¹ Mjisiku jirya Yohana omubhatiji ejire narasha kusoka mwibhara lya Yuda naika, ² “Musige ebhikayo kwokubha Omukama wa murwire bhuryayei.” ³ Kwokubha hunu niwe aikirwe no omuragi Isaya naika, “obhuku bhwo munu wunu kabhilikira okusoka mwibhara; 'muroshe injira yo omukama, mwiimye anu kaja okutura.”

⁴ Oli Yohana afwae amakamba ga ingamia no mukanda gwa ingoji mukibhunu chaye. Ebhyokurya bhyaye bhyariga jisinge no obhuki bhwa mumati. ⁵ Okubha Yerusalemu, Yuda yone na amaeneo gone ganu ageinda oruji rwa Yordani mbagenda ewaye. ⁶ Bhariga bhabhatija nage muruji rwa Yordani enu bhatubu ebhikayo bhyebhwe.

⁷ Lakini ejire abharora abhafu bha mafarisayo na masadukayo bhaja kumwene okubhatijwa, nabhabhwira, “emwe orwibhuro rwe bhisoro rwa isumu niga kabhaganya okubhilima risungu linu erija? ⁸ Mwibhure amatunda ganu agesasama. ⁹ Na musige okwiganilisha nokwikana amwi neswe, kina Ibrahimu kama rata weswe, kwokubha enibhabhwira Omukama katura okumwimshisha Ibrahimu abhana okusoka kumabhui ganu. ¹⁰ Yimbasa yatewe kumisi ja mati. Kwokubha kila liti linu litakwibhura amatwasho amajomu libhuturwe nokweswa mumuriro.

¹¹ Enibhabhatija kwa manji kwokusiga ebhikayo. Lakini hunu kaja ni mukuru kuriko anye anye nitakustahili hata okuyeka ebhirato bhyaye. Omwene kabhatija kwo Moyo Mweru na kwo muriro. ¹² No oruhugo rwaye ruli mmabhoko gaye okwerera kabisa orugongo rwaye no kukumanya ingano yaye mukitara. Lakini kagocha amakapi kwo muriro gunu gutakutura okusima.

¹³ Kisaha Yesu naja okusoka Galilaya mpaka mrujo rwa Yordani okubhatijwa na Yohana. ¹⁴ Lakini Yohana nenda okumuganya naika, “anye enenda okubhatijwa nawe, nawe waja kwanye?” ¹⁵ Yesu namusubhya naika, “Nyikilisha ibhe kutyo oryanu, kwokubha eyendwa okumara emisango jone.” Nawe Yohana namwikilishisha.

¹⁶ Ejire abhatijibhwa, niwe Yesu nasoka mumanji, mbe rora, orwire ndwiguka kumwene. Amurorere omwoyo gwa Nyamuwanga neka kurususo rwa inguti nasimbiira inguru yaye. ¹⁷ Mbe rola obhuraka bhwasokere murwire mbwaika “Unu niwe omwana wani omwendwa unu kanjomesha muno.”