11

¹ Kia juhu bedeu rybe sojihyylemy iny mahãdu rarybemy rỹiramyhỹ. ² Kia ijõ renyõ Oriente ribi rexitarenyre kia rehemynyrenyre Sinar bede-ò, tai rahãwanyiny rỹiramyhỹ. ³ Txu sohojiu wideereny raryberenyre: —Rykoirenyke! Adobo rasõmyhỹre rikiwinyrenykre! Kawesemy tahe tii boho adobo ijõdirenyre riwinyrenykremy, kia mana ribi, kia tybòtere wesena riuhemyhỹreny, kia mana nodenode ribi. ⁴ Tai raryberenyre: —Ka tahe wiji hãwã rikiwinyrenykre kia tò nihikỹ ijõdimy biurawetyyòhòkỹle rỹikre. Kawesemy tahe inynidehedeherenymy rykoirenyrekre kia bede bedemy rykoberarenyõtyhy. ⁵ Taita Deuxu Tyhyhykỹ dubehede hãwã -ò kia tòmỹ robikremy iny mahãdu riwinyrenyre-ò itxeremy. ⁶ Deuxu rarybere myỹ: —Kaa iny mahãdu heka iny sohojirenyle roire, kia ibutumy rybe sohojilemy rarybemyhỹrenyre. Kia tii boho riwinyrenyreri heka iòrarule rare. Iòhòtyhylemy tabedeeryrenydi aõ ixideewimy riwinyrenykre. ⁷ Rykeserenykre kia irybereny tuu rarybemyhỹrenyre rikibinabinanyrenykre, kia tii boho rieryrenyõkremy aõmybo widee raryberenyrerimy. ⁸ Kawesemy tahe Deuxu riubỹtỹnyrenyre bede bedemy, kia tii boho hãwãwidỹỹ ribi ixwirenyre. ⁹ Kia hãwã Babel my raninire, kiemy dori tai Deuxu ribinabinanyre rybemy rarybemyhỹrenyre, kia ibutumy su my hãwãdu mahãdu kia iribi tahe bede bedemy roberarenyre.

¹⁰ Ka boho heka Sem riòreriòrereny roire. Inatxi wyramy beòrahãkỹ sỹtybymy, kia iu Sem 100-my iwyra, kia iriòre Arpaxe ruare. ¹¹ Irahudita Sem bede riere 500-my wyra ratyremy kia ixyby uladu mahãdu tybymy runyre. ¹² Kia 35 wyramy bede riereu Arpaxe uladu tybymy runyre, Sela iriòrenire. ¹³ Irahudi Arpaxe bede riere 503-my wyra ratyremy kia ixyby uladu tybymy runyre. ¹⁴ Kia Sela 30-my wyra bedeu ruare iriòre ‘Eber. ¹⁵ Irahudita Sel’a bede riere 403-my wyra ratyremy kia ixyby uladu tybymy runyre. ¹⁶ Kia Eber 34 wyra bedeu ruare iriòre Pelegue. ¹⁷ Irahudi ‘Eber bede riere 430-my wyra ratyremy kia ixyby uladu mahãdu tybymy runyre. ¹⁸ Kia 30 wyra rimyre bedeu Pelegue uladu tybymy runyre, Re’u iriòrenire. ¹⁹ Irahudita Pelegue bede riere 209-my wyra ratyremy kia ixyby uladu mahãdu tybymy runyre. ²⁰ Kia Reu 32-my wyra rimyre bedeu ruare iriòre Serugue. ²¹ Irahudi Reu bede riere 207-my wyra-my ratyremy kia ixyby uladu mahãdu tybymy runyre. ²² Kia Serugue 30-my wyra bedeu ruare iriòre Naor. ²³ Irahudi Serugue bede riere 200-my wyra ratyremy kia ixyby uladu mahãdu tybymy runyre. ²⁴ Kia Naor 29-my wyra rimyre bedeu ruare iriòre Tera. ²⁵ Irahudi Naor bede riere 119-my wyra ratyremy kia ixyby uladu mahãdu tybymy runyre. ²⁶ Kia 70-my wyra rimyre sỹtybymy Tera inataõmy uladu tybymy runyre: Abraõ, Naor kia Harã.

Tera riòreriòrereny boho

²⁷ Ka boho heka Tera riòreriòrereny boho roire, kia heka Abraõ tyby rare, Naor tyby kia Hãra tyby. Harã heka Lòòtyby rare. ²⁸ Tera heka irumy raremyhỹ iu iriòre Hãra rurure bedeu Babilôniaki. Ur hãwãki, tai ruare bedeki. ²⁹ Abraõ rexilidire Sarai wana, kia Naor rexilidire Milca wana. Milca kia Isca boho heka Harã riòre roire. ³⁰ Sarai heka iriòre ihoõre kiemy dori ityrabinare. ³¹ Tera ròhònyre Ur hãwã ribi, Babilonia ribi kia Kanaã suòhòkỹle rakremy, kiaridyre ixihemy tariòre Abraõ, kia tariòreriòre Lòò, kia heka Harã riòre rare, kia tariòreriòrese Sarai ridyre, kia heka Abraõ hãwyy rare. Tii boho Harãòhòkỹle ritehemynyrenyre kia tai rahãwanyrenyre. ³² Kia Tera rurure Harãki 205-my wyra rimydi.