27

¹ Kinie, tekalo ari pagi njongok, segelo imam kepalo ngan padong tua -tua bengso iye mengambik keputuson serompok mengenai Yesus untuk menghukum mati Nye. ² ngan mike ngobotko Yesus, mengka ngunda-Nye ngan menyerahko-Nye kepodo Gubernur Pilatus

³ Tekalo Yudas, nyo nyerahko Yesus ngoleh behwa Yesus de jatuhi hukumon, enye meraso menyosol ngan membeleko 30 keping perak kenempat imam-imam ke kepalo ngan padong tua-tua,

⁴ ujonye, “Akelah bedoso ulenyo menyerahko deroh nyo hopi besaloh.” ⁵ Ngan, Yudas menohuko kepeng-kepeng perak iye ke delom Bait Allah ngan meninggalkonye. Mengkah, enye bejelon ngan mengentungko dirinye.

⁶ Cuma hambuk, imam-imam kepalo mengambek kepeng-kepeng perak iye ngan buek, “Hopi de bonorko untok menyimpan nye delom perbendaharaon ulenye adolah rega deroh.” ⁷ Mengka, mike mengambik keputuson bersamo ngan dengan duit iye, mike mboli tanoh tukang perluk upa tapon kuburon untok urang-urang aseng. ⁸ Iyelah sabab nyo, tanoh iye de sobut ‘Tanoh Deroh’ sampoi hari nie.

⁹ Mengkah memunyelah, genaplah ape nyo de buiko Nabi Yeremia: “Kemudian, mike ngambek 30 kepeng perak. Iyelah rega untuk diri-Nye lah detaksirko uleh urang-urang Israel. ¹⁰ Mike mengunako 30 kepeng perak untok memboli tanoh tukang periok, upa nyo lah Tuhan perintahko kenempat Ake.”

(Yesus Dan Gubernur Pilatus)

¹¹ Kinie, Yesus togok de hadopon Gubernur ngan Gubernur betanyo ke nempat Enye, “Ibo kowe Rajo urang Yahudi?” Jawab Yesus, “Ao, upa nyo kowe bekehato.”

¹² Cuma hambuk tekalo iye Nye de tuduh uleh imam-imam kepalo ngan padong tua-tua, Nye hopi menyimbot apo pun.

¹³ Mengka Pilatus buek kenempat Enye, “Ibo Kowe hopi mendongor sajo lobot nyo mike menuduh Kowe?” ¹⁴ Cuma, Yesus hopi nyimbot Pilatus, bahkan untuk sikuk tuduhon pun sampoinyo Gubernur iye sajo temanga.

(Pilatus Pijedi Membebasko Yesus)

¹⁵ kinie, singgo setiap ari rayo, Gubernur biaso membebasko bagi urang lobot, tahanon nyo de amatko ule mike. ¹⁶ Tekalo waktu iye, mempunyoi urang tahan on nyo tekenal, nyo desobut Barabas.

¹⁷ Jedi, tekalo urang lobot berkumpul, Pilatus bertanyo kenempat mike, “Siape nyo kou amatko untuk kubebasko Barabas apo Yesus, nyo desobut Kristus?” ¹⁸ Sabab, Pilatus tahuko bahwa ule nyo iri, mike lah menyerahko Yesus kenempat enye.

¹⁹ Tekalo Pilatus sedang duduk de keresi pengadilon, bini nye ngirem pesan kenempat enye “Jengon lakuko ape pun terhadop Urang beik iye. Sabab ake lah menderita lobot hal ari nie delom mimpi ulenyo Enye.”

²⁰ Cuma hambuk, imam-imam kepalo ngan padong tua-tua meyakinko urang lobot untuk mintak Barabas ngan membunoh Yesus. ²¹ Gubernur bertanyo ngan mike “Nyo mone deri ke dua urang nie nyo kou kendokoe untuk ku bebas ko bageme? Ngan mike buek, “Barabas!”

²² Pilatus buek ngan enye, “Munye memunye, ape nyo harus kulakuko ngan Yesus, nyo de sobut Kristus?” Mike segelo bekehato, “Salebko Nye!” ²³ ngan Pilatus bertanyo, “Mengka? Enye lah melakuko kejahaton ape?” Cuma, mike berteriak lobeh karas, “Salebko Nye!”

²⁴ Tekalo Pilatus ngoleh bahwa enye hopi menyelesaiko ape pun, malah kerusuhon mulai terjedi, enye ngambik aik ngan membesuh tangonnye de depan urang lobot iye ngan buik, “Ake hopi besaloh atas deroh Urang nie. iye urusonmu dewek!”

²⁵ Ngan, segelo urang iye nyimbot “Deroh-Nye ado atas kami ngan anak-anak kamie!” ²⁶ Mengka, Pilatus membebasko Barabas bagi enye ngan sesodah mencambuki Yesus Pilatus menyerahko Nye untuk desalibko.

(Tentara Pilatus Mengolok-olok Yesus)

²⁷ Mengka, padong tentera gubernur membewo Yesus ke markas kediomon gubernur ngan mengumpulko segelo pasukon romawi mengelilengi Nye. ²⁸ Mike menanggolko pakoion Yesus ngan menyarungko jubah ungu kenempat-Nye. ²⁹ Ngan, sesoda menganyom sebuah mahkota berunok bersamo-samo, enye menyarungko nye de kepalo Yesus, sebetong buluh denempat tangon kanon-Nye, ngan bersujud de hadopon-Nye, ngan mengelek Enye, ujo nye, “Salam Rajo urang Yahudi!” ³⁰ Mike meludahi-Nye, mengambik buluh iye, mengka mengepukkonye ke kepalo-Nye. ³¹ Sesodah mike melegek-Nye, mike merombaki jubah ungu iye deri Yesus, ngan menyarungko lagi pakoion-Nye dewek, ngan ngunda-Nye bejelon untuk menyalibkon-Nye.

(Yesus Desalibko)

³² Tekalo padong tentera iye keluor, mike menemuko seurang jenton deri Kirene nyo benamo Simon. Mike makso Simon untuk memikul salib Yesus. ³³ Ngan, tekalo mike tiba de sebuah tempat nyo benamo Golgota, nyo berarti “Tempat Tengkorak.” ³⁴ Mike membori-Nye anggur untuk deminom nyo decampur dengan empedu, ngan setelah nyo kicapi, Enye hopi endok meminomnye. ³⁵ Tekalo mike menyalibko Yesus, mike ngengagih pakoion-Nye de antaro mike dengan membuang undi. ³⁶ Mengka, mike duduk ngan mengawasi-Nye de sane. ³⁷ Ngan, de pucuk kepalo-Nye, mike memasong tuduhon terhadop-Nye, “NIELAH YESUS, RAJO URANG YAHUDI.” ³⁸ Tekalo waktu iye, ado dua urang penjahat nyo de salibko serompok dengan Yesus. Sikuk de sebelah kanon ngan nyo sikuk de sebelah kiri. ³⁹ Ngan, urang-urang nyo lewat menghujat Enye sambil menggileng-gileng kepalo, ⁴⁰ Ngan buik, “Kowe nyo nak merobohko Bait Allah ngan membengunnye belek delom tiga hari, selamatkolah diri-Me dewek! munye Kowe Anak Allah, turunlah deri salib iye!”

⁴¹ Upa iyelah jugo imam-imam kepalo, bersamo ahli-ahli Torat, ngan padong tua-tua melegek Yesus, ujonye, ⁴² “Enye menyelamatko urang loin, hambuk Enye hopi depot menyelamatko Diri-Nye dewek. Munye Enya adolah Rajo Israel, biarlah Enye turun deri salib iye kinie ngan kite nak pecayo ngan -Enye. ⁴³ enye pcayo kenempat Allah, mangko biarlah Allah menyelamatko-Nye kinie, munye Allah menghendaki-Nye. Ulenyo nye dewek ngehatoko, ‘Ake adolah Anak Allah.’” ⁴⁴ Padong penjahat nyo de salibko serompok dengan Enye jugo melegek-Nye.

(Kemation Yesus)

⁴⁵ Kinie, deri jam keenam, kekelomon pucuk seluruh tanoh iye, sampoi jam ke sembilan. ⁴⁶ Kiro-kiro, tekalo jam sembilan, Yesus buik dengan suaro bias, ujo-Nye, “Eli, Eli, Lama Sabakhtani?” nyo artinye, “Allah-Ke, Allah-Ke mengka Kou meninggalko Ake?” ⁴⁷ Ngan, beberape deri mike nyo togok de sane, tekalo mike mendongor iye, mike buik, “Urang nie sedang mantoui Elia.” ⁴⁸ Tiba-tiba, sikuk deri mike belari, ngan mengambek bunga karang, membesohinye dengan anggur asam, ngan mengobotnye de sebetong buluh, ngan memboriko kenempat Yesus untuk de minom.

⁴⁹ Cuma hambuk, nyo selobihnye buik, “Maro kite kolehko, ibo Elia nak njongok untuk menyelamatko Enye.” ⁵⁰ Ngan, Yesus berseru sekali lagi dengan suaro bias ngan menyerahko Roh-Nye. ⁵¹ Ngan, koleko tirai delom Bait Allah teseget menjedi dua lerang, deri pucuk sampoi ke bewoh, ngan behumi begoyang, ngan betu-betu tebelah. ⁵² Kuburon-kuburon tebuka, ngan lobot badan urang-urang suci nyo la teelek de bangketko. ⁵³ Ngan, setelah keluor deri kuburon-kuburonnye, sesoda kebangketon Yesus, mike masuk ke kota suci ngan menunjukko badan kenempat lobot urang.

⁵⁴ Kinie, kepalo pasukon, ngan mike nyo serompok dengannye mengawasi Yesus, tekalo mike ngoleh gempo behumi ngan segelo hal nyo terjedi nie, menjedi sajo takut ngan buik, “Bonor, Enye adolah Anak Allah!”

⁵⁵ Desane, ado lobot betina nyo ngoleh deri kejouhon, nyo mehalou Yerus deri Galilea untuk melayani Enye. ⁵⁶ Deantaro mike ado Maria Magdalena, Maria induk Yakobus ngan Yusuf, serta induk deri anak-anak Zebedeus.

(Yesus Dekuburko)

⁵⁷ Tekalo hari mulai malom, njongoklah seurang nyo kayo deri Arimatea benamo Yusuf, nyo jugo lah menjedi murid Yesus. ⁵⁸ Enye pogi kenempat Pilatus ngan memintak badan Yesus. Mengka, Pilatus memerentahko mpuknyo badan Yesus de boriko kenempat Yusuf. ⁵⁹ Ngan, Yusuf mengambik badan Yesus, ngan membulang-Nye dengan koin linen nyo bereseh, ⁶⁰ Ngan membarengkon-Nye delom kuburon nyo beheru, miliknyo dewek, nyo sodah enye gali denempat buket betu. Mengka, Yusuf menggulengko betu godong ke pintu kuburon iye ngan bejelon. ⁶¹ Ngan, de sane, ado Maria Magdalena ngan Maria nyo loin sedang duduk de hadopon kuburon iye.

(Kubur Yesus Dejago)

⁶² Tekalo hari seterusnye, nyo iye hari sesodah persiapon untuk Sabat, imam-imam kepalo ngan urang-urang Farisi de kumpulko ke hadopon Pilatus. ⁶³ Mike buik, “Tuan, kamie teringot behwo tekalo si pelato iye lagi hidop, enye perenah buik, ‘Setelah tiga hari, Ake nak bangket lagi.’ ⁶⁴ Ulenyo iye, perentahkolah empuknyo kuburon iye de jego sampoi hari ketiga, munye-munye murid-murid-Nye mungkin njongok ngan maleng-Nye, ngan buik kenempat urang lobot, ‘Enye sodah bangket deri antaro urang teelek.’ Ngan, penipuon nyo teaher nie nak lobih buruk deri nyo pertamo.”

⁶⁵ Pilatus buik kenempat mike, “Kowe mempunyoi penjego. Pogi, jegolah upamone nyo kou pacok.” ⁶⁶ Mengka, mike bejelon ngan mengamanko kuburon iye besamo dengan regu penjego, serta menyegel betu penukup kubur.