10
(Yesus Mengutus Murid-Murid-Nye)
1
Ngan, Yesus memantau kedua belas murid-Nye ngan membori enye kuaso pucuk roh-roh najis untuk menggerah roh-roh iye ngan untuk menyembuhko segelo macam penyaket maupun segelo macam kesaketon.
2
Nielah namo-namo kedua belas rosul iye: Nyo pertamo, Simon nyo desebut Petrus, ngan Andreas dulurnye, ngan Yakobus anak Zebedeus, ngan Yohanes dulurnye,
3
Filipus, ngan Bartolomeus, Tomas, ngan Matius sepengumpul pajak, Yakobus anak Alfeus, ngan Tadeus,
4
Simon urang Zelot, ngan Yudas Iskariot tong menghianati Yesus.
5
Yesus mengutus kedua belas rosul iye ngan memerentahko enye, “Jengon bejelon ke jelon bengso-bengso loin atau masuk kedelom kota urang Samaria.
6
meloinko bejelonlah kenempat domba-domba nyo tesesat deri antaro umat Israel.
7
Ngan, kowe bejelon, beritakolah dengan bekehato, “Kerajaon Serga sodah parok.”
8
Sembuhkolah nyo saket, hidupkolah nyo teelek, tahirkolah nyo kusta, ngan usirlah roh-roh jahat. Kowe menerimo dengan cuma-cuama, borikolah dengan cuma-cuma.
9
Jengon kowe ngunda emas, atau perak, atau tembaga delom pengobot pinggangme,
10
atau tas untuk bejelon, atau dua helai beju, atau sandal, atau tungkat sabab seurang pekerejo pantas untuk makononnye.
11
Ngan, de kota atau desa mone pun nyo kou masuki, selidikilah siape nyo layak de delomnye ngan tinggallah de sane sampoi kowe bejelon.
12
Tekaloh kowe memasuki rumah iye, borikolah salam.
13
Ngan, munye rumah iye layak, biarlah damai sejahterame turun pucuknye, cuma munye hopi, biarlah damai sejahterame, belek ngan kowe.
14
Ngan, siape sajo nyo hopi nerimo kowe atau hopi endok ndongor pembuikonme, tekalo kowe keluor dri rumah atau kota iye, kebaskolah debu kakime.
15
Ake mengehatoko nyo sebonornye ngan kowe bahwa tekalo hari penghakimon, tanoh Sodom ngan Gomora nak lobih pacok menanggungnye diri pado kota iye.
(Kesuliton-Kesuliton nyo Akan Dehadapi Para Murid)
16
“Koleh, Ake nak ngutus kowe upa domba ke tangah-tangah serigala. Ulenyo iye, jedilah cerdik upa ulor ngan tulus upa burung-burung merpati.
17
Cuma hambuk behati-hatilah terhadop urang-urang ulenyo enye nak menyerahko kowe kenempat Sanhedrin ngan nak mencambuk kowe de sinagoge-sinagoge enye.
18
Ngan, kowe nak nyo unda ke hadopon para penguaso ngan para rajo demi Ake, sebagoi kesaksion untuk enye ngan untuk bengeso-bengeso loin.
19
Cuma, tekalo enye menyerahko kowe, jengon kuatir tentang upamone atau ape nyo kou kehatoko ulenyo tekalo iye jugo nak deboriko ngan kowe ape nyo harus kou kehatoko.
20
Sabab, bukon kou nyo buik-eh, cuma iye adolah Roh Bepakme nyo buik de delom kowe.
21
Dulur nak menyerahko dulurnye kenempat kemation, ngan bepak terhadop anaknye. Ngan, anak-anak nak melawon para urang rayo ngan membunoh enye.
22
Kowe nak de benci uleh segelonye ulenyo namo-Ke, cuma urang nyo betahan sampoi aher nak deselamatko.
23
Tekalo enye menganiaya kowe delom satu kota, larilah ke kota nyo loin. Ake mengehatoko nyo sebonornye dengan kowe ulenyo kowe hopi nak sodah melewati kota-kota Israel sampoi Anak Mendesio njongok
24
Murid hopi melobihi gurunye, upa iyelah juga hambo hopi melobihi tuannye.
25
Cukuplah munye murid menjedi upa gurunye, ngan hambo menjedi upa tuannye. Munye enye menyobut tuan rumah iye Beelzebul, sajo buruk lagi kenempat anggota keluargonye.
(Takutlah Kepodo Allah Bukon Kepodo Mendesio)
26
“Ulenyo iye, jengon kowe takut terhadop enye sabab hopi ado apepun nyo tetutup nyo hopi nak deungkap, atau nyo tekerawo nyo hopi nak deketahui.
27
Ape nyo Aku kehatoko ngan kowe delom kekolomon, kehatokolah iye delom tarang. Ngan, ape nyo kou dongor debesikko de telingame, tetelakolah de pucuk hatop rumah.
28
Jengon takut ngan enye nyo membunoh badan, cuma hopi depot membunoh jiwa, meloinkoh telobih takutlah ngan Enye nyo depot memunahko jiwo atau badan de nderako.
29
Bukonkah dua ikok burung pipet dejual untuk sikok duit? Ngan, hopi ado seikuk pun deri enye nan titek ke tanoh de luor kendok Bepakme.
30
Malahon, rambut kepalome segelonye depot de bilang.
31
Ulenyo iye, jengon takut kowe lobih benilai deripado lobot burung pipet.”
(Mengakui Yesus de Hadapon Urang Loin)
32
“Jedi, setiap urang nyo mengakui Ake de hadapan mendesio, Ake jugo nak mengakuinye de hadapon Bepak-Ke nyo ado de serga.
33
Cuma sebeleknye, siape nyo menyangkal Ake de hadapon mendesio, Ake jugo nak menyangkal de hadapon Bepak-Ke nyo ado de serga.
(Tujuon Kedetongon Yesus)
34
“Jengon bepeker bahwa Ake njongok untuk ngunda perdamaion de bumi. Ake njongok bukon untuk ngunda perdamaion meloinko pedang.
35
Sabab, Ake njongok untuk memisahko jenton deri bepaknye, anak betina dri induknye, menantu betina deri induk mentuhanye,
36
ngan musuh seseurang adolah deri anggota keluargonye.
37
Siape nyo lobih mengasehi bepak atau induknye dri pado Ake, hopi layak bagi-Ke. Ngan siape nyo lobih mengasehi anak jenton atau anak betina deripado Ake, hopi layak bagi-Ke.
38
Ngan, siape nyo hopi memikul salibnye ngan mehalau Ake, hopi layak bagi-Ke.
39
Siape nyo mempertahanko nyawonye nak kesayauon nyawonye, ngan siape nyo kesayauon nyawonye demi Ake nak mendepotkonye.”
(Upah deri Allah)
40
“Siape nyo menerimo kowe menerimo Ake. Ngan, siape nyo menerimo Ake menerimo Enye nyo mengutus Ake.
41
Siape nyo menerimo nabi delom namo nabi nak menerimo upah nabi. Ngan, siape nyo menerimo urang bonor nak menerimo upah urang bonor.
42
Ngan, siape nyo membori minom dengan saloh sikok deri urang-urang nyo kecik nie bego anyo secangkir aik dingen delom namo seurang murid, Ake ngehatoko nyo sebonornye ngan kowe, enye hopi nak kesayauon upahnye.”