7
(Jengon Menghakimi)

1 “Jengon menghakimi enggakkonyo hopi dehakimi. 2 Ulenyo dengan penghakimon nyo kou gunako untuk menghakimi, kowe nak dehakimi, ngan dengan ukuron nyo kou gunako untuk mengukur nak deukurkan dengan kowe. 3 Ngan, mengka kowe ngoleh kerempek kayu de mato dulurme, cuma hopi mengetahui balok nyo ado de matome dewek? 4 Atau, upamone pacok kowe bekehato ngan dulurme, enggakkonyo ake mengeluarko kerempek kayu iye deri matome, cuma koleh, ado balok de matome dewek? 5 Hai, urang munafik, keluarko dehulu balok iye deri matome, ngan beheru kowe nak ngoleh ngan jelas untuk mengeluarko kerempek kayu deri mato dulurme.

6 Jengon memboriko barang nyo kudus ngan anjing-anjing, jengon pula nohukko mutiarame ke hadopon bebi enggakkonyo enye hopi menijak-nijak iye dengan kakinye ngan ngulang mengoyak-ngoyak kowe.
(Mintaklah, Deloklah, ngan Ketoklah)

7 “Mintaklah, ngan hal iye nak deboriko ngan kowe. Deloklah, ngan kowe nak mendepot. ketoklah, ngan hal iye nak debukakko bagime. 8 Sabab, setiap urang nyo memintak, enye menerimo, ngan urang nyo bedelok nak mendepotko, ngan bagi nye nyo mengetok nak debukakko.

9 Atau, siape deri antaro kowe, nyo munye anaknye mintak roti nak membori betu dengan anaknye iye? 10 Atau, munye anaknye mintak ikan, enye hopi nak memboriko ular dengan anaknye iye, bukon? 11 Jedi, munye kowe nyo jahat tahuko upamone membori anak-anakme pemborion-pemborion nyo beik, telobeh lagi Bepakme nyo de serga, Enye nak memboriko nyo beik dengan mike nyo memintak dengan Enye. Hukum Nyo Terutamo

12 “Ulenyo iye, segelo sesuatu nyo kou amat urang lakuko ngan kowe, upa iyelah jugo kowe lakuko ngan enye ulenyo nielah isi Hukum Torat ngan kitab paro nabi.”
(Jelon Menuju kehidupon)

13 “Masuklah melalui gerbang nyo sempet ulenyo leborlah gerbang ngan loaslah jelon nyo menuju kenempat kebinasoon, ngan ado lobot nyo masuk melaluinye. 14 Sabab sempetlah gerbang ngan kedetlah jelon nyo menuju kenempat kehidupon, ngan sediket nyo menomukonye.”
(Peringaton Tentang Nabi-nabi Pelsu)

15 “Cuma, waspadalah terhadop nabi-nabi pelsu nyo njongok ngan kowe ngan bepakoiyon domba, cuma sebonornye enye adolah serigala-serigala nyo bingas. 16 Deri buahnyelah kowe nak mengenali nye. Depotkah urang mengumpulko buah-buah anggur deri somok-somok unok ngan buah-buah ara deri tumbuhon-tumbuhon berunok? 17 Upa iyelah jugo, setiap betong nyo beik menghaselko buah nyo beik, cuma betongnyo hopi beik menghaselko buah nyo hopi beik. 18 Betong nyo beik hopi mungkin menghaselko buah nyo hopi beik, ngan betong nyo hopi beik hopi mungkin menghaselko buah nyo beik. 19 Tiap betong nyo hopi menghaselko buah nyo beik akan detobong ngan decampok ke delom api. 20 Jedi, deri buah-buahnye kowe akan mengenali enye.

21 Hopi segelo urang nyo bekehato dengan-Ke, Tuhan, Tuhan, akan masuk ke delom Kerajaon Serga, meloinko enye nyo melakuko kendok Bepakke nyo de serga. 22 Pado hari iye, lobot urang akan bekehato ngan-Ke, Tuhan, Tuhan, bukonkah kami bernubuat delom namo-Me, ngan mengusir roh-roh jahat delom namo-Me, ngan melakuko lobot mukjizat delom namo-Me? 23 Lalu Ake nak menyatoko ngan enye, Ake hopi pernah mengenal kowe! Enyehlah diri-Ke, kowe nyo mengerejoko kesalahon!
(Mendongor ngan Melakuko)

24 Ulenyo iye, segelo urang nyo mendongor pembuikon-pembuikon-Ke nie ngan melakukonye nak menjedi upa urang bijaksana nyo membengun rumahnye de pucuk betu. 25 Lalu, turunlah hujan ngan detonglah banjir, ngan angen betiup menerpa rumah iye, ngan rumah iye hopi rubuh ulenyo dediriko de pucuk betu. 26 Ngan, setiap urang nyo mendongor pembuikon-Ke nie ngan hopi melakukonye nak menjedi upa urang bodoh nyo membengun rumahnye de pucuk bungen. 27 Mengka, turunlah hujan ngan detonglah banjir, ngan angen betiup menerpa rumah iye, ngan rumah iye roboh, ngan sajo godong kerosakkonnye.”

28 Tekalo Yesus sodah mengehatoko hal-hal nie, urang lobot teheran-heran ngan pengajoron-Nye, 29 ulenyo Enye mengajor mike sebagoi urang nyo bekuaso, ngan hopi upa ahli-ahli Torat mike.