandiiki ba baandu, yabareeba ari, "Kirisito akhoyere okhwibulwa ena?". ⁵ Ne nibamubolera bari, ni mu Betelekhemu ye Buyaudi: okhuba nilwo olwakaandiikwa nende omunabii mbwe, ⁶ arali ewe, Betelehemu, musialo sia Yuda, khasi oli omudidi akari wa bemiresi ba Yuda: khulwo khuba omuruki achia khurula mwiwe, owakharuke abaandu bange ba Isiraili.

⁷ Ne Herodi, yalaanga abakesi abo mubwekisi, okhubabanoneresia mbwe ni bikha sina ebia ing'ining'ini yalolekhaniramo. ⁸ Nabaruma Betelehemu, naboola ari, muchie mumukoonye ebilayi omwana mudoro; ne nimumunyoola munderere elikhuwa, mbwe nyale siesi okhuchia okhumwinamira.

⁹ Nibakhamala okhubulira ako muruki yababolera, babwao; ne lola ing'ining'ini, eyabalola ebukwe, niibemirira, okhuula nga olwayoola niyeema abuundu wo mwana mudoro yali. ¹⁰ Olwabalola ing'ining'ini, basangaala nende obusangaafu bukhoongo. ¹¹ Ne olwa bengira munyuumba, balola omwana mudoro nende Maria ng'ina, bakwa asi, nibamwinamira: Babolola chimbikhiro chiabwe, nibamuberesia ebianwa; idakhabu, obubani, nende manemane. ¹² Ne olwabalabulwa nende Nasaye mumalooro, mbwe barakalukhira owa Herodi, bakalukha musialo siabwe obirira ingira yindi

¹³ Ne olwabali nibabwereo, lola, malaika wo Mwami nalolekhera Yosefu mumalooro, naboola ari, singira, obukule omwana nende ng'ina, mwirukhire Misiri, ne mumenyeyo okhuula olwandakhakhurerere elikhuwa: okhuba Herodi anakoonya omwana mudoro khumwira. ¹⁴ Olwayabuukha, nabukula omwana nende ng'ina musiro, nibachia Misiri: ¹⁵ Ne namenyayo okhuula okhufwa khwa Herodi: mbwe kolerere akaboolwa nende omwami khubirira khu munabii, naboola mbwe, "okhurula Misiri ndalaanga omwana wange." ¹⁶ Ne Herodi, olwa yalola mbwe abachirwe nende abakesi, yadiirwa nende lirima likhoongo, naruma mbwe, beere abaana basiani boosi abali mu Betelekhemu, nende mumbeka chiayo, khuchakira emiaka kibiri okhwikha asi, olondana nende bikha ebia yali nanoneresie orula khu bakesi. ¹⁷ Manu nikolerera kalia akaboolwa nende Yeremia omunabii, mbwe, ¹⁹ Ne olwa Herodi yali namalire okhufwa, lola malaika wo Mwami namulolekhera Yosefu mumalooro mu Misiri, ²⁰ " Naboola ari, buukha, obukule omwana mudoro nende ng'ina, ne muchie musialo sia Isiraili: okhuba abakonyanga okhumalao obulamu bwa omwana mudoro baafwa. ²¹ Naye nabukha, nabukula omwana mudoro nende ng'ina, nibachia musialo sia Isiraili.

²² Arali olwa yabulira mbwe Arikelao yali aruka Ebuyaudi mubweyango bwa simwana Herodi, yali omuri okhuchiayo, ne oburalindirira, nga olwayali nalabulwe nende Nasaye mumalooro, yakodokha nachia mubidonye bia Galilaya: ²³ Manu niyeecha namenya mudokho lilangwa mbwe Nasareti, mbwe kolerere akabolwa nende abanabii, achia okhulangwa mbwe omunasarini.