¹ Kodelemy Deuxu biurawetyy riwinyre, suu riwinylere. ² Kia aõ rỹiõhyymy rỹiramyhỹ sumy, kia heka bero nihikỹdile rahetynymy roimyhỹre. Kia bedeluru. Tahe bero nihikỹ rihetynymy roimyhỹre, kia Deuxu tyytyby bedeery nihikỹ yhydile riukỹukỹnymyhỹre bero tyre-ki. ³ Taita Deuxu rarybere: —Kia loosòna relekre! Kia tahe loosòna ròrarunyre rỹirakremy ⁴ Deuxu loosònaki awimy tai rahare, taita bedeluru ribi rihitxinyre. ⁵ Deuxu loosòna rininire “txuijaramy”, kia bedeluru tahe “ruumy” rininire. Kia ruu ixawire, 50 kia ta ihewomy biurasò nade. Ka heka komy txuu ròhònyre. ⁶ Taita Deuxu rarybere: —Kia berotyaki bero rawira reakre, kia wiribi inatximy rawirareakremy. ⁷ Kia tahe kawesemy tuu rutỹỹnyre. Deuxu bero riwirareare inatximy: kia bero wiribi iraru weribi rihitxinyre, ijõ bero ta ibòò weribi rihitxinyre. ⁸ Ka bero wiribi rihitxinyre tahe Deuxu “biuwetyymy” rininire, Kia ruu ixawire, kia ta ihewomy biurasò nade. Ka heka inatxi txuu ròhònyre. ⁹ Tai Deuxu rarybere: —Kia bero, biuwetyy rawoki roireri rexibutunykre bede sohojikihyy1e, kia tai sutere ròhònykremy. Kia tahe kawesemy tuu rotỹỹnyre. ¹⁰ Deuxu, bede raterenyre “sumy” rininire, kia bee widee rexibutunyre tahe “bero nihikỹmy” rininire. Deuxu tuu robire, kia aõnaõna riwinyreki tai awimy rahare. ¹¹ Kia tahe heka rarybere: —Kia suu bederade òtaòta-di sõemy rexiokynykre, kia alòbrònaty ijõdikre, kia bederade raratynymyhỹkre. Kia tahe kawesemy tuu rotỹỹnyre ¹² Suu sõemy bederade òtaòta-di rasõere. Alòbròna alòbrònaty-di riwahinymyhỹre, bederade raratynymyhỹre. Deuxu tuu robire, kia awimy tai rahãre, ¹³ Ruu ixãwire, kia ta ihewomy biurasò nade. Ka heka inataõ txuu ròhònyre. ¹⁴ Taita Deuxu rarybere: —Kia biuwetyy loosòna relekre, kia biurasò txu bedeluru-wana wiribi rihitxinykremy, kia txuu idi rariamy rarekremy, wyra bededỹỹnana, beòra, behetxi. ¹⁵ Kia loosòna heka biuwetyyki rarỹsỹnymy rarekre, kia suu ritoosònymy rarekremy. Kia tahe 50 kawesemy tuu rotỹỹnyre. ¹⁶ Deuxu heka inatximy loosòna nihikỹ riwinyre: ibỹỹ heka txuijara ridinodunykreniy riwinyre, kia iyla tahe ruu ridinodunykremy riwinyre. Kia taina riwinylere. ¹⁷ Deuxu heka biuwetyy-ò loosòna ritidire suu ritoosònymy rarekremy, ¹⁸ kia txuijara bedeluru wana ridinodunymy rarekremy, kia loosòna, bedeluru ribi rihitxinykremy. Deuxu tuu robire, kia tai awimy rahãre aõnaõna 50 riwinyreki. ¹⁹ Ruu ixãwire, kia ta ihewomy biurasò nade. Ka heka inaubiòwa txuu ròhònyre. ²⁰ Irahudi Deuxu rarybere: —Kia bero-ki sõemy ibutumy utura òtaòta-di ijõdikre, kia sumy tasỹ sõemy nawii nawii ijõdikre, biumy ruòmy rỹirakremy. ²¹ Kawesemy tahe Deuxu utura inihikỹmy riwinyre bero nihikỹki, kia ibutumy utura òtaòta riwinyre, kia tahe beromy risinymy rỹimyhỹrenyre riukỹukỹnymy, nawii òtaòta tule riwinylere. Deuxu tuu robire, kia tai 50 awimy rahãre aõnaõna riwinyreki. ²² Tii tarybewihikỹ utura òtaòta-ò riwahinyre, bero nihikỹmy rỹimyhỹrenyremy, kia rarybere: —Kia sõemy inihikỹmy rexijuakre, bero nihikỹ rỹxikre. Kia nawii tasỹ sõemy rexijuajuakre sumy rỹimyhỹrenyre. ²³ Ruu ixãwire, kit ihewomy biurasò nade. Ka heka iruyre txuu ròhònyre. ²⁴ Taita Deuxu rarybere: —Kia suu, ibutumy iròdu iròdu òtaòta-di rexisõenykre: iròdu inytyhy, iròdu debure, kia iròdu sumy ratiranymy rỹimyhỹrenyre, kia sohoji sohoji iròdu òtaòta rỹimyhỹremy. Kia tahe, kawesemy tuu rotỹỹnyre. ²⁵ Deuxu, iròdu iròdu riwinyre, kia sohoji sohojimy iròdu òtaòta rỹimyhỹrenyremy: iròdu inytyhy rỹimyhỹrenyre, iròdu debure, iròdu su my ratiranymy rỹimyhỹrenyre. Deuxu tuu robire, kia awimy tai rahãre aõnaõna riwinyreki. ²⁶ Tai tii rarybere: —Ka tahe wiji iny rikiwinyrenykre, kia iny wesereny relekre. Tii boho heka ibedeeiryreny ijõdikre, utura ribi, nawii ribi, iròdu iròdu inytyhy ribi, iròdu iròdu debure ribi, kia iròdu iròdu su my ratiranymy rỹimyhỹrenyre ribi. ²⁷ Kawesemy tahe Deuxu iny riwinyre; kia heka tii Deuxu wesemy riwinyre. Tii hãbu riwinyre hãwyy- wana, ²⁸ kia tahe tarybe wihikỹ myỹ tamyreny riwahinyre: —Kia sõemy sõetyhymy rariòrenyrenykre; kia ibutumy su my roberarenykre kia rimyrenykre. Kia tahe ibedeeryreny ijõdirenykre, utura bero nihikỹmy rỹimyhỹrenyre ribi, kia nawii biu my ruòmy rỹimyhỹrenyre ribi, kia iròdu iròdu sumy ratiranymy rỹimyhỹrenyre ribi. ²⁹ Kai boho birỹsỹbenykremy,-diarỹ adeereny ibutumy alòbròna alòbrònaty ariwahinykre, kia ibutumy bederade raratynymyhỹre adeereny ariwahinykre. ³⁰ Kia ibutumy iròdu iròdu debure-ò, kia ibutumy nawii nawii-ò, kia ibutumy iròdu su my ratiranymyhỹrenyre-ò, kia asi ariwahinykre bederade lỹre ariwahinykre irỹsỹnarenymy. Kawesemy tahe tuu rotỹỹnyre. ³¹ Deuxu tuu robire ibutumy aõnaõna riwinyremy, kia tai awimy rahãre. Ruu ixawire, kiata ihewomy biurasò nade. Ka heka debò sohoji txuu ròhònyre.