¹ Txu sohoji òbiti bedeu Deuxu Tyhyhykỹ rarybere Abraõ-ò: —Bòhònyke asu ribi, asỹreny mahãdu tya ribi kia bu heto ribi kia makre suõ-ò kia-diarỹ adee ariteòsinykre. ² Kia ariòreriòrereny boho heka sohoji hãwãdu nihikỹmy relekre.-diarỹ warybewihikỹ tamyreny ariwahinykre, kia ani dehedehemy inabekre, kia kai heka aõwiwihikỹmy mabekre iny witxira dee. ³ Warybewihikỹ ariwahinykre mobo tarybewihikỹ riwahinykre-ò, kia aritxuhokre mobo rotxuhodỹỹkre-ò. Kia aheki ibutumy iny mahãdu bede bedemy rỹimyhỹre warybewihikỹ ariwahinykre. ⁴ Abraõ 75 wyra rimyre bedeu iu Hará ribi rexitare, timybo Deuxu Tyhyhykỹ tamy rarybere mynamy. Kia Lòò iki wana rare. ⁵ Abraõ ridyre tahãwyy Sarai, taexi riòre Lòò ridylere, taseriòre riòre, kia ibutumy taityhyna kia tawetxu mahãdu ixiki rimyre Harãki. Kia rehemynyrenyreu Kanaã-ò, ⁶ Abraõ rohorere hãwãhãkỹ tyadi kia Sique-ò rehemynyre, bedewihikỹ-ò, tai bederade brebuna Moré roimyhỹreki. Kua bedeu cananeu mahãdu kabedeki rahãwanymy roiremyhỹ. ⁷ Tai Deuxu Tyhyhykỹ rexitỹnynyre Abraõ-ò kia rarybere: —Diarỹ adee ariwahinykre kaa suu ariòreriòrereny boho-ò. Kua bedeki Abraõ bede ratòòõ riwinyre Deuxu Tyhyhykỹ dee ibedeki tamy rexitỹnynyreki. ⁸ Irahudita Abraõ rare bede hãwãlò bede-ò, kia Betel ibràra weribiki roimyhỹre kia ibedeki tabreò riòre ridere, kia Ai hãwã beàra weribiki roimyhỹre. Kia tule ibedeki Abraõ bede ratòòõ riwinylere kia Deuxu Tyhyhykỹmy rerinanyre. ⁹ Tairibi tii rare rariamy bede bede-di, kia ikiemy Kanaã iraru weribi-di. ¹⁰ Kia ibedeu Canaá bedeki rama inihikỹmy reare kia Abraõ rare hãwãmy Egito bede--ò. ¹¹ Kia rehemynymy rare bedeu Egito-ò, Abraõ rarybere Sarai-ò tahãwyy-ò: —Boholake. Kai hãwyy ruxera tate, ¹² kia egipcio mahãdu umy robikreu kia raryberenykre: Kaa hãwyy heka ihãwyy rare. Iurenana heka riwarubunyrenykre kia ararubunyrenyõkre. ¹³ Kia iurenana marybekre kai lerỹ waseriòre tatemy. Kawesemy tahe aiòraruki tii boho warumy aratxikremy riwawahinyrenykre, kia awimy riwaywiywinyrenykre. ¹⁴ Kia Abraõ Egito-ò rehemynyreu, kia egipcio mahãdu robirenyre Sarai my, kia ihãwyymy, kia inatyhymy iruxerare. ¹⁵ Kia IòIò aõmysỹdỹỹdu rariehekỹ tule tuu robirenyre, kia tuu relyyrenyre timybokiwe kua hãwyy iruxeraremy. Iurenana heka tiki radyre Iòlò aõmysỹdỹỹna heto-ò. ¹⁶ Iòraruki Iòlò awimy riywiywinymyAbraõ-di ratximyhỹ, tamy budoeni, broreni, jumento, kia hãwyy iwetxumy, hãbu iwetxumy tamy riwahinyre. ¹⁷ Kia Sarai òraruki Deuxu Tyhyhykỹ rirarytxynyre Iòlò kia iriòre boho webinadu binahãkỹ-di. ¹⁸ Iurenana Iòlà rarariowyre Abraõ-ò kia ritỹỹraxinyre: —Aõherekibo kai kawesena wadee tewinyta? Aõherekibo wadee tarybeõte tiki ahãwyy raremy? ¹⁹ Kai tarybete tiki erỹ aseriòre raremy, kia iurenana heka tiki wana raira. Kiaremyta kaa runyre ahãwyy; karibi bohonyke iki wana! ²⁰ Taita Iòlò tarybe riwahinyre, kia isodadu ridyre Abraõ Egito webrò-ò, ihãwyy wana ibutumy kia ibutumy iaõnaaõna wana.